பெண்களே! 30 வயசு ஆயிடுச்சா.. அப்ப இந்த பரிசோதனைகளை கட்டாயம் எடுத்து பாருங்க..

தைராய்டு தூண்டும் ஹார்மோன் சோதனை (TSH Test)

இந்திய பெண்களில் சுமார் 60% பெண்கள் தைராய்டு பிரச்சனையால் அவதிப்படுகிறார்கள். ஒருவரது தைராய்டு சுரப்பி சரியாக செயல்படுகிறதா என்பதை உறுதிப்படுத்த எடுக்கும் சோதனை தான் TSH சோதனை. இந்த சோதனையில் தைராய்டு சுரப்பி சுரக்கும் ஹார்மோன்கள் போதுமான அளவில் இல்லாவிட்டால், அதற்கேற்ப சிகிச்சைகளை உடனே எடுக்கலாம். ஒருவரது தைராய்டு சுரப்பியில் பிரச்சனைகள் இருந்தால் தலைமுடி உதிர்வது, மன அழுத்தம் மற்றும் ஒழுங்கற்ற மாதவிடாய் சுழற்சி போன்ற அறிகுறிகள் தென்படும்.

பிஏபி ஸ்மியர் சோதனை (PAP Smear Test)

இந்தியாவில் ஒவ்வொரு ஆண்டும் சுமார் 74,000 பெண்கள் கர்ப்பப்பை வாய் புற்றுநோயால் இறப்பதாக கூறப்படுகிறது. இதை தடுக்க வேண்டுமானால், கர்ப்பப்பை வாய் புற்றுநோயை ஆரம்பத்திலேயே கண்டறிந்து சிகிச்சை எடுக்க வேண்டும். ஆனால் கர்ப்பப்பை வாய் புற்றநோயானது ஆரம்ப கட்டத்தில் எவ்வித அறிகுறிகளையும் காட்டாது, முற்றிய நிலையிலேயே அறிகுறிகளை வெளிக்காட்டும். எனவே 30 வயதை ஒரு பெண் அடைந்துவிட்டால், இரண்டு வருடங்களுக்கு ஒரு முறை தவறாமல் பிஏபி ஸ்மியர் சோதனை எடுக்க வேண்டும். குறிப்பாக இந்த சோதனையை அடிக்கடி உடலுறவில் ஈடுபடும் பெண்கள் அவசியம் எடுக்க வேண்டும்.

முழு இரத்த எண்ணிக்கை (CBC)

அறிக்கை ஒன்றின் படி, இந்தியாவில் 15-49 வயதிற்குட்பட்ட சுமார் 51% பெண்கள் இரத்த சோகை என்னும் இரத்த சிவப்பணுக்களின் குறைபாட்டினால் பாதிக்கப்பட்டுள்ளனர். இரத்த சோகையை தடுக்க வேண்டுமானால், பெண்கள் ஆறு மாதத்திற்கு ஒருமுறை உடலில் உள்ள இரத்த சிவப்பணுக்களின் அளவை பரிசோதனை செய்து பார்க்க வேண்டும். அதற்கு சிபிசி என்னும் சோதனையை எடுத்து பார்க்க வேண்டும்.

வைட்டமின் டி மற்றும் கால்சியம் சோதனை

ஆண்களை விட பெண்களுக்கு தான் எலும்பு தொடர்பான பிரச்சனைகள் அதிகம் வருகின்றன. குறிப்பாக ஆஸ்டியோபோரோசிஸ் என்னும் எலும்பு நோயைத் தடுக்க எலும்புகள் நன்கு அடர்த்தியாக இருக்க வேண்டும். உலகளவில் இந்த ஆஸ்டியோபோரோசிஸ் நோயால் சுமார் 200 மில்லியன் பெண்கள் பாதிக்கப்பட்டுள்ளதாக கூறப்படுகிறது. எனவே எலும்புகளின் ஆரோக்கியத்தை கண்காணிக்க வைட்டமின் டி மற்றும் கால்சியம் அளவு சோதிக்கும் பரிசோதனையை எடுக்க வேண்டும். இப்படி சீரான இடைவெளியில் இந்த சோதனையை செய்தால், எலும்பு நோயின் அபாயத்தைத் தடுக்கலாம்.

வைட்டமின் பி12 மற்றும் ஃபோலேட் சோதனை

வைட்டமின் பி12 மற்றும் ஃபோலேட் ஆகியவை பி வைட்டமின் குழுவைச் சேர்ந்தது. இந்த வைட்டமின்கள் உடலில் போதுமான அளவில் இருக்க வேண்டியது அவசியம். ஏனெனில் இவை இரத்த சிவப்பணுக்களின் வளர்ச்ச்சி, திசுக்கள் மற்றும் செல்களை சரிசெய்வது மற்றும் டிஎன்ஏ-வின் தொகுப்பு ஆகியவற்றை எளிதாக்குகின்றன. இந்த வைட்டமின்கள் குறைவாக இருந்தால், அது இரத்த சோகைக்கு வழிவகுக்கும். சைவ உணவாளர்களுக்கு தான் பெரும்பாலும் இந்த வைட்டமின் பி12 குறைபாடு ஏற்படும். ஏனெனில் இந்த வைட்டமின்கள் முட்டை, இறைச்சி, சிக்கன் ஆகியவற்றில் அதிகம் காணப்படுகிறது. எனவே இந்த வைட்டமின்கள் சரியான அளவில் உள்ளதா என்பதை அறிய இரத்த பரிசோதனை செய்ய வேண்டும்.

லிப்பிட் ப்ரொஃபைல் (Lipid Profile)

தற்போதைய உணவுப் பழக்கத்தால், உடலில் கொழுப்புக்களின் அளவு அதிகரிக்கிறது. ஆனால் நிறைய பேர் கொழுப்புக்கள் முற்றிய நிலையில் மருத்துவரை அணுகுகிறார்கள். கொழுப்புக்கள் அதிகரித்தால், அது இதய நோயின் அபாயத்தை அதிகரித்துவிடும். எனவே ஆரோக்கியமாக இருக்க வேண்டுமானால் 20 வயது முதல் ஒவ்வொருவரும் 4 ஆண்டுகளுக்கு ஒருமுறை லிப்பிட் ப்ரொஃபைல் சோதனையை செய்து கொள்ள அமெரிக்கன் ஹார்ட் அசோசியேஷன் பரிந்துரைக்கிறது. இந்த லிப்பிட் ப்ரொஃபைல் என்பது கொலஸ்ட்ரால் மற்றும் ட்ரைகிளிசரைடுகளின் அளவை கண்டறியப் பயன்படுத்தப்படும் ஒரு இரத்த பரிசோதனையாகும். இந்த சோதனையை பெண்கள் மட்டுமின்றி, ஆண்களும் எடுத்து பார்க்க வேண்டும்.