பொங்கல் பண்டிகை இந்தியாவின் ஒவ்வொரு மாநிலத்திலும் எந்தெந்த பெயரில் கொண்டாடப்படுகிறது தெரியுமா? ஷாக் ஆகாதீங்க..

Pongal 2026: தமிழர்களின் பண்டிகையான பொங்கல் திருநாளைக் கொண்டாட தமிழ்நாடு உற்சாகமாக தயாராகி வருகிறது. ஆண்டின் தொடக்கத்திலேயே வரும் இந்த பண்டிகையானது, சூரியன், விவசாயம் மற்றும் விவசாயிகளை பெருமைப்படுத்தும் விதமாக அறுவடை நாளாக கொண்டாடப்படுகிறது. பொங்கல் தமிழ்நாட்டில் தமிழர் பண்டிகையாகக் கொண்டாடப்பட்டாலும் இந்தியா முழுவதும் பொங்கல் வெவ்வேறு பெயர்களில் கொண்டாடப்படுகிறது.

இந்தியா முழுவதும் பொங்கல் பண்டிகையின் சாராம்சம் ஒன்றாகவே இருந்தாலும், இது இந்தியாவின் பல்வேறு பகுதிகளில் வெவ்வேறு பெயர்களிலும், வெவ்வேறு மரபுகளுடனும் கொண்டாடப்படுகிறது; ஒவ்வொரு பிராந்தியமும்அதன் தனித்துவமான கலாச்சார முக்கியத்துவத்தையும், வித்தியாசமான சடங்குகளையும் கொண்டுள்ளது. இந்த பதிவில் பொங்கல் பண்டிகை இந்தியாவின் வெவ்வேறு பிராந்தியங்களில் எப்படி கொண்டாடப்படுகிறது என்று தெரிந்து கொள்ளலாம்.

தமிழ்நாட்டில் பொங்கல்

நம் தமிழ்நாட்டில், பொங்கல் பண்டிகை சூரிய பகவானுக்கு மரியாதை செலுத்தும் நான்கு நாள் விழாவாக பொங்கல் என்ற பெயரில் கொண்டாடப்படுகிறது. முதல் நாள் போகி, அதைத் தொடர்ந்து தைப்பொங்கல், மாட்டுப் பொங்கல் மற்றும் காணும் பொங்கல் ஆகியவை கொண்டாடப்படுகின்றன. இந்த நாட்களில் குடும்பங்கள் புதிதாக அறுவடை செய்யப்பட்ட அரிசி, வெல்லம் மற்றும் பால் ஆகியவற்றைக் கொண்டு தித்திக்கும் பொங்கலை செய்து கடவுளுக்கு வழிபடுகிறார்கள்.

வட இந்தியாவில் மகர சங்கராந்தி

வட இந்தியாவின் பெரும்பாலான பகுதிகளில், இந்த பண்டிகை மகர சங்கராந்தி என்று அழைக்கப்படுகிறது. இந்த பண்டிகையின் போது மக்கள் தங்கள் பாவங்களைக் கழுவுவதற்காக கங்கை, யமுனை போன்ற புண்ணிய நதிகளில் புனித நீராடுவதன் மூலம் இது கொண்டாடப்படுகிறது. இந்த நாளில் பட்டம் விடுவது ஒரு முக்கிய கொண்டாட்டமாகும், குறிப்பாக உத்தரப் பிரதேசம் மற்றும் ராஜஸ்தான் போன்ற மாநிலங்களில் இது மிகவும் பிரபலமானதாகும்.

குஜராத்தில் உத்தராயணம்

குஜராத்தில் பொங்கல் பண்டிகை உத்தராயணம் என்ற பெயரில் கொண்டாடப்படுகிறது, மேலும் இது குஜராத் மக்களால் மிகவும் ஆவலுடன் எதிர்பார்க்கப்படும் விழாக்களில் ஒன்றாகும். இந்த நாளில் வானம் கலர்புல்லான பட்டங்களால் நிரம்பி வழிகிறது, மேலும் மக்கள் ஆர்வத்துடன் பட்டம் விடும் போட்டிகளில் பங்கேற்கின்றனர். இந்தத் திருவிழா சமூக நல்லிணக்கம் மற்றும் ஒற்றுமையைக் குறிக்கிறது.

