18 வயதிலேயே உலக செஸ் சாம்பியனான குகேஷ் யார்? சாம்பியன் ஆனவுடன் ஏன் கண்ணீர் சிந்தினார் தெரியுமா?

நேற்று முதல் இந்தியா குறிப்பாக தமிழ்நாடு முழுவதும் பேசப்பட்டு வரும் ஒரு பெயர் குகேஷ். 18 வயதான குகேஷ், செஸ் போட்டியில் நடப்பு உலக சாம்பியனான சீனாவின் டிங் லிரனை தோற்கடித்து, மிக இளம் வயதிலேயே உலக செஸ் சாம்பியனாகி வரலாறு படைத்தார். அவரது வரலாற்று வெற்றியின் மூலம், குகேஷ் 18-வது கிராண்ட்மாஸ்டர் ஆனார், மேலும் உலக செஸ் சாம்பியன்ஷிப் பட்டத்தை விஸ்வநாதன் ஆனந்துக்குப் பிறகு இரண்டாவது இந்தியர் என்ற பெருமையையும் பெற்றுள்ளார்.

18 வயதான குகேஷ் 7.5-6.5 என்ற புள்ளி கணக்கில் சீனாவின் டிங் லிரனை தோற்கடித்தார். சாம்பியன்ஷிப்பை வென்றதை உணர்ந்த குகேஷ் ஆனந்த கண்ணீரைக் கட்டுப்படுத்த முடியாமல் கண்ணீர் சிந்தினார். அவரது வரலாற்று வெற்றிக்குப் பிறகு குகேஷ் கூறுகையில், "கடந்த 10 ஆண்டுகளாக நான் இந்த தருணத்தை கனவு கண்டு வருகிறேன். கனவை நனவாக்கியதால் நான் மகிழ்ச்சியடைகிறேன்," என்று கூறினார், மேலும் "நான் வெற்றிபெற இயலாது என்று நினைத்ததால் கொஞ்சம் உணர்ச்சிவசப்பட்டேன். ஆனால் எனக்கு வெற்றி பெறும் வாய்ப்பு கிடைத்துவிட்டது" என்று கூறினார்.

13 தீவிரமான மற்றும் கணிக்க முடியாத ஆட்டங்களுக்குப் பிறகு, இரு போட்டியாளர்களும் தலா 6.5 புள்ளிகளுடன் சமநிலையில் நுழைந்தனர், ஒரு புள்ளி மட்டுமே தனக்கு உலக சாம்பியன் பட்டத்தைப் பெற முடியும் என்பதை அறிந்திருந்தார். இருப்பினும், ஆட்டம் ஐந்து மணி நேரத்தை நெருங்கியதால், ஆட்டம் சமநிலைக்கு வந்ததாகத் தோன்றியது, ஆனால் தற்போதைய சாம்பியன் டென்ஷனில் ஒரு தவறு விட்டார், அந்த வாய்ப்பை சரியாக பயன்படுத்திக் கொண்டு குகேஷ் பட்டத்தை தட்டி தூக்கினார்.

குகேஷ் நீண்ட காலமாக தனது இறுதி இலக்கான உலக சாம்பியன் பட்டத்தை எதிர்நோக்கி காத்திருந்தார். அவரது குழந்தைப் பருவத்தில் இருந்து வைரலான ஒரு வீடியோ இதற்கு ஆதாரமாக உள்ளது, அந்த வீடியோவில் 11 வயது சிறுவன், செஸ்பேஸ் இந்தியாவின் IM சாகர் ஷாவிடம், "நான் உலகின் இளைய செஸ் சாம்பியனாக மாற விரும்புகிறேன்" என்று கூறுகிறார்.

குகேஷைப் பற்றி அவரது முன்னாள் பயிற்சியாளரும் கிராண்ட்மாஸ்டருமான விஷ்ணு பிரசன்னா கூறுகையில், " குகேஷ் தனது வயதுடைய மற்ற மாணவர்களைப் போலல்லாமல், 11 வயதிலிருந்தே சதுரங்கத்தில் எப்போதும் "மிகவும் தீவிரமாக" இருந்தார். குகேஷ் செஸ் விளையாட்டில் காட்டிய தீவிரமும், ஆவேசமும்தான் அவரை உலக சாம்பியனாக மாற்றியுள்ளது என்று கூறினார்.

குகேஷ் யார்?

குகேஷ் தொம்மராஜு அல்லது குகேஷ் டி, 29 மே 2006 அன்று நமது சென்னையில் பிறந்தார். அறிக்கைகளின்படி, அவரது தந்தை ஒரு அறுவை சிகிச்சை நிபுணர், அதே சமயம் அவரது தாயார் தொழில்ரீதியாக நுண்ணுயிரியல் நிபுணர். குகேஷ் ஏழு வயதில் செஸ் கற்கத் தொடங்கினார், இது மற்ற உலக சம்பியன்களுடன் ஒப்பிடும்போது மிகவும் தாமதமானதாகும்.

குகேஷ் தனது பள்ளி மூலம் செஸ் உலகிற்குள் நுழைந்தார். அவரது முதல் பயிற்சியாளர் திரு. பாஸ்கர், ஆறு மாதங்களுக்குள் FIDE தரம் பெற்ற வீரராக மாற உதவினார். இவ்வாறு தனது சதுரங்கப் பயணத்தைத் தொடங்கினார்.

குகேஷின் வெற்றிப்பயணம் இதோடு நின்றுவிடவில்லை, இரண்டு ஆண்டுகளுக்குப் பிறகு, திரு. விஜயானந்தின் பயிற்சியின் கீழ், குகேஷ், 2015 ஆசிய பள்ளி செஸ் சாம்பியன்ஷிப்பில், 9 வயதுக்குட்பட்ட பிரிவில் வென்று, Candidate Master (CM) பட்டத்தையும் பெற்றார். ஆசிய யூத் செஸ் சாம்பியன்ஷிப்பில், குகேஷ் 12 வயதுக்குட்பட்ட தனிநபர் கிளாசிக்கல், ரேபிட் மற்றும் பிளிட்ஸ் பிரிவுகளிலும், 12 வயதுக்குட்பட்ட அணி ரேபிட் மற்றும் பிளிட்ஸ் போட்டிகளிலும் ஐந்து தங்கப் பதக்கங்களை வென்றார். அதே ஆண்டில், அவர் உலக இளையோர் செஸ் சாம்பியன்ஷிப்பில் 10/11 புள்ளிகளுடன் முடித்து, 12 வயதுக்குட்பட்ட பட்டத்தைப் பெற்றார்.

அவரது அடுத்த பெரிய சாதனை அவரது 12 வது வயதில் 2017 இல் நடந்தது, அவர் மார்ச் 2017 இல் 34வது Cappelle-la-Grande Open இல் சர்வதேச மாஸ்டர் பட்டத்தைப் பெற்றார். இது அவரை வரலாற்றில் இரண்டாவது இளைய செஸ் கிராண்ட்மாஸ்டர் ஆக்கியது. 2023 ஆம் ஆண்டில், விஸ்வநாதன் ஆனந்தின் 37 ஆண்டுகால சாதனையை முறியடித்து, குகேஷ் முதல் தரவரிசையில் உள்ள இந்திய செஸ் வீரர் ஆனார்.