பி.சி.ஓ.எஸ் எனப்படும் சினைப்பைக் கட்டிகள் இருப்பதற்கான அறிகுறிகள்!!!

சொற்பமான மாதவிலக்கு அல்லது மாதவிலக்கே ஏற்படாமை:

ஓராண்டிற்கு ஒன்பது மாதவிலக்குகளுக்கும் குறைவாக ஏற்படுதல் (அதாவது ஒரு மாதவிலக்கு சுழற்சிக்கும் அடுத்த மாதவிலக்குச் சுழற்சிக்கும் இடையேயான இடைவெளி 35 நாளுக்கும் அதிகமாக இருத்தல்) அல்லது மாதவிலக்கே ஏற்படாமல் நின்று போதல் ஆகியவை இதில் வகைப்படுத்தப்படும்.

பி.சி.ஓ.எஸ் உள்ள சில பெண்களுக்கு மாதவிலக்கு தவறாமல் உண்டாகும். ஆனால் மாதந்தோறும் சினை உற்பத்தி நடக்காது. அதாவது அவர்களது சினைப்பைகளிலிருந்து மாதந்தோறும் முட்டை வெளிப்படாமல் போகும்.

அதிகப்படியான இரத்தப் போக்கு

ஒழுங்கற்ற மாதவிலக்கு மற்றும் மாதவிலக்கின் போது மிக அதிகமான உதிரப் போக்கு ஏற்படுதல். பி.சி.ஓ.எஸ் உள்ள பெண்களில் 30% பேருக்கு இந்த அறிகுறி உள்ளது.

முடி அதிகமாக உதிர்தல் மற்றும் முளைத்தல்

தலைமுடி மிக அதிகமாக உதிர்தல் மற்றும் முகம், மார்பு, முதுகு, வயிறு மற்றும் கட்டைவிரல்/கால் பெருவிரல்களில் ரோமம் முளைத்தல். அமெரிக்க ஐக்கிய நாடுகளில் பி.சி.ஓ.எஸ் பிரச்சனை உள்ள 70% பெண்களுக்கு ஆண்ட்ரோஜென் அளவு அதிகரிப்பதால் ஏற்படும் இத்தகைய ரோமப் பிரச்சனை உள்ளது எனப் பதிவுகள் உள்ளன.

முகப்பருக்கள் மற்றும் எண்ணெய் பசையுள்ள சருமம்

பி.சி.ஓ.எஸ் பிரச்சனை உள்ள பெண்களின் உடலில் ஆண்ட்ரோஜென் அளவு அதிகரிப்பதால், முகப்பருக்கள் ஏற்படுகின்றன மற்றும் சருமம் எண்ணெய் பசையுள்ளதாக மாறுகிறது.

மனத்தளர்ச்சி மற்றும் மனநிலை மாற்றம்

பி.சி.ஓ.எஸ் பிரச்சனையுடன் வாழும் பெண்களது நல்வாழ்வு, பாலுறவில் நாட்டம், பாலுறவில் திருப்தியடைதல், ஆகியவை பாதிக்கப்பட்டு மொத்தத்தில் அவர்களது வாழ்க்கைத் தரமே பாதிக்கப்படும். இதனால் அவர்கள் மனநிலை பாதிக்கப்பட்டு, மனத்தளர்ச்சி அடையும் நிலை ஏற்படும்.

உடல் எடை அதிகரித்தல்

உடல் எடை அதிகரித்தல், இடுப்பை விட அடிவயிற்றில் அதிக சதை போடுதல். இது உடலில் ஆண்ட்ரோஜென் அளவு அதிகரிப்பதால் ஏற்படலாம்.

தலையில் வழுக்கை

ஆண்களைப் போல் தலையில் வழுக்கை உண்டாதல், தலைமுடி மென்மையாதல். இதுவும் உடலில் ஆண்ட்ரோஜென் அளவு அதிகரிப்பதால் ஏற்படலாம்.

கருச்சிதைவு

இதற்கான காரணம் இதுவரை அறியப்படவில்லை. உடலில் அதிக அளவு இன்சுலின் இருப்பதாலோ, தாமதமான சினைமுட்டை உற்பத்தியாலோ (ovulation), கருமுட்டையின் (egg) தரத்தில் ஏற்பட்டுள்ள பிரச்சனையினாலோ, அல்லது கருமுட்டையானது கருப்பையினுள் பொதிந்திருக்கும் அமைப்பினாலோ கருச்சிதைவு ஏற்படலாம் என நம்பப்படுகிறது.

மலட்டுத்தன்மை

கருவுற முடியாமல் போவதற்கு, சினைப்பைகளிலிருந்து சினைமுட்டையானது வெளிப்படாததனால் இந்த நிலை ஏற்படுகிறது.

அதிகமான இன்சுலின்

இரத்தத்தில் அதிக அளவு இன்சுலின் இருத்தல். ஹைப்பர் இன்சுலினீமியா எனப்படும் அதிக அளவு இன்சுலின் இருக்கும் அறிகுறிகள். உடலின் மேல் பகுதி மட்டும் குண்டாதல், கைகளின் கீழ்ப்பகுதி, கழுத்து, கவடு (இடுப்பும் தொடையும் சேருமிடம்), பிறப்புறுப்புப் பகுதி ஆகியவற்றில் வெல்வெட் போன்ற கருமையான சருமப்படை தோன்றுதல் ஆகியவை அதிக அளவு இன்சுலின் இருப்பதற்கான அறிகுறிகளாகும்.

மூச்சுவிடுவதில் சிரமம்

தூங்கும் போது மூச்சு விடுவதற்கு சிரமப்படும் நிலையானது, அதிகமாகக் குண்டாக இருப்பதினாலோ, அதிக அளவு இன்சுலின் இருப்பதினாலோ ஏற்படலாம்.

அதிக இரத்த அழுத்தம்

பி.சி.ஓ.எஸ் பிரச்சனையுள்ள பெண்களிடையே பொதுவாகக் காணப்படும் அறிகுறிகளுள் ஒன்று அதிக இரத்த அழுத்தம் ஆகும். அதுவும் இப்பெண்கள் இயல்பை விட அதிக எடை கொண்டவர்களாக இருந்துவிட்டால், இது நிச்சயம் ஏற்படும். ஆகவே இந்த பிரச்சனையை அறிய இரத்த அழுத்தத்தினை மருத்துவர் பரிசோதிப்பார்கள்.