உதடு ரொம்ப வறண்டு போகுதா? அப்ப நைட் டைம்-ல இந்த லிப் மாஸ்க் போடுங்க..

லிப் மாஸ்க் #1

ஒரு பௌலில் சர்க்கரையை எடுத்து, அதில் தேன் சேர்த்து கலந்து கொள்ள வேண்டும். பின் அதை உதடுகளில் தடவி, இரவு முழுவதும் ஊற வைத்து, மறுநாள் காலையில் எழுந்ததும், வெதுவெதுப்பான நீரால் உதடுகளை மென்மையாக தேய்த்துக் கழுவ வேண்டும். இப்படி செய்வதன் மூலம், உதடுகளில் உள்ள இறந்த செல்கள் நீங்குவதோடு, உதடுகளும் வறட்சியடையாமல் ஈரப்பதத்துடன் இருக்கும்.

லிப் மாஸ்க் #2

உங்கள் வீட்டில் ஸ்ட்ராபெர்ரி அல்லது கிவி இருந்தால், அதை மசித்துக் கொள்ள வேண்டும். பின் அதில் சில துளிகள் வைட்டமின் ஈ எண்ணெய் சேர்த்து கலந்து கொள்ள வேண்டும். பின்பு அதில் சிறிது காபித் தூள் சேர்த்து கலந்து கொள்ள வேண்டும். பிறகு அந்த கலவையை இரவு தூங்கும் முன் உதடுகளில் தடவி இரவு முழுவதும் ஊற வைத்து, மறுநாள் காலையில் வெதுவெதுப்பான நீரால் கழுவ வேண்டும். இதன் மூலம், உதடுகளில் உள்ள இறந்த செல்கள் நீக்கப்படுவதோடு, உதடுகள் ஈரப்பதமாகவும், மென்மையாகவும் இருக்கும்.

லிப் மாஸ்க் #3

ஒரு பௌலில் 1 டேபிள் ஸ்பூன் நாட்டுச் சர்க்கரை, 1 டேபிள் ஸ்பூன் தேன் மற்றும் 5-6 துளிகள் லாவெண்டர் எண்ணெய் சேர்த்து கலந்து கொள்ள வேண்டும். பின் அதை உதடுகளில் தடவி 2-3 நிமிடம் மென்மையாக ஸ்கரப் செய்ய வேண்டும். பின் உதடுகளை வெதுவெதுப்பான நீரால் கழுவிய பின், உதடுகளுக்கு லிப் பாம் பயன்படுத்த வேண்டும்.

லிப் மாஸ்க் #4

ஒரு பௌலில் 2 டேபிள் ஸ்பூன் நாட்டு சர்க்கரை, 1 டேபிள் ஸ்பூன் கொக்கோ பவுடர், 1 டீஸ்பூன் வென்னிலா எசன்ஸ், 2 டீஸ்பூன் ஆலிவ் ஆயில் மற்றும் 3/4 டீஸ்பூன் தேன் சேர்த்து நன்கு கலந்து பேஸ்ட் செய்து கொள்ள வேண்டும். பின் அதை உதடுகளில் தடவி மென்மையாக சிறிது நேரம் மசாஜ் செய்து, 5 நிமிடம் நன்கு ஊற வைத்து, பின் வெதுவெதுப்பான நீரால் உதடுகளை கழுவ வேண்டும். இப்படி இரவு தூங்கும் முன் செய்தால், உதடுகளில் ஏற்படும் வறட்சி நீங்கும்.

லிப் மாஸ்க் #5

முதலில் பாதி கிவி பழத்தை எடுத்து பிளெண்டரில் போட்டு, அத்துடன் 1 ஸ்ட்ராபெர்ரி பழத்தை போட்டு நன்கு மென்மையாக அரைத்துக் கொள்ள வேண்டும். பின் அதை ஒரு பௌலில் எடுத்துக் கொண்டு, அதில் 6 டேபிள் ஸ்பூன் சர்க்கரை மற்றும் 2 டேபிள் ஸ்பூன் ஆலிவ் ஆயில் சேர்த்து கலந்து கொள்ள வேண்டும். பின்பு அதை உதடுகளில் தடவி மென்மையாக மசாஜ் செய்து, 1 நிமிடம் ஊற வைத்து, பின் வெதுவெதுப்பான நீரால் கழுவ வேண்டும். இந்த லிப் மாஸ்க்கை வாரத்திற்கு 3-4 முறை போட, உதடுகள் மென்மையாகவும், வறட்சியின்றியும் இருக்கும்.

லிப் மாஸ்க் #6

உதடுகள் அதிகம் வறட்சியடைகிறதா? அப்படியானால் 2 டீஸ்பூன் மசித்த அவகேடோ பழத்துடன் 1 டீஸ்பூன் தேன் சேர்த்து கலந்து கொள்ள வேண்டும். பின் அதை உதடுகளில் தடவி 20 நிமிடம் ஊற வைத்து, பின் வெதுவெதுப்பான நீரால் கழுவ வேண்டும். இப்படி செய்வதன் மூலம், உதட்டு வறட்சி நீங்கும்.