மறக்க வைத்தே மனிதனை மழுங்கடிக்கும் அல்சைமர் நோய்! காரணம் என்ன? நரம்பியல் நிபுணர் விளக்கம்

World Alzheimer's Day 2026: அல்சைமர் என்பது நினைவாற்றலை ஏற்படுத்தும் ஒரு நோயாகும். இந்த நோயால் பாதிக்கப்பட்டவர்கள் தங்கள் வாழ்வில் பல ஆண்டுகளுக்கு முன் நடந்த விஷயங்களை நினைவில் வைத்திருக்க முடியும் என்றாலும், சமீபத்தில் நடந்தவற்றை நினைவில் கொள்வது கடினமாக இருக்கும். காலப்போக்கில் இது கடுமையான நினைவாற்றல் இழப்பை ஏற்படுத்தி, தினசரி வேலைகளை கூட செய்ய முடியாமல் போகும்.

பொதுவாக இப்படியான அல்சைமர் நோய் வயதானவர்களுக்கு தான் ஏற்படுகிறது. இருப்பினும் இந்த நோயால் 40-50 வயதிற்குட்பட்டவர்களும் பாதிக்கப்பட்டு வருகின்றனர். இதனால் லேசான ஞாபக மறதியை கொண்டிருந்தாலும், பலரும் இது அல்சைமராக இருக்குமோ என்று நினைத்து அச்சம் கொள்கின்றனர்.

எனவே இந்த அல்சைமர் நோய் குறித்த விழிப்புணர்வை மக்களிடையே ஏற்படுத்த ஒவ்வொரு ஆண்டும் செப்டம்பர் 21 ஆம் தேதி உலக அல்சைமர் தினம் அனுசரிக்கப்படுகிறது. இந்த தினத்தை முன்னிட்டு, அல்சைமர் நோய் குறித்து பெரும்பாலான மக்களின் மனதில் உள்ள கேள்விகளுக்கான பதில்களை சென்னை கிளீனீகிள்ஸ் மருத்துவமனையின் நரம்பியல் நிபுணரான டாக்டர். பிரவீன் சந்தர் அவர்கள் தமிழ் போல்ட்ஸ்கையிடம் பகிர்ந்து கொண்டார்.

கேள்வி 1: அல்சைமர் நோய்க்கும், வயது முதிர்வால் ஏற்படும் இயல்பான மறதிக்கும் என்ன வித்தியாசம்?

"அவ்வப்போது சில விஷயங்களை மறந்துவிட்டு, சிறிது நேரத்திற்குப் பிறகு நினைவுக்கு வருவது வயது முதிர்வின் இயல்பான ஒரு பகுதியாக இருக்கலாம். ஆனால், அல்சைமர் நோயில் நினைவாற்றல் மற்றும் சிந்தனைத் திறனில் (thinking ability) ஏற்படும் பாதிப்பு தொடர்ந்து அதிகரித்து, அன்றாட செயல்பாடுகள் பாதிக்கத் தொடங்கும்." என்று டாக்டர் கூறினார்.

கேள்வி 2: அல்சைமர் நோய் ஏற்படுவதற்கான காரணங்கள் என்ன?

"இதற்கு ஒரே ஒரு காரணம் கிடையாது. வயது, மரபியல் காரணிகள் மற்றும் பிற உடல்நலக் காரணிகள் இதில் பங்கு வகிக்கின்றன. மேலும், மூளையில் பீட்டா-அமிலாய்டு (beta-amyloid), டாவ் (tau) போன்ற புரதங்களில் ஏற்படும் மாற்றங்களும் அல்சைமர் நோயுடன் தொடர்புடையவை." என்று டாக்டர் கூறினார்.

கேள்வி 3: அல்சைமர் மரபாக வருமா? குழந்தைகளுக்கும் வருமா?

"குடும்பத்தில் ஒருவருக்கு அல்சைமர் இருந்தால், மற்றவர்களுக்கு ஏற்படும் அபாயம் அதிகரிக்கலாம். ஆனால், குழந்தைகளுக்கு நிச்சயமாக அல்சைமர் ஏற்படும் என்று அர்த்தமல்ல. பெரும்பாலான அல்சைமர் பாதிப்புகள் ஒரு குறிப்பிட்ட மரபணுவால் மட்டும் ஏற்படுவதில்லை; அரிதாகக் காணப்படும் மரபியல் வகைகள் குறைந்த எண்ணிக்கையிலான பாதிப்புகளையே ஏற்படுத்துகின்றன." என்று டாக்டர் கூறினார்.

கேள்வி 4: ஆரம்ப கால அல்சைமர் நோய் என்றால் என்ன?

"65 வயதுக்கு முன்பே அல்சைமர் நோய் ஏற்படுவதை ஆரம்ப கால அல்சைமர் நோய் (Early-onset Alzheimer's) என்கிறோம். இது குறைவாகவே காணப்படுகிறது. நினைவாற்றல் பாதிப்புடன், வேலை செய்வதில், திட்டமிடுவதில், மொழியைப் பயன்படுத்துவதில் அல்லது பிற அறிவாற்றல் திறன்களில் சிரமங்கள் ஆரம்ப அறிகுறிகளாக இருக்கலாம்." என்று டாக்டர் கூறினார்.

கேள்வி 5: டிமென்ஷியாவுக்கும், அல்சைமருக்கும் என்ன வித்தியாசம்?

"டிமென்ஷியா என்பது நினைவாற்றல், சிந்தனை மற்றும் பிற அறிவாற்றல் திறன்கள் குறைந்து, அது அன்றாட வாழ்க்கையைப் பாதிக்கும் நிலைக்கான பொதுவான சொல். அல்சைமர் நோய் என்பது டிமென்ஷியாவை ஏற்படுத்தும் ஒரு குறிப்பிட்ட நோய்; மேலும், இது டிமென்ஷியாவின் மிகவும் பொதுவான காரணமாகும்." என்று டாக்டர் கூறினார்.

