இந்த 5 உணவுகள் உங்கள் உடலில் துர்நாற்றத்தை ஏற்படுத்தி சங்கடமாக உணர வைக்குமாம் - பார்த்து சாப்பிடுங்க

நம்முடைய தோற்றம் மட்டுமல்ல நம்முடைய வாசனையும் நம்முடைய ஆளுமையையும், வசீகரத்தையும் மேம்படுத்த அவசியமானதாகும், அதனால்தான் பெரும்பாலான மக்கள் விலையுயர்ந்த வாசனை திரவியங்களை பயன்படுத்துகின்றனர். நம்முடைய வாசனைதான் நம்மை மற்றவர்களிடமிருந்து தனித்துவமானவர்களாக காட்டுகிறது.

நீங்கள் எவ்வளவு விலை அதிகமான வாசனை திரவியத்தை பயன்படுத்தினாலும், உங்களிடமிருந்து வெளிப்படும் நறுமணமானது, உங்களுக்கே உரித்தான தனித்துவமான 'இயற்கை நறுமணப் பண்புகளாலும்' பாதிக்கப்படுகிறது என்பது உங்களுக்குத் தெரியுமா? உண்மைதான், கைரேகைகளைப் போலவே, ஒவ்வொரு மனிதருக்கும் அவர்களின் மரபணுக்கள், ஹார்மோன்கள், ஆரோக்கியம் மற்றும் சுகாதாரம் ஆகியவற்றால் உருவாகும் ஒரு வாசனை உண்டு.

இதில் பல விஷயங்கள் நம் கட்டுப்பாட்டில் இல்லாமல் இருக்கலாம், ஆனால் நாம் உண்ணும் உணவின் மூலம் நம்முடைய ஆரோக்கியத்தை நம்மால் நிர்வகிக்க முடியும். நாம் உண்ணும் உணவு இரண்டு வழிகளில் உடல் துர்நாற்றத்தைப் பாதிக்கிறது, அவை குடல் மற்றும் தோல். குடலில், உணவு இரசாயனங்களுக்கும் பாக்டீரியாக்களுக்கும் இடையே நிகழும் சில இடைவினைகள் வாயுக்களை வெளியிடுகின்றன, அவை வாய் துர்நாற்றத்தை ஏற்படுத்தக்கூடும்.

அதேபோல தோலில், உணவில் உள்ள சில இரசாயனக் கூறுகள் வியர்வை மூலம் தோலின் வழியே வெளியேறி, அதில் உள்ள பாக்டீரியாக்களுடன் வினைபுரிந்து ஒரு வாசனையை உருவாக்குகின்றன. இவ்வாறு, நீங்கள் உண்ணும் உணவு உங்கள் தனிப்பட்ட வாசனையில் முக்கியப்பங்கு வகிக்கிறது. சில உணவுகளை தொடர்ச்சியாக உட்கொள்வதன் மூலம் உங்களின் இயற்கை நறுமணத்தை மாற்றியமைத்து உங்களின் வசீகரத்தை அதிகரிக்கக்கூடும். இந்த பதிவில் எந்தெந்த உணவுகள் உங்கள் உடலில் துர்நாற்றம் ஏற்படாமல் பாதுகாக்கும் என்று தெரிந்து கொள்ளலாம்.

சில காய்கறிகள்

ப்ரோக்கோலி, முட்டைக்கோஸ், பிரஸ்ஸல்ஸ் ஸ்ப்ரௌட்ஸ் மற்றும் காலிஃபிளவர் போன்ற குறிப்பிட்ட காய்கறிகளில் சல்பர் சேர்மங்கள் நிறைந்துள்ளன. இவை இரத்த ஓட்டத்தில் கலந்து, சருமத்தில் உள்ள பாக்டீரியாக்களுடன் வினைபுரியும்போது, ​​வியர்வையை ஒரு கடுமையான துர்நாற்றமாக மாற்றக்கூடும் என்று ஊட்டச்சத்து நிபுணர்கள் கூறுகிறார்கள்.

பூண்டு மற்றும் வெங்காயம்

பூண்டு மற்றும் வெங்காயம் போன்ற உணவுகள் அல்லியம் குடும்பத்தைச் சேர்ந்தவை. இவை மனித உடலில் செரிமானம் அடையும்போது, ​​டயலில் டைசல்பைட் மற்றும் அல்லில் மெத்தில் சல்பைட் போன்ற சேர்மங்களாகச் சிதைந்து, சாப்பிட்ட பிறகு பல மணி நேரம் உடலால் வெளியேற்றப்படுகின்றன. இதனால் அவை இயற்கையாகவே உடலை துர்நாற்றமடையச் செய்கின்றன.

மீன்

மிகவும் வீரியமான துர்நாற்றத்தை ஏற்படுத்தும் சேர்மமான ட்ரைமெதிலமைன் நிறைந்துள்ளதால், மீன்களும் கடுமையான உடல் துர்நாற்றத்தை ஏற்படுத்தக்கூடும். அவற்றில் உள்ள விலங்குப் புரதத்தை உடல் அமினோ அமிலங்கள் மற்றும் கொழுப்புகளாக உடைத்து, வியர்வை மூலம் வெளியேற்றுகிறது. மேலும் ட்ரைமெதிலமைனூரியா அல்லது மீன் துர்நாற்ற நோய்க்குறி எனப்படும் ஒரு நிலையும் இதனால் ஏற்படலாம்.

ஆல்கஹால்

மதுவை தொடர்ந்து அருந்தி வரும்போது, ​​இரைப்பை குடல் மண்டலம் மற்றும் வியர்வைச் சுரப்பிகளிலிருந்து துர்நாற்றம் ஏற்படக்கூடும். கல்லீரலில் மதுவைச் சிதைத்துச் செயலாக்கும்போது, ​​உடல் 'அசிட்டால்டிஹைட்' எனப்படும் நச்சுத்தன்மை வாய்ந்த மற்றும் எளிதில் ஆவியாகக்கூடிய ஒரு சேர்மத்தை வெளியிடுகிறது, இது அழுகிய தேங்காயின் நறுமணம் போன்றது. ஆய்வுகள், தினமும் மது அருந்துபவர்களே வாய் துர்நாற்றம் குறித்த புகார்களை அதிகம் தெரிவிப்பவர்களாக இருப்பதைக் கண்டறிந்துள்ளது.

காஃபின்

காஃபின் மூலக்கூறுகள் வியர்வை மூலம் துர்நாற்றத்தை ஏற்படுத்தும் என்று ஆய்வுகள் கூறுகிறது. தேநீர், காபி மற்றும் பிற பானங்களில் இடம்பெற்றுள்ள காஃபின், அக்குள்கள் மற்றும் இடுப்புப் பகுதி போன்ற இடங்களில் வியர்வையைச் சுரக்கும் உடலின் 'அப்போக்ரைன்' சுரப்பிகளைத் தூண்டுகிறது. வியர்வையின் அளவு அதிகரிக்கும்போது, ​​அதில் அதிக எண்ணிக்கையிலான பாக்டீரியாக்கள் பெருகி, அதன் விளைவாகக் கடுமையான உடல் துர்நாற்றம் ஏற்படுகிறது.