பணத்தின் வரலாறு: பணம் கண்டுபிடிப்பதற்கு முன் எதை வைத்து மக்கள் பொருட்களை வாங்கினார்கள் தெரியுமா?

History of Money: உலகை இப்போது ஆள்வது அரசுகளோ, தலைவர்களோ அல்ல, மாறாக பணம்தான் ஆள்கிறது. ஆடம்பர வாழ்க்கையாக இருந்தாலும் சரி, ஏழ்மையான வாழ்க்கையாக இருந்தாலும் சரி இந்த பூமியில் பணம் இல்லாத வாழ முடியாத சூழல் உருவாகிவிட்டது. மனிதர்கள் பணம் இருந்தால்தான் வாழ முடியும் என்ற சூழல் சில நூற்றாண்டுகளுக்கு முன்புதான் உருவானது. பணம் என்ற ஒன்று உருவாக்கப்படுவதற்கு முன்பு இந்த உலகம் எப்படி இருந்திருக்கும் என்று எப்போதாவது சிந்தித்து இருக்கிறீர்களா? பணத்தின் வரலாறு என்பது மிகவும் விசித்திரமானது மற்றும் சுவாரஸ்யமானது. பணத்தின் தோற்றம் மற்றும் வளர்ச்சியைப் பற்றி இந்த பதிவில் தெரிந்து கொள்ளலாம்.

பணம் என்றால் என்ன?

பணத்திற்கென்று பெரும்பாலும் உள்ளார்ந்த மதிப்பு எதுவும் இருப்பதில்லை. மாறாக, பணம் என்பது அதன் மீது ஒரு குறிப்பிட்ட மதிப்பு ஏற்றப்பட்ட ஒரு பொருளாகும். இது பொருட்கள் மற்றும் சேவைகளை வர்த்தகம் செய்துகொள்ள வழிவகுக்கிறது. பண்டைய காலங்களில் உலோக நாணயங்கள் போன்ற சில வகையான பணங்கள், அவற்றை உருவாக்கப் பயன்படுத்தப்பட்ட மூலப்பொருட்களின் அடிப்படையில் உண்மையான மதிப்பைக் கொண்டிருந்தன. இருப்பினும், இத்தகைய நாணயங்களின் பண மதிப்பும் கூட, ஒரு சமூகத்தைச் சார்ந்த மக்கள் அவற்றின் மீது வைத்துள்ள நம்பிக்கையிலிருந்தே உருவானது. பணத்தின் பரிணாம வளர்ச்சிக் காலப்போக்கில் பல்வேறு வடிவங்களில் மாறியது.

பணம் எப்போது கண்டுபிடிக்கப்பட்டது?

பணம் என்ற பொருள் பயன்பாட்டில் இருந்ததற்கான மிகத் தொன்மையான சான்றுகள், சுமார் கி.மு. 3000 காலகட்டத்தில் பண்டைய மெசபடோமியாவிலிருந்து கிடைக்கின்றன. அந்தக்கால மக்கள், தங்களுக்குள்ளான கடன்களைக் குறிப்பதற்காகக் களிமண் பலகைகளில் விவசாயம் சார்ந்த குறியீடுகளை வரைந்து வந்தனர். பண்டமாற்று முறை போன்ற நேரடிப் பரிமாற்றங்களுக்குப் பதிலாக, மதிப்பைச் சுட்டிக்காட்டும் குறியீட்டு வடிவங்களைப் பயன்படுத்தியதற்கான முதல் ஆதாரம் இதுதான்.

பண்டமாற்று முறையின் வரலாறு

பணம் கண்டுபிடிக்கப்படுவதற்கு முன்பு, மக்கள் பண்டமாற்று முறையைப் பயன்படுத்திப் பொருட்களையும், தங்கள் சேவைகளையும் வர்த்தகம் செய்தனர். விவசாயிகள் கால்நடைகளுக்குப் பதிலாகக் காய்கறிகளைப் பண்டமாற்று செய்து வந்தனர், அதே சமயம் மற்றொருவர் தங்கள் உழைப்பு அல்லது மரக்கட்டைகளுக்குப் பதிலாகக் கால்நடைகளைப் பண்டமாற்று செய்யலாம். இந்த பரிவர்த்தனைகள்தான் தற்போதுள்ள நவீனப் பொருளாதாரத்திற்கான அடித்தளங்களாக இருந்தன.

