ஃபோலிக் அமிலம் ஏன் மிகவும் முக்கியம்? அதன் குறைபாட்டின் எச்சரிக்கை அறிகுறிகள் என்ன? - விளக்கும் டாக்டர்!

Folic Acid Awareness Week: நமது உடல் ஆரோக்கியமாக செயல்பட ஊட்டச்சத்துக்கள் மிகவும் இன்றியமையாதவை. அதில் புரோட்டீன், கார்போஹைட்ரேட், நார்ச்சத்து, நீர்ச்சத்து, தாதுக்கள் மற்றும் வைட்டமின்கள் போன்றவை உடலின் செயல்பாட்டில் முக்கிய பங்கை வகிக்கின்றன. குறிப்பாக வைட்டமின்களை எடுத்துக் கொண்டால், அதில் பல வகைகள் உள்ளன. அவை ஒவ்வொன்றும் ஒவ்வொரு விதத்தில் உடல் செல்களின் செயல்பாட்டிற்கும், வளர்ச்சிக்கும் உதவி புரிகின்றன. அவற்றில் ஒரு வகையான வைட்டமின் தான் ஃபோலிக் அமிலம் (Folic acid).

ஃபோலிக் அமிலம் என்றாலே பெரும்பாலும் கர்ப்பம் பற்றிதான் பேசப்படுகிறது. ஆனால், இது அனைவருக்கும் தேவையான ஒரு முக்கியமான வைட்டமின். இது வைட்டமின் B9-ன் ஒரு வகையாகும். இந்த ஃபோலிக் அமிலம் புதிய செல்களை உருவாக்கவும், சிவப்பு ரத்த அணுக்களை உருவாக்கவும் உடலுக்கு தேவைப்படுகிறது. உடலில் செல்கள் இயல்பாக வளர்வதற்கும், வளர்ச்சியடைவதற்கும் இது முக்கியப் பங்கு வகிக்கிறது. இப்படிப்பட்ட ஃபோலிக் அமிலத்தில் முக்கியத்துவம் குறித்த விழிப்புணர்வை மக்களிடையே ஏற்படுத்த ஒவ்வொரு ஆண்டும் செப்டம்பர் 13 முதல் செப்டம்பர் 19 ஆம் தேதி வரையிலான ஒரு வாரம் ஃபோலிக் அமில விழிப்புணர்வு வாரமாக அனுசரிக்கப்படுகிறது.

இந்த ஃபோலிக் அமில விழிப்புணர்வு வாரத்தை முன்னிட்டு, ஒருவருக்கு ஃபோலிக் அமிலம் ஏன் மிகவும் முக்கியம் மற்றும் அந்த ஃபோலிக் அமில குறைபாட்டின் எச்சரிக்கை அறிகுறிகள் என்னென்ன என்பது குறித்து சென்னையில் உள்ள கிளீனீகிள்ஸ் மருத்துவமனையின் மகப்பேறு மற்றும் மகளிர் மருத்துவத் துறை இயக்குநரான டாக்டர் பத்மபிரியா விவேக் அவர்கள் தமிழ் போல்ட்ஸ்கையுடன் பகிர்ந்து கொண்டார்.

கர்ப்பிணிகளுக்கு ஏன் ஃபோலிக் அமிலம் முக்கியம்?

"கர்ப்ப காலத்தில் ஃபோலிக் அமிலத்திற்கு அதிக முக்கியத்துவம் கொடுக்கப்படுவதற்கு ஒரு முக்கிய காரணம் உள்ளது. குழந்தையின் நரம்புக் குழாய் (Neural tube), பின்னர் மூளை மற்றும் முதுகுத் தண்டுவடமாக (Brain and spinal cord) உருவாகும் அமைப்பு, கர்ப்பத்தின் ஆரம்பத்திலேயே உருவாகத் தொடங்குகிறது. பல நேரங்களில் ஒரு பெண் தான் கர்ப்பமாக இருப்பதை அறியும் முன்பே இந்த வளர்ச்சி தொடங்கிவிடும்.

கர்ப்பம் தரிப்பதற்கு முன்பும், கர்ப்பத்தின் ஆரம்ப காலத்திலும் போதுமான அளவு ஃபோலிக் அமிலம் எடுத்துக்கொள்வது, ஸ்பைனா பிஃபிடா (Spina bifida) போன்ற தீவிரமான நரம்புக் குழாய் குறைபாடுகளின் (Neural tube defects) அபாயத்தைக் குறைக்க உதவும்.

கர்ப்பம் தரிக்கக்கூடிய வயதில் உள்ள பெண்களுக்கு பொதுவாக தினமும் 400 மைக்ரோகிராம் ஃபோலிக் அமிலம் பரிந்துரைக்கப்படுகிறது. இருப்பினும், ஒவ்வொருவரின் உடல்நிலை மற்றும் கர்ப்பம் தொடர்பான அபாயக் காரணிகளைப் பொறுத்து தேவையான அளவு மாறுபடலாம். எனவே, சரியான அளவை மருத்துவரிடம் ஆலோசித்து தெரிந்துகொள்வது முக்கியம். சில பெண்களுக்கு அதிக அளவு ஃபோலிக் அமிலம் தேவைப்படலாம்." என்று டாக்டர் கூறினார்.

