1 கப் வெள்ளை பட்டாணி இருந்தா இந்த பஞ்சாபி வடானா மசாலாவை செஞ்சு பாருங்க - சப்பாத்தி. பூரிக்கு செமையா இருக்கும்

White Pattani Masala Recipe in Tamil: உங்கள் வீட்டில் அடிக்கடி சப்பாத்தி, பூரி செய்வீர்களா? சப்பாத்தி, பூரிக்கு புதுசா என்ன சைடிஷ் செய்யலாம் என்று யோசித்துக் கொண்டிருக்கிறீர்களா? உங்கள் வீட்டில் வெள்ளை பட்டாணி உள்ளதா? அப்படியானால் அந்த பட்டாணியைக் கொண்டு சூப்பரான ஒரு பட்டாணி கிரேவியை செய்யலாம். இந்த பஞ்சாபி ஸ்டைல் குருமாவிற்கு பெயர் வடானா மசாலா ஆகும். இந்த வெள்ளை பட்டாணி மசாலா சப்பாத்தி, பூரிக்கு மட்டுமின்றி தோசை மற்றும் சாதத்துடன் சாப்பிடவும் அருமையாக இருக்கும். அனைத்திற்கும் மேல் இந்த கிரேவி செய்வது மிகவும் சுலபம்.

பட்டாணி புரோட்டின் நிறைந்ததாக இருப்பதால் இது உடலைக் குறைக்க விரும்புபவர்களுக்கும் ஏற்றதாக இருக்கும். இந்த பட்டாணி கிரேவி பெரியவர்கள் முதல் குழந்தைகள் வரை விரும்பி சாப்பிடும் படி அருமையான சுவையில் இருக்கும்.

உங்களுக்கு வெள்ளை பட்டாணி வடானா மசாலாவை எப்படி செய்வதென்று தெரிந்து கொள்ள வேண்டுமா? கீழே வெள்ளை பட்டாணி உருளைக்கிழங்கு குருமா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 1 கப் வெள்ளை பட்டாணி
- 1 வேகவைத்த உருளைக்கிழங்கு (தோல் நீக்கி நறுக்கியது)

தாளிக்க:

- 2 ஸ்பூன் கடலை எண்ணெய்
- 1 ஸ்பூன் சீரகம்
- 1 ஸ்பூன் சோம்பு
- 1 துண்டு பட்டை
- 1 பிரிஞ்சி இலை

மசாலா செய்ய:

- 1 நறுக்கிய பெரிய வெங்காயம் (தோல் நீக்கி பொடியாக நறுக்கியது)
- 2 நறுக்கிய பச்சை மிளகாய்
- 2 ஸ்பூன் இஞ்சி-பூண்டு விழுது
- 3 அரைத்த தக்காளி
- 1 ஸ்பூன் காஷ்மீரி மிளகாய் தூள்
- 1 ஸ்பூன் சீரகத் தூள்
- 1 ஸ்பூன் கரம் மசாலா தூள்
- 1 ஸ்பூன் மஞ்சள் தூள்
- தேவையான அளவு தண்ணீர்
-1 ஸ்பூன் சர்க்கரை
- தேவையான அளவு உப்பு
- 4 ஸ்பூன் நறுக்கிய கொத்தமல்லி இலைகள்

செய்முறை:

- வெள்ளை பட்டாணியைக் கழுவி, இரவு முழுவதும் ஊறவைக்கவும். பின்னர் அதை ஒரு பிரஷர் குக்கரில் போட்டு, பட்டாணி முழுமையாக மூழ்கும் அளவிற்குத் தண்ணீர் ஊற்றி, 4 விசில் வரும் வரை வேகவைக்கவும்.

- குக்கரை அணைத்துவிட்டு, அதிலுள்ள அழுத்தம் தானாகவே அடங்கும் வரை காத்திருக்கவும். இந்த மசாலாக்கு பட்டாணி குழைவாக இருக்க வேண்டும். அதைத் தனியாக எடுத்து வைக்கவும். அதே நேரத்தில், உருளைக்கிழங்கையும் வேகவைத்துக்கொள்ளவும்.

- ஒரு பாத்திரத்தில் எண்ணெயைச் சூடாக்கி, தாளிப்பதற்குரிய முழு மசாலாப் பொருட்களை ஒவ்வொன்றாக சேர்க்கவும். அவற்றின் மணம் வெளிப்படும் வகையில் ஒரு நிமிடம் எண்ணெயில் வதங்க விடவும்.

- மசாலாப் பொருட்களுடன் வெங்காயம் மற்றும் பச்சை மிளகாயைச் சேர்த்து, வெங்காயம் பொன்னிறமாகும் வரை வதக்கவும்.

- இஞ்சி-பூண்டு விழுது சேர்த்து, அதன் பச்சை வாசனை போகும் வரை வதக்கவும். பின்னர் அரைத்த தக்காளி விழுதைச் சேர்த்து, எண்ணெய் பிரிந்து வரும் வரை சமைக்கவும்.

- பின்னர் உப்பு, சர்க்கரை மற்றும் மசாலாப் பொடிகளை ஒவ்வொன்றாக சேர்த்து நன்றாகக் கலக்கவும். தண்ணீர் ஊற்றி, மசாலாக்களின் பச்சை வாசனை நீங்கி, கலவையிலிருந்து எண்ணெய் பிரிந்து வரும் வரை சமைக்கவும்.

- பின்னர் வேகவைத்த பட்டாணி மற்றும் உருளைக்கிழங்கை குழம்பில் சேர்த்து நன்றாகக் கலக்கவும்.

- தேவைக்கேற்ப கூடுதல் தண்ணீர் சேர்த்து, 5 முதல் 10 நிமிடங்கள் வரை மிதமான தீயில் கொதிக்கவிடவும்.

- இறுதியாக நறுக்கிய கொத்தமல்லி இலைகளைச் சேர்த்து நன்றாகக் கலந்து இட்லி அல்லது பூரியுடன் பரிமாறவும்.