பண்டமாற்று முறை எப்போது தொடங்கப்பட்டது?

பண்டமாற்று முறையின் வரலாறு கி.மு. 6000-ஆம் ஆண்டுக்கு முந்தையது. அப்போது மெசபடோமியப் பழங்குடியினர் இந்த முறையை ஃபீனீசியர்களுக்கு அறிமுகப்படுத்தினர். பணம் இல்லாத நிலையில், தேநீர், உப்பு, ஆயுதங்கள் மற்றும் உணவு போன்ற பொருட்கள் பரிமாறப்பட்டன. நாளடைவில் பண்டமாற்று முறை தொடர்ந்து பரிணாம வளர்ச்சி அடைந்தது, காலனித்துவ அமெரிக்கர்கள் விலங்குகளின் தோல்கள், பயிர்கள் மற்றும் துப்பாக்கிகளைப் பண்டமாற்று செய்தனர்.

முதல் உலோகப் பணம்

முதல் உலோக நாணயங்கள், கி.மு. 7-ஆம் நூற்றாண்டில் லிடியா என்று அழைக்கப்பட்ட தற்போதைய துருக்கி மற்றும் சீனாவில் பயன்பாட்டிற்கு வந்தன. சீனாவில், உலோக நாணயங்கள் வெண்கலத்தால் செய்யப்பட்டு, விவசாயக் கருவிகளின் வடிவத்தில் இருந்தன. லிடியாவிலோ, நாணயங்கள் 'எலெக்ட்ரம்' எனப்படும் தங்கம் மற்றும் வெள்ளி கலந்த ஒரு உலோகக் கலவையால் உருவாக்கப்பட்டன. உலகில் ஒரு அரசாங்க அமைப்பால் அதிகாரப்பூர்வமாக வெளியிடப்பட்ட முதல் நாணயங்கள், 'லிடியன் ஸ்டேட்டர்கள்' ஆகும். நாணயங்களின் ஆரம்பகால வடிவங்கள், கி.மு. 7-ஆம் நூற்றாண்டின் பிற்பகுதி முதல் பண்டைய கிரேக்கர்களாலும் பயன்படுத்தப்பட்டன.

உலகின் முதல் காகிதப் பணம்

உலகின் முதல் காகிதப் பணம் கி.பி. 11 ஆம் நூற்றாண்டில், சோங் வம்ச ஆட்சியில் சீனாவில் உருவாக்கப்பட்டது. காகிதப் பணம் கண்டுபிடிக்கப்படுவதற்கு நூற்றுக்கணக்கான ஆண்டுகளுக்கு முன்பு, சீனாவில் வெண்கலம் மற்றும் செப்பு நாணயங்களே முக்கிய நாணயங்களாக இருந்தன. சர்வதேச வர்த்தகம் அதிகரித்ததால், இந்த நாணயங்களைச் சுமந்து செல்வதில் அவற்றின் எடை பெரிய தடையாக மாறியது.

சுமார் கி.பி. 900-ல், நாணயங்களைச் சுமந்து செல்வதில் உள்ள எடைப் பிரச்சினையைத் தவிர்க்க முயன்ற வணிகர்கள், பரிவர்த்தனை ரசீதுகளை வர்த்தகம் செய்யத் தொடங்கினர். ஆரம்பகால சோங் அதிகாரிகள், இந்த வைப்பு ரசீதுகளை வழங்குவதில் சில கடைகளுக்கு ஏகபோக உரிமையை வழங்கினர். இறுதியில், 1020-களில், அரசாங்கம் பொறுப்பேற்று, முதல் அதிகாரப்பூர்வ காகிதப் பணமாக அந்த ரசீதுகளை வெளியிடத் தொடங்கியது.

நவீன காலப் பணம்

ஆரம்பத்தில் பண்டமாற்று முறையிலிருந்த வர்த்தகம் பின்னர் நாணயம் மற்றும் காகிதப்பணங்களாக உருமாறியது. நவீன காலப் பணத்தைத் தொடர்ந்து தற்போது கிரெடிட் கார்ட், டெபிட் கார்ட், டிஜிட்டல் பணம் செலுத்தும் முறைகள் மற்றும் கிரிப்டோகரன்சி எனப் பல வடிவங்களாக விரிவடைந்துள்ளது.