பஞ்சாபில் லோஹ்ரி

பொங்கல் பண்டிகைக்கு ஒரு நாள் முன்னதாகக் கொண்டாடப்படும் லோஹ்ரி, பஞ்சாபின் ஒரு முக்கியமான பண்டிகையாகும். இது ராபி பயிர்களின் அறுவடையைக் குறிக்கிறது. நெருப்பு மூட்டி, பாரம்பரியப் பாடல்கள் பாடி, பாங்கரா மற்றும் கித்தா போன்ற நடனங்களுடன் இது கொண்டாடப்படுகிறது. மக்கள் நெருப்பைச் சுற்றி ஒன்று சேர்ந்து எள் மற்றும் வெல்லத்தால் செய்யப்பட்ட இனிப்புகளைப் படைத்து, செழிப்புக்காக கடவுளை வழிபடுகிறார்கள்.

அஸ்ஸாமில் மாக் பிஹு

அஸ்ஸாமில், பொங்கல் திருவிழா மாக் பிஹு அல்லது போகாளி பிஹு என்று அழைக்கப்படுகிறது. இது அறுவடைப் பருவம் முடிவடைவதைக் குறிக்கிறது. அஸ்ஸாமில் பொங்கல் விழா விருந்துகள், பாரம்பரிய விளையாட்டுகள் மற்றும் மேஜி எனப்படும் தீமூட்டுதலுடன் கொண்டாடப்படுகிறது. இந்த திருவிழா அஸ்ஸாம் மக்களின் விவசாயப் பாரம்பரியத்தையும், இயற்கையுடனான அவர்களின் பிணைப்பையும் பிரதிபலிக்கிறது.

உத்தரப் பிரதேசம் மற்றும் பீகாரில் கிச்சடி

உத்தரப் பிரதேசம் மற்றும் பீகார் போன்ற வட இந்திய மாநிலங்களில், மகர சங்கராந்தி 'கிச்சடி' என்றும் அழைக்கப்படுகிறது. இந்த நாளில் மக்கள் அரிசி மற்றும் பருப்பால் செய்யப்படும் கிச்சடி என்ற உணவைத் தயாரித்து ஏழைகளுக்கு விநியோகிக்கின்றனர். ஆன்மீகத் தூய்மை மற்றும் புதுப்பித்தலின் அடையாளமாக, ஆறுகளில் புனித நீராடுவது கொண்டாட்டங்களின் ஒரு முக்கிய பகுதியாக உள்ளது.

காஷ்மீரில் ஷிஷூர் சங்கராந்த்

காஷ்மீரில், இந்த பொங்கல் விழா 'ஷிஷூர் சங்கராந்த்' என்று அழைக்கப்படுகிறது, மேலும் இது கடுமையான குளிர்காலத்தின் முடிவைக் குறிக்கிறது. இந்த திருவிழா மற்ற மாநிலங்களைப் போல பிரம்மாண்டமான கொண்டாட்டங்களை விட, வழிபாடு மற்றும் குடும்ப ஒன்றுகூடல்களுக்கு அதிக முக்கியத்துவம் அளிக்கிறது.

வங்காளத்தில் பௌஷ் சங்கராந்தி

மேற்கு வங்காளத்தில், இந்த விழா பௌஷ் சங்கராந்தி என்று அழைக்கப்படுகிறது. இது அரிசி மற்றும் பேரீச்சம்பழ வெல்லத்தால் செய்யப்படும் 'பித்தே' என்று அழைக்கப்படும் பாரம்பரிய இனிப்புடன் அறுவடையைக் கொண்டாடும் ஒரு திருவிழாவாகும். கங்கை மற்றும் வங்காள விரிகுடாவின் சங்கமத்தில் நடைபெறும் பெரிய திருவிழாவான கங்கா சாகர் மேளா விழாவிற்கு ஆயிரக்கணக்கான பக்தர்கள் வருகைத் தருகின்றனர்.

மத்திய இந்தியாவில் சுகராத்

மத்தியப் பிரதேசம் மற்றும் சத்தீஸ்கரின் சில பகுதிகளில், பொங்கல் விழா சுகராத் என்று அழைக்கப்படுகிறது. இது பாரம்பரிய நாட்டுப்புறப் பாடல்கள், நடனங்கள் மற்றும் விருந்துகளுடன் கொண்டாடப்படுகிறது, இது அறுவடையின் மகிழ்ச்சி மற்றும் சமூக ஒற்றுமைக்கு முக்கியத்துவம் அளிக்கிறது.

இந்தியா முழுவதும் பொங்கல் வெவ்வேறு பெயர்களில் கொண்டாடப்பட்டாலும் அதன் சாராம்சம் என்பது சமூக நல்லிணக்கமும், இயற்கையை வழிபடுவதுமாகத்தான் இருக்கிறது. எனவே இந்த வருடமும் பொங்கல் விழா மூலம் சமூகத்தில் ஒற்றுமையை விதைப்போம், இயற்கையை ஆராதிப்போம்.