நீங்க உணவில் உப்பு அதிகமா சேர்ப்பீங்களா? இனிமே அப்படி செய்யாதீங்க.. இல்லன்னா கஷ்டப்படுவீங்க..

புற்றுநோயின் அபாயம் குறையும்

ஆய்வுகளில் கூட அதிக உப்பு நிறைந்த உணவுகளை உண்பது வயிற்று புற்றுநோயின் அபாயத்தை அதிகரிப்பதாக தெரிய வந்துள்ளது. ஏனெனில் அதிகப்படியான உப்பானது வயிற்றின் உட்புறச் சுவற்றினை சேதப்படுத்துவதால், வயிற்று புற்றுநோயின் அபாயம் அதிகரிக்கிறது. அதுவே அளவான உப்பை உணவில் சேர்த்து சாப்பிடும் போது, அது வயிற்று புற்றுநோயின் அபாயத்தைக் குறைப்பதோடு, ஒட்டுமொத்த உடல் ஆரோக்கியத்தையும் மேம்படுத்த உதவும்.

கண்களுக்கு நல்லது

ஒருவர் உணவில் உப்பை குறைவாக சேர்த்து சாப்பிடும் போது, உயர் இரத்த அழுத்தத்தின் அபாயம் குறையும். ஒருவரது பார்வையின் ஆரோக்கியம் பாதிக்கப்படுவதற்கு உயர் இரத்த அழுத்தமும் ஓர் முக்கிய காரணம். எப்படியெனில் இரத்த அழுத்தம் அதிகரிக்கும் போது, அது இரத்த நாளங்களை சேதப்படுத்துவதோடு, சில சமயங்களில் பார்வை இழப்பையும் உண்டாக்குகிறது. எனவே கண்கள் ஆரோக்கியமாக இருக்க வேண்டுமானால், உணவில் உப்பை குறைத்துக் கொள்ளுங்கள்.

இரத்த அழுத்தம் சீராகும்

அதிகப்படியான உப்பு/சோடியம் நிறைந்த உணவுகள் இரத்த அழுத்தத்தை சட்டென்று அதிகரிக்கும். இரத்த அழுத்தம் அதிகமானால், அது இரத்த குழாய்கள் மற்றும் இதயத்தை மோசமாக பாதித்து, இதய நோயின் அபாயத்தை அதிகரிக்கும். எனவே உப்பு குறைவான உணவுகளை உண்ணும் போது, அது இரத்த அழுத்தத்தை சீராக வைத்துக் கொள்ள உதவுவதோடு, இதயமும் ஆரோக்கியமாக இருக்கும்.

சிறுநீரக நோய்கள் தடுக்கப்படும்

உடலில் உள்ள கழிவுகளை வெளியேற்றும் பணியை செய்யும் முக்கியமான உறுப்பு தான் சிறுநீரகம். இந்த சிறுநீரகம் ஆரோக்கியமாக இருந்தால் தான், உடலில் உள்ள நச்சுக்களை திறம்பட வெளியேற்ற முடியும். ஆனால் உப்புள்ள உணவுகளை அதிகம் உட்கொண்டால், அது இரத்தத்தில் சோடியத்தின் அளவை அதிகரித்து, சிறுநீரகங்களுக்கு அதிக அழுத்தத்தைக் கொடுத்து, சேதத்தை ஏற்படுத்தும். அதுவே ஆரம்பத்தில் இருந்தே உணவில் உப்பை அளவாக சேர்த்து உட்கொண்டு வந்தால், இம்மாதிரியான பிரச்சனையைத் தவிர்க்கலாம்.

எலக்ட்ரோலைட் சமநிலையில் இருக்கும்

உப்பு குறைவான உணவுகளாது உடலில் எலக்ட்ரோலைட்டுக்களை சமநிலையில் பராமரிக்க உதவுகிறது. மேலும் இது உடலின் pH அளவை சமநிலையில் பராமரிக்க உதவி புரிந்து, தசைகளின் செயல்பாட்டை மேம்படுத்துகிறது மற்றும் அடிக்கடி தசைப்பிடிப்புகள் ஏற்படாமலும் தடுக்கிறது.

ஒரு நாளைக்கு எவ்வளவு உப்பு உட்கொள்ளலாம்?

உலக சுகாதார அமைப்பானது ஒரு நாளைக்கு பெரியவர்கள் 5 கிராம் அல்லது ஒரு டீஸ்பூனுக்கும் குறைவான அளவிலேயே உப்பை உட்கொள்ள பரிந்துரைக்கிறது. அதுவும் 2 முதல் 15 வயதிற்குட்பட்ட குழந்தைகளுக்கு பெரியவர்களை விட குறைவான அளவில் உப்பை சேர்க்க உலக சுகாதார அமைப்பு பரிந்துரைக்கிறது. இருப்பினும் குழந்தைகளின் ஆற்றல் தேவைகளுக்கு ஏற்ப உட்கொள்ளும் உப்பின் அளவில் மாற்றம் ஏற்படலாம்.

எனவே நண்பர்களே! நீங்க ஆரோக்கியமாக நீண்ட நாட்கள் வாழ ஆசைப்பட்டால், முதலில் உங்கள் உணவில் உப்பை அதிகம் சேர்ப்பதைத் தவிர்த்திடுங்கள். 'அளவான உப்பே ஆரோக்கியம்' என்பதை நினைவில் கொள்ளுங்கள்.