ஆண்களுக்கான சிறந்த ஃபேஸ் பேக்குகள்!!!

புதினா

உடலை புத்துணர்ச்சியுடன் வைப்பதில் புதினா முக்கிய பங்கு வகிக்கிறது. அதிலும் அதனை கொண்டு மாஸ்க் போட்டால், புத்துணர்ச்சியுடன், பொலிவும் கிடைக்கும். அதற்கு சிறிது புதினா இலைகளுடன், மஞ்சள் தூள் சேர்த்து அரைத்து, முகத்தில் தடவி, 10-15 நிமிடம் ஊற வைத்து, வெதுவெதுப்பான நீரில் கழுவ வேண்டும்.

பால்

ஒரு இயற்கையான ஃபேஸ் பேக் என்று சொன்னால் அது பால் தான். இதனை சருமத்திற்கு பயன்படுத்தினால், சருமத்துளைகளில் உள்ள அழுக்குகள் மற்றும் இறந்த செல்கள் நீங்கி, சருமம் அழகாக காணப்படும். எனவே பாலை ஒரு பஞ்சில் நனைத்து முகத்தில் தேய்த்து, 10-15 நிமிடம் ஊற வைத்து, பின் குளிர்ந்த நீரில் கழுவ வேண்டும்.

வாழைப்பழம்

வாழைப்பழத்தை மசித்து, அத்துடன் ரோஸ் வாட்டர், ஆலிவ் ஆயில் மற்றும் சிறிது கொக்கோ வெண்ணெய் சேர்த்து கலந்து, முகத்தில் தடவி ஊற வைத்து, கழுவினால், சருமத்தில் உள்ள பருக்கள் மற்றும் பிம்பிள்கள் நீங்குவதோடு, மறைந்திருக்கும் அழுக்குகள் நீங்கி, முகம் பொலிவோடு மின்னும்.

பப்பாளி

பப்பாளியுடன் எலுமிச்சை சாறு மற்றும் பால் சேர்த்து நன்கு கலந்து, அதனை முகத்தில் தேய்த்து ஊற வைத்து நீரில் அலசினால், சருமத்தில் வெயிலின் தாக்கத்தினால் இறந்த செல்கள் அனைத்தும் வெளியேறி, முகம் பளிச்சென்று காணப்படும்.

வெள்ளரிக்காய்

நீர்ச்சத்து அதிகம் நிரம்பிய வெள்ளரிக்காயை வைத்தும் மாஸ்க் போடலாம். அதிலும் இந்த மாஸ்க்கை கோடையில் போட்டால், சருமம் குளிர்ச்சியுடன், சோர்வின்றி காணப்படும். அதற்கு வெள்ளரிக்காயை அரைத்து, அதில் சிறிது எலுமிச்சை சாறு சேர்த்து, முகத்தில் தடவி சிறிது நேரம் ஊற வைத்து, பின் குளிர்ந்த நீரில் கழுவ வேண்டும்.

களிமண் மாஸ்க்

களிமண் மாஸ்க் ஒரு வித்தியாசமான, ஆனால் நல்ல பலனைத் தரும் ஃபேஸ் மாஸ்க்குகளில் ஒன்று. இந்த மாஸ்க்கிற்கு தேவையான களிமண் மூலிகை கடைகளில் கிடைக்கும். ஆகவே அதனை வாங்கி, அதோடு ரோஸ் வாட்டர் மற்றும் சந்தனப் பொடி சேர்த்து கலந்து, முகத்தில் தடவி 20 நிமிடம் ஊற வைத்து கழுவினால், களிமண் சருமத்துளைகளில் உள்ள அழுக்குகளை உறிஞ்சி வெளியேற்றி, முகத்திற்கு பொலிவைத் தரும்.