ஃபோலேட் குறைபாட்டின் அறிகுறிகள் என்ன?

"ஃபோலேட் (Folate) குறைபாடு இரத்தத்தையும் பாதிக்கலாம். சிவப்பு இரத்த அணுக்கள் இயல்பாக உருவாக ஃபோலேட் தேவைப்படுவதால், அதன் குறைபாடு ஃபோலேட் குறைபாட்டால் ஏற்படும் இரத்த சோகைக்கு (Folate-deficiency anaemia) வழிவகுக்கலாம். இதனால் ஒருவருக்கு படிப்படியாக அதிக சோர்வு, உடல் பலவீனம், ஆற்றல் இல்லாமை, தலைவலி, மூச்சுத்திணறல் அல்லது இதயத் துடிப்பு அதிகமாக உணரப்படுதல் போன்ற அறிகுறிகள் ஏற்படலாம். நாக்கில் வலி அல்லது சிவப்பு நிறம் மற்றும் வாய்ப்புண்கள் போன்றவையும் ஏற்படலாம்.

சிலருக்கு கவனம் செலுத்துவதில், நினைவாற்றலில் அல்லது சிந்திப்பதில் சிரமம் ஏற்படலாம். ஆனால், இந்த அறிகுறிகள் ஃபோலேட் குறைபாட்டிற்கு மட்டும் உரியவை அல்ல. எனவே, இந்த அறிகுறிகளை வைத்து ஒருவர் தானாகவே ஃபோலேட் குறைபாடு இருப்பதாக முடிவு செய்யக்கூடாது. அதற்கான காரணத்தை கண்டறிய பொதுவாக இரத்தப் பரிசோதனை மற்றும் மருத்துவரின் மருத்துவ மதிப்பீடு தேவைப்படும்." என்று டாக்டர் கூறினார்.

ஃபோலேட் அளவை அதிகரிப்பது எப்படி?

"கீரை போன்ற பச்சை இலைக் காய்கறிகள், பீன்ஸ் மற்றும் ஆரஞ்சு போன்ற உணவுகளில் இயற்கையாகவே ஃபோலேட் உள்ளது. சமச்சீரான உணவு முறையை பின்பற்றுவது உடலில் போதுமான ஃபோலேட் அளவை பராமரிக்க உதவும். இருப்பினும், சிலருக்கு அவர்களின் தனிப்பட்ட தேவையைப் பொறுத்து ஃபோலிக் அமில சப்ளிமென்ட்கள் தேவைப்படலாம்.

அதேபோல், மருத்துவரின் ஆலோசனை இல்லாமல் அதிக அளவு ஃபோலிக் அமில சப்ளிமென்ட்களை தானாக எடுத்துக் கொள்ளக்கூடாது. ஃபோலேட் குறைபாடும், வைட்டமின் பி12 குறைபாடும் ஒரே மாதிரியான இரத்தசோகையை ஏற்படுத்தக்கூடும். எனவே, சிகிச்சையைத் தொடங்குவதற்கு முன்பு குறைபாட்டிற்கான உண்மையான காரணத்தை கண்டறிவது முக்கியம்." என்று டாக்டர் கூறினார்.

மொத்தத்தில், ஃபோலிக் அமில விழிப்புணர்வு வாரத்தின் முக்கியமான செய்தி மிகவும் எளிமையானது. ஃபோலிக் அமிலம் கர்ப்ப காலத்தில் மட்டும் தேவையான வைட்டமின் அல்ல. இது உடலில் புதிய செல்கள் உருவாகவும், ஆரோக்கியமான இரத்த அணுக்கள் உருவாகவும் உதவுகிறது. அதே நேரத்தில், கர்ப்பம் தரிப்பதற்கு முன்பும் கர்ப்பத்தின் ஆரம்ப காலத்திலும் போதுமான ஃபோலிக் அமிலத்தை எடுத்துக்கொள்வது, குழந்தைகளுக்கு ஏற்படக்கூடிய சில தீவிரமான பிறவிக் குறைபாடுகளின் அபாயத்தைக் குறைக்க உதவும். தொடர்ந்து சோர்வு, உடல் பலவீனம், மூச்சுத்திணறல் அல்லது அடிக்கடி வாய்ப்புண்கள் போன்ற அறிகுறிகள் இருந்தால், அது வைட்டமின் குறைபாடு தான் என்று தானாக நினைத்துக் கொள்வதைவிட, மருத்துவரை அணுகி சரியான காரணத்தை கண்டறிந்து கொள்வது நல்லது.

Disclaimer: இந்தக் கட்டுரையில் வழங்கப்பட்ட தகவல்கள் பொதுவான தகவல் மற்றும் கல்வி நோக்கங்களுக்காக மட்டுமே, மேலும் இது தொழில்முறை மருத்துவ ஆலோசனை, நோயறிதல் அல்லது சிகிச்சைக்கு மாற்றா பகிரப்படவில்லை. மருத்துவ நிலை குறித்து உங்களுக்கு ஏதேனும் கேள்விகள் இருந்தால் உங்கள் மருத்துவர் அல்லது தகுதிவாய்ந்த சுகாதார வழங்குநரின் ஆலோசனையைப் பெறவும்.