எலான் மஸ்க் அவருடைய பணத்தை பிரித்துக் கொடுத்தால் பூமியில் உள்ள ஒவ்வொருவருக்கும் எவ்வளவு கிடைக்கும் தெரியுமா?

உலகளவில் செல்வந்தர்களின் எண்ணிக்கை நாளுக்கு நாள் அதிகரித்துக் கொண்டே வருகிறது. தற்போது உலகில் பில் கேட்ஸ், ஜெஃப் பெசோஸ் போன்ற ஆயிரக்கணக்கான பில்லினியர்கள் இருந்தாலும் உலகின் ஒரே டிரில்லியனராக எலான் மஸ்க் உருவெடுத்துள்ளார். SpaceX-ன் சாதனை படைத்த IPO-விற்குப் பிறகு, எலான் மஸ்க் 1 டிரில்லியன் அமெரிக்க டாலர் என்ற வரலாற்றுச் சிறப்புமிக்க மைல்கல்லைக் கடந்தார்.

இந்த மைல்கல் எலான் மஸ்க்கை உலகளவில் ஒரு தனித்துவமான நிலைக்கு உயர்த்தியுள்ளதுடன், அவருக்கு கற்பனை செய்ய முடியாத அளவிற்கு ஒரு மாபெரும் செல்வத்தையும் உருவாக்கியுள்ளது. ஒரு கற்பனைக்கு அவருடைய முழுச் செல்வத்தையும் உலக மக்கள் அனைவருக்கும் சமமாகப் பகிர்ந்தளிக்கப்பட்டால், ஒவ்வொரு நபரும் ஒரு கணிசமான தொகையைப் பெறுவார்கள். மேலும், அவரிடம் உள்ள செல்வம் பெரும்பாலான நாடுகளின் மொத்த பொருளாதாரத்தை விடப் பெரியது என்பது குறிப்பிடத்தக்கது.

உலகில் உள்ள ஒவ்வொருவருக்கும் எவ்வளவு பணம் கிடைக்கும்?

சமீபத்திய மதிப்பீடுகளின்படி, உலகின் மக்கள் தொகை சுமார் 820 கோடியாக உள்ளது. எலான் மஸ்க்கின் 1 டிரில்லியன் அமெரிக்க டாலர் சொத்து மதிப்பை உலகில் உள்ள அனைவருக்கும் சமமாகப் பிரித்து வழங்கினால், ஒவ்வொருவருக்கும் ஏறக்குறைய 122 அமெரிக்க டாலர்கள் அதாவது இந்திய ரூபாயில் 10,300 ரூபாய் கிடைக்கும்.

எலான் மஸ்க்கின் சொத்து மதிப்பு எவ்வளவு?

தற்போது 1 டிரில்லியன் அமெரிக்க டாலர் சொத்துக்கு அதிபதியாக இருக்கும் எலான் மஸ்க்கிடம் உள்ள ரொக்கப் பணத்தை ஒன்றன் பின் ஒன்றாக அடுக்கினால், அந்த வரிசை சுமார் 97 மில்லியன் மைல்கள் (156 மில்லியன் கிலோமீட்டர்கள்) நீளம் கொண்டதாக இருக்கும். இது பூமிக்கும், சூரியனுக்கும் இடையிலான சராசரி தூரத்தை விட அதிகம். மேலும், இது நிலவை 200-க்கும் மேற்பட்ட முறை சுற்றி வரும் அளவிற்கும் போதுமானதாக இருக்கும்.

மஸ்க்கின் சொத்து மதிப்பு எந்தெந்த நாட்டின் பொருளாதாரத்தை விட பெரியது?

சர்வதேச நாணய நிதியத்தின் (IMF) மதிப்பீடுகளின்படி, தென் ஆப்பிரிக்காவின் ஆண்டுப் பொருளாதார மதிப்பு சுமார் 480 பில்லியன் அமெரிக்க டாலர்கள் ஆகும். எனவே, மஸ்க்கின் சொத்து மதிப்பு அவரது சொந்த நாட்டின் மொத்த உள்நாட்டு உற்பத்தியை விட இரண்டு மடங்கை விட அதிகமாகும். சொல்லப்போனால், 1 டிரில்லியன் அமெரிக்க டாலருக்கும் அதிகமான பொருளாதாரத்தைக் கொண்ட நாடுகள் மிகவும் சொற்பமாகவே உள்ளன.

1 டிரில்லியன் என்பது எவ்வளவு பெரிய தொகை?

அமெரிக்காவில் ஒரு சராசரி வீட்டின் விலை சுமார் 4,03,200 டாலர்கள் என்று வைத்துக்கொண்டால், மஸ்க்கின் ஒரு டிரில்லியன் டாலர் சொத்து மதிப்பைக் கொண்டு கிட்டத்தட்ட 25 லட்சம் வீடுகளை வாங்க முடியும். பல முக்கிய நகரங்களின் மக்கள் தொகையைவிட அதிகமான எண்ணிக்கையிலான மக்களுக்குக் குடியிருப்பு வசதி அளிக்க இந்த வீடுகளே போதுமானது.

மற்ற பணக்காரர்களுக்கும் மஸ்க்கிற்கும் உள்ள வித்தியாசம் எவ்வளவு?

மஸ்கிற்கும் மற்ற உலகக் கோடீஸ்வரர்களுக்கும் இடையிலான இடைவெளி தற்போது மிகப்பெரியதாக மாறியுள்ளது. லாரி பேஜ், செர்ஜி பிரின், ஜெஃப் பெசோஸ் மற்றும் லாரி எலிசன் ஆகியோரின் சொத்து மதிப்புகளை ஒன்றாகக் கூட்டினாலும், அவை மஸ்கின் மதிப்பிடப்பட்ட 1 டிரில்லியன் அமெரிக்க டாலர் நிகர சொத்து மதிப்பை விட குறைவாகவே இருக்கும்.