ஆண்களுக்கு விந்தணு குறைபாடு ஏற்படுவதற்கான காரணங்கள்!!!

புகைப்பிடிப்பது

ஆண்களுக்கு விந்தணு குறைபாட்டை ஏற்படுத்தும் ஆரோக்கியமற்ற பழக்கவழக்கங்களில் முதன்மையானது தான் புகைப்பிடிப்பது. இதனால் சிகரெட்டில் உள்ள புகையிலை விந்தணுக்களை அழித்து, அதன் உற்பத்தியைக் குறைத்துவிடும்.

ஜங்க் உணவுகளை சாப்பிடுவது

ஜங்க் உணவுகளில் எந்த ஒரு ஊட்டச்சத்துக்களும் கிடையாது. அதில் வெறும் கொழுப்புக்கள் மட்டும் தான் உள்ளது. ஆகவே கருத்தரிக்க முயலும் போது, ஜங்க் உணவுகள் உட்கொள்வதை தவிர்க்க வேண்டும். இல்லாவிட்டால் உடலில் விந்தணுக்களை உற்பத்தி செய்ய தேவையான சத்துக்கள் கிடைக்காமல், விந்தணு குறைபாட்டை ஏற்படுத்திவிடும்.

போதிய தூக்கம் இல்லாதது

தினமும் போதிய தூக்கம் இல்லாவிட்டால், உடலானது ஆற்றலின்றி சோர்ந்துவிடும். இவ்வாறு உடல் சோர்வடைந்தால், விந்தணுக்கள் செயல்படுவதற்கு போதிய ஆற்றல் இல்லாமல், அதன் சக்தி குறைந்துவிடும். இதனால் கருவுறுதலில் பிரச்சனை ஏற்படும்.

இறுக்கமாக உள்ளாடை அணிவது

உள்ளாடையை இறுக்கமாக அணிந்தால், விந்தணுக்களின் வளர்ச்சி மற்றும் செயல்பாடு தடைப்படும். எனவே எப்போதும் தளர்வான ஆடைகளை அணிய வேண்டும்.

மொபைலை பாக்கெட்டில் வைப்பது

நிறைய ஆண்களுக்கு தங்களது மொபைலை பேண்ட் பாக்கெட்டில் வைக்கும் பழக்கம் இருக்கும். இவ்வாறு வைக்கும் போது, மொபைலில் இருந்து வெளிவரும் கதிர்வீச்சு மற்றும் அதிர்வு, விதைப்பைக்கு பெரும் பாதிப்பை ஏற்படுத்தும். இதனால் விந்தணுவின் உற்பத்தியும் தடைபடும்.

நோய்த்தொற்றுகள் இருப்பது

உடலில் ஏற்படும் நோய்த்தொற்றுகளாலும் விந்தணுவின் உற்பத்திக்கு பாதிப்பு ஏற்படும். அதிலும் வைரஸ் நோய்த்தொற்றுகளான டெங்கு, சின்னம்மை போன்றவற்றாலும் விந்தணுவின் உற்பத்தி பாதிக்கப்படும்.

ஹார்மோன் ஏற்றத்தாழ்வு

நாளமில்லா சுரப்பிகள் போதிய அளவில் டெஸ்டோஸ்டிரோன் என்னும் ஹார்மோன் உற்பத்தி செய்யாவிட்டால், விந்தணுக் குறைபாடு ஏற்படும்.

லேப்டாப்பை மடியில் வைத்து வேலை செய்வது

பெரும்பாலானோருக்கு லேப்டாப்பை மடியில் வைத்து வேலை செய்யும் பழக்கம் உள்ளது. குறிப்பாக ஆண்களுக்கு உள்ளது. இவ்வாறு நீண்ட நேரம் மடியில் வைத்து வேலை செய்தால், அதிலிருந்து வெளிவரும் வெப்பம் விதைப்பையை வெப்பமடையச் செய்து, விந்தணுக்களை அழிக்கும்.

உடல் பருமன்

உடல் பருமன் என்பது தைராய்டு சுரப்பியானது சரியாக செயல்படாமல், ஹார்மோன் ஏற்றத்தாழ்வுகளை ஏற்படுத்தி, அதனால் உடல் பருமனை உண்டாக்கி, விந்தணுவின் உற்பத்திக்கு தடையை ஏற்படுத்துகிறது.

அளவுக்கு அதிகமாக குடிப்பது

ஆல்கஹாலை அதிகம் பருகினால், ஆண் ஹார்மோனான டெஸ்டோஸ்டிரோனின் அளவு குறைந்து, இறுதியில் விந்தணு குறைபாட்டை ஏற்படுத்திவிடும். சில சமயங்களில் இதனால் ஆண்மை குறைபாடு கூட ஏற்படும் வாய்ப்புள்ளது.

மன அழுத்தத்தால் பாதிக்கப்படுவது

உடலின் ஆரோக்கியத்தை கெடுப்பதில் முதன்மையானது தான் மன அழுத்தம். அத்தகைய மன அழுத்தம் அதிகரித்தால், அது விந்தணுவின் எண்ணிக்கையையும் குறைந்துவிடும்.

நீரிழிவு

நீரிழிவு நோயால் பாதிக்கப்பட்டிருந்தாலும், இரத்தத்தில் உள்ள அதிகப்படியான சர்க்கரையானது, விந்தணுவின் தரத்தைக் குறைத்துவிடும்.

இறுக்கமாக ஜீன்ஸ் அணிவது

ஃபேஷன் என்பதற்காக இறுக்கமாக ஜீன்ஸ் அல்லது பேண்ட் அணிந்தால், அது விந்தணுவின் ஆரோக்கியத்திற்கு மட்டுமின்றி, அதன் உற்பத்திக்கும் பாதிப்பை ஏற்படுத்தும். ஏனெனில் நீண்ட நேரம் இறுக்கமாக அணிவதால், விதைப்பையானது வெப்பமடைந்து, விந்தணுக்கள் அழிந்துவிடும்.

ஸ்டெராய்டுகள் எடுத்துக் கொள்வது

உடலை கட்டமைப்புடன் வைத்துக் கொள்வதற்கு சில ஆண்கள் ஸ்டெராய்டுகளை எடுத்துக் கொள்வார்கள். இவ்வாறு ஸ்டெராய்டுகளை எடுத்துக் கொண்டால், அது இனப்பெருக்க மண்டலத்திற்கு பெரும் தீங்கை விளைவிக்கும். மேலும் ஸ்டெராய்டு விதைப்பையை சுருக்கி, விந்தணுவின் எண்ணிக்கையையும் குறைத்துவிடும்.

அதிகமாக வண்டி ஓட்டுவது

ஆண்களுக்கு பிடித்த பொழுதுபோக்குகளில் ஒன்று தான் வண்டி ஓட்டுவது. ஆனால் தினமும் 3-4 மணிநேரம் தொடர்ச்சியாக வண்டியை ஓட்டினால், அதிலிருந்து வெளிவரும் வெப்பமானது, விதைப்பையை வெப்பமடையச் செய்து விந்தணுவை அழித்துவிடும்.

இதுப்போன்று சுவாரஸ்யமான மற்றும் பயனுள்ள பல தகவல்களைப் பெற எங்கள் ஃபேஸ்புக் பக்கத்தை லைக் செய்து தொடர்பில் இருங்கள்...