தினமும் ஒரு கையளவு பூசணி விதைகளை சாப்பிட்டால் என்னென்ன நன்மைகள் கிடைக்கும் தெரியுமா?

பூசணி விதையில் உள்ள சத்துக்கள்

100 கிராம் பூசணி விதைகளில் 574 கலோரிகள், 49 கிராம் கொழுப்பு, 6.6 கிராம் நார்ச்சத்து மற்றும் 30 கிராம் புரோட்டீன்கள் உள்ளன. இதில் உள்ள கொழுப்புகள் பெரும்பாலும் உடலுக்கு நன்மை பயக்கும் பாலிஅன்சாச்சுரேட்டட் மற்றும் மோனோஅன்சாச்சுரேட்டட் கொழுப்புக்கள் ஆகும். மேலும் அதில் வைட்டமின் பி1, வைட்டமின் பி2, வைட்டமின் பி3, வைட்டமின் பி5, வைட்டமின் பி9, வைட்டமின் சி, வைட்டமின் ஈ மற்றும் வைட்டமின் கே போன்ற பலவிதமான வைட்டமின்கள் உள்ளன. இது தவிர கால்சியம், இரும்புச்சத்து, மக்னீசியம், மாங்கனீசு, பாஸ்பரஸ், பொட்டாசியம், சோடியம், ஜிங்க் போன்ற சத்துக்களும் உள்ளன.

இப்போது பூசணி விதையின் நன்மைகளைக் காண்போம்.

இதயத்திற்கு நல்லது

பூசணி விதைகள் இதயத்திற்கு மிகவும் நல்லது. இதில் உள்ள ஆன்டி-ஆக்ஸிடன்ட்டுகள் பல்வேறு பிரச்சனைகளில் இருந்து இதயத்தைப் பாதுகாக்கிறது. குறிப்பாக இதில் உள்ள மக்னீசியம் இரத்த அழுத்தத்தைக் குறைக்க உதவுகிறது மற்றும் கெட்ட கொலஸ்ட்ரால் மற்றும் ட்ரைகிளிசரைடுகளின் அளவைக் குறைத்து இதய நோய்களின் அபாயத்தைக் குறைக்கிறது. மேலும் பூசணி விதையில் உள்ள நார்ச்சத்து கொலஸ்ட்ரால் அளவைக் குறைத்து, இதயத்தை பாதுகாக்கிறது.

புற்றுநோயைத் தடுக்கிறது

தினமும் ஒரு கையளவு பூசணி விதைகளை உட்கொண்டு வருவதன் மூலம், இரைப்பை, மார்பகம் மற்றும் பெருங்குடல் புற்றுநோய்களின் அபாயம் குறைகிறது. இதற்கு அந்த விதைகளில் உள்ள சக்தி வாய்ந்த ஆன்டி-ஆக்ஸிடன்ட்டுகள் தான் காரணம். முக்கியமாக இந்த விதைகளில் உள்ள கரோட்டினாய்டுகள் ஆண்களுக்கு வரும் புரோஸ்டேட் புற்றுநோயைத் தடுக்கிறது.

சர்க்கரை நோயாளிகளுக்கு நல்லது

பூசணி விதைகளல் மக்னீசியம் அதிகமாக உள்ளது. மக்னீசியம் இரத்த சர்க்கரைஅளவைக் குறைக்க உதவுவதால், சர்க்கரை நோயாளிகளுக்கு பூசணி விதைகள் சிறந்த ஸ்நாக்ஸாகும். எனவே சர்க்கரை நோய் உள்ளவர்கள் இந்த விதைகளை தினசரி உணவில் சேர்ப்பது நல்லது.

