மெமீஸ் ஒரு மனநல அபாயமாக மாறி வருகிறதா? -அதிர்ச்சி!!!

அதீத போதை

போதைகளில் பல விதம் இருக்கின்றன, மது, புகை, இச்சை (உடலுறவு), பணம், உணவு, விளையாட்டு மற்றும் இணையம். இதில் கடைசியாக இடம் பெற்றுள்ள இணையம் மற்றும் இதன் கீழ் இயங்கும் சமூக வலைத்தளம் தான் மிகவும் அபாயமாக மாறி வருகிறது.

எவ்வாறான மனநல மாற்றம்?

பொதுவாக மனநலம் பாதிக்கப்பட்டவர்கள் ஏதேனும் ஒரே மனநிலையில் நிலைபெற்று இருந்துவிடுவார்கள். எல்லா உணர்வையும் கண்டு சிரிப்பது, அல்லது அழுவது, கோபம் அடைவது, எந்த உணர்வும் இன்றி இருப்பது போன்றவற்றை நாம் எடுத்துக் காட்டாக பார்க்க இயலும்.

இதில் இணையம் எந்த வகை

இணையம் என்பது நமது வாழ்வியலோடு 1990-களிலேயே கலந்துவிட்டது. ஆனால், சமூக இணையங்களின் வருகைக்கு பிறகு தான் இதற்கு அடிமையாகுதல் என்பது வளர ஆரம்பித்தது.

ஃபேஸ் புக்

முக்கியமாக ஃபேஸ் புக் என்ற சமூக இணையத்தின் வருகைக்கு பின், சரியாக 2010-ஆம் ஆண்டிற்கு பிறகு இது மாபெரும் வளர்ச்சி அடைந்தது. நாம் இடும் பதிவுகளுக்கு கிடைக்கும் லைக்ஸ், கமெண்ட்டுகள் போன்றவை அதிகமாக எதிர்பார்க்கப்பட்டது. இது மெல்ல, மெல்ல ஒருவரின் மனநிலையை சீர்குலைக்கவும், எதிர்வினை எண்ணங்கள் அதிகரிக்கவும் காரணமாக மாறியது.

மெமீஸ் எனும் அபாயம்

லைக்ஸ் மற்றும் அதிக கமெண்ட்ஸ் போன்றவைக்காக, "My reaction" என்று ஆரம்பிக்கப்பட்ட பதிவுகள் தான் காலப்போக்கில் மெமீஸ்களாக மாறின. இதற்கு ஃபேஸ் புக் பயனாளிகளிடம் இருந்து பெரிய வரவேற்ப்பு கிடைக்க ஆரம்பித்தது.

அஞ்சான் மூலம் பிரபலம்

அஞ்சான் குறித்த இயக்குனர் லிங்குசாமியின் பேட்டி ஒன்றின் காரணமாக மெமீஸ் உருவாக்கம் பூதாகரமாக வெடித்தது. மெமீஸ் உருவாக்குபவர்கள் என்றால் அவர்களை ஃபேஸ் புக்கில் பெரிய ஆளாக பார்ப்பது, பின் தொடர்வது போன்றவை நிகழ ஆரம்பித்தன.

மெமீஸ் என்பது மன நோயா?

நல்லவை, கேட்டவை, வெற்றி, தோல்வி என எது நடந்தாலும் அதை ஒரு கேளிக்கையாகவும், கேலி, கிண்டலாகவும் மட்டுமே பார்க்கும் சுபாவம் இதன் மூலம் அதிகரிக்க ஆரம்பித்தது. இந்த வகையான போதை அல்லது அடிமையாகுதல், அந்த நபர்களின் மனதில் எதிர்வினை எண்ணங்களை அதிகப்படுத்துகிறது.

மனநல பாதிப்பா?

எந்த விஷயமாக இருந்தாலும் அதை கேலியாக மட்டும் பார்ப்பது, ஒருவரை குறி வைத்து பழித்து பேசுவது போன்றவை மனதில் எதிர்வினை எண்ணங்கள் அதிகரிக்க தூண்டுகிறது. இதற்கு மெமீஸ் உருவாக்குவது ஒரு மறைமுக காரணமாக இருக்கிறது. இதெல்லாம் கூட ஒருவரின் மனநிலையை பாதிக்குமா? எனில், ஆம் என்கிறார்கள் மனநல நிபுணர்கள். அளவுக்கு மீறும் அமிர்தமும் நஞ்சாகும் என்பது போன்றது தான் இதுவும்.