கேள்வி 6: அல்சைமர் நோயின் எச்சரிக்கை அறிகுறிகள் என்ன?

"சமீபத்தில் நடந்த விஷயங்களை தொடர்ந்து நினைவில் வைத்துக்கொள்ள முடியாமல் இருப்பது, ஒரே கேள்வியை மீண்டும் மீண்டும் கேட்பது, நன்கு அறிந்த இடங்களிலேயே குழப்பமடைவது, வழக்கமாகச் செய்யும் வேலைகளைச் செய்வதில் சிரமம் ஏற்படுவது, திட்டமிடுவதில் சிக்கல் மற்றும் முடிவெடுக்கும் திறன் அல்லது நடத்தையில் மாற்றம் ஆகியவை எச்சரிக்கை அறிகுறிகளாக இருக்கலாம். இம்மாற்றங்கள் தொடர்ந்து ஏற்பட்டு, அன்றாட வாழ்க்கையை படிப்படியாகப் பாதிக்கிறதா என்பதுதான் முக்கியம்." என்று டாக்டர் கூறினார்.

கேள்வி 7: நான் அடிக்கடி விஷயங்களை மறந்து கொண்டிருக்கிறேன் - இது அல்சைமரா அல்லது மன அழுத்தமா?

"நினைவாற்றலில் ஏற்படும் ஒவ்வொரு பிரச்சினையும் அல்சைமர் என்று அர்த்தமல்ல. மன அழுத்தம், சரியான தூக்கமின்மை, மனச்சோர்வு, சில மருந்துகள் மற்றும் பிற உடல்நலப் பிரச்சினைகளும் நினைவாற்றலைப் பாதிக்கலாம். ஆனால், மறதி தொடர்ந்து நீடித்தாலோ அல்லது அதிகரித்தாலோ மருத்துவரிடம் பரிசோதனை செய்து கொள்வது அவசியம்." என்று டாக்டர் கூறினார்.

கேள்வி 8: அல்சைமர் பொதுவாக எந்த வயதில் தொடங்குகிறது?

"வயது அதிகரிக்கும் போது அல்சைமர் ஏற்படும் அபாயம் கணிசமாக அதிகரிக்கிறது. பெரும்பாலான பாதிப்புகள் 65 வயதுக்குப் பிறகு ஏற்படுகின்றன. இருப்பினும், இளம் வயதினருக்கும் அல்சைமர் ஏற்படலாம்; 65 வயதுக்கு முன் ஏற்படும் அல்சைமர் ஆரம்ப கால அல்சைமர் நோய் எனப்படுகிறது." என்று டாக்டர் கூறினார்.

கேள்வி 9: இரத்த பரிசோதனை / எம்ஆர்ஐ மூலம் அல்சைமரை ஆரம்பத்திலேயே கண்டறிய முடியுமா?

"அனைவருக்கும் அல்சைமரை உறுதிப்படுத்தக்கூடிய ஒரே ஒரு பரிசோதனை கிடையாது. நோயாளியின் அறிகுறிகள், அறிவாற்றல் மதிப்பீடு (cognitive assessment) மற்றும் தேவைக்கேற்ப இரத்தப் பரிசோதனை, மூளைப் படமெடுப்பு (brain imaging), MRI போன்ற பரிசோதனைகள் பயன்படுத்தப்படுகின்றன. தற்போது உருவாகி வரும் இரத்த அடிப்படையிலான Biomarker பரிசோதனைகள், பொருத்தமான நோயாளிகளிடம் அல்சைமர் நோயைக் கண்டறிய உதவக்கூடும்." என்று டாக்டர் கூறினார்.

கேள்வி 10: ஒரே கேள்வியை மீண்டும் மீண்டும் கேட்பது அல்சைமர் அறிகுறியா?

"ஒருவர் ஏற்கனவே கேட்ட கேள்வியை நினைவில் வைத்துக் கொள்ளாமல், அதே கேள்வியை மீண்டும் மீண்டும் கேட்பது நினைவாற்றல் பாதிப்பின் ஆரம்ப அறிகுறியாக இருக்கலாம். ஆனால், இந்த ஒரு அறிகுறியை மட்டும் வைத்து அல்சைமர் என்று உறுதியாகக் கூற முடியாது. மற்ற நினைவாற்றல், சிந்தனை அல்லது நடத்தையில் ஏற்படும் மாற்றங்களையும் சேர்த்து மதிப்பீடு செய்ய வேண்டும்." என்று டாக்டர் கூறினார்.

(பொறுப்புத் துறப்பு: மேலே கொடுக்கப்பட்டுள்ள தகவல் இணையத்தில் கிடைக்கும் அனுமானங்கள் மற்றும் தகவல்களின் அடிப்படையில் கொடுக்கப்பட்டுள்ளன மற்றும் நம்பகத்தன்மைக்கு உத்தரவாதம் இல்லை. தமிழ் போல்ட்ஸ்கை இக்கட்டுரை தொடர்பான தகவலை உறுதிப்படுத்தவில்லை. மேலும் எங்கள் ஒரே நோக்கம் தகவலை வழங்குவது மட்டுமே. அதை வெறும் தகவலாக மட்டும் எடுத்துக் கொள்ள வேண்டும். எந்தவொரு தகவலையும் அனுமானத்தையும் பயிற்சி செய்வதற்கு அல்லது செயல்படுத்துவதற்கு முன், தயவுசெய்து சம்பந்தப்பட்ட நிபுணரை அணுகவும்.)