நோயெதிர்ப்பு சக்தி மேம்படும்

உங்களின் நோயெதிர்ப்பு சக்தி வலுவாக இருக்க வேண்டுமானால், பூசணி விதைகளை உட்கொண்டு வாருங்கள். இதனால் அதில் உள்ள வைட்டமின் ஈ மற்றும் ஜிங்க் நோயெதிர்ப்பு மண்டலத்தை வலுவாக்கி, உடலைத் தாக்கும் நோய்க்கிருமிகளிடம் இருந்து உடலைப் பாதுகாக்கிறது. மேலும் இந்த விதைகளில் சக்தி வாய்ந்த ஆன்டி-ஆக்ஸிடன்ட்டுகள் இருப்பதால், ப்ரீ ராடிக்கல்களால் உடலில் உள்ள செல்கள் சேதமடைவது தடுக்கப்படுகிறது.

நல்ல தூக்கம் கிடைக்கும்

உங்களால் தினமும் இரவில் நல்ல நிம்மதியான தூக்கத்தைப் பெற முடியவில்லையா? அப்படியானால் பூசணி விதைகளை தினமும் சாப்பிடுங்கள். இதனால் அதில் உள்ள ட்ரிப்டோஃபேன் என்னும் அமினோ அமிலம் நல்ல தூக்கத்தைப் பெற உதவும்.

எடை இழப்பிற்கு உதவும்

பூசணி விதைகளில் புரோட்டீன்கள் மற்றும் நார்ச்சத்து அதிகளவில் உள்ளன. எனவே இந்த விதைகளை தினமும் உட்கொள்ளும் போது, அது நீண்ட நேரம் வயிற்றை நிரப்பி வைத்திருப்பதோடு, அளவுக்கு அதிகமாக உணவு உண்பதைக் குறைத்து, உடல் எடை இழப்பிற்கு உதவுகிறது.

எலும்புகளுக்கு நல்லது

பூசணி விதைகளில் மக்னீசியம் அதிகமாக உள்ளன. மக்னீசியம் எலும்புகளின் வளர்ச்சிக்கும், வலிமைக்கும் தேவையான சத்தாகும். ஆய்வு ஒன்றில், தினமும் போதுமான அளவு மக்னீசியத்தைப் பெறுபவர்களின் எலும்புகளில் கனிமச்சத்துக்கள் அதிகமாக இருப்பது தெரிய வந்துள்ளது. மேலும் இதனால் அவர்களுக்கு எலும்பு முறிவு மற்றும் ஆஸ்டியோபோரோசிஸ் ஏற்படும் அபாயமும் குறைகிறது. 100 கிராம் பூசணி விதைகளில் 262 மில்லிகிராம் மக்னீசியம் உள்ளன. இது ஒரு நாளைக்கு தேவையான மக்னீசியத்தில் 65% ஆகும்.

புரோஸ்டேட் ஆரோக்கியம் மேம்படும்

ஆண்கள் பூசணி விதைகளை தினமும் உட்கொண்டு வந்தால், அது புரோஸ்டேட் சுரப்பியின் ஆரோக்கியத்தை மேம்படுத்தும். ஏனெனில் பூசணி விதைகளில் ஜிங்க் அதிகமாக உள்ளன. ஆண்கள் தினமும் போதுமான அளவு ஜிங்க் சத்தை பெற்றால், புரோஸ்டேட் புற்றுநோய் வருவதற்கான அபாயம் குறையும்.

விந்தணுக்களின் தரம் மேம்படும்

பூசணி விதைகளில் ஜிங்க் சத்து அதிகமாக உள்ளன. ஜிங்க் சத்தானது டெஸ்டோஸ்டிரோன் அளவை அதிகரிப்பதோடு, விந்தணுக்களின் தரம் மற்றும் எண்ணிக்கையை அதிகரித்து, ஆண்களின் கருவளத்தை மேம்படுத்துகிறது. எனவே விந்தணு தொடர்பான பிரச்சனைகளை சந்திக்கும் ஆண்கள் தினமும் பூசணி விதைகளை சாப்பிடுவது நல்லது.

இவ்வளவு நன்மைகளை வழங்கும் பூசணி விதைகளை இனிமேல் தூக்கிப் போடாமல், அவற்றை சேகரித்து, வாணலியில் போட்டு வறுத்து, ஸ்நாக்ஸாக சாப்பிடும் பழக்கத்தைக் கொள்ளுங்கள்.