வாழைக்காய் மிளகு வறுவல் ரெசிபி...ஒரு தடவ செஞ்சு பாருங்க... எல்லா சாப்பாட்டுக்கும் சூப்பரா இருக்கும்...!

Valakkai Milagu Varuval Recipe in Tamil: மதியம் என்ன குழம்பு செய்யலாம் என்று யோசிப்பதை விட மிகவும் கடுமையானது அதற்கு என்ன சைடிஷ் செய்வது என்பதுதான். ஏனெனில் மதிய உணவில் குழம்பை விட முக்கியத்துவம் வாய்ந்தது அதற்கான சைடிஷ்தான். அனைத்து காய்கறிகளும் சாம்பாருக்கும், ரசத்துக்கும் சரியான சைடிஷாக இருக்காது. ஆனால் அனைத்து வகை குழம்புகளுக்கும் சூப்பராக இருக்கும் ஒரு காய்தான் வாழைக்காய், குறிப்பாக இது தயிர் சாதத்துக்கும் சிறந்த சைடிஷாக இருக்கும்.

வாழைக்காய் குழம்புக்கான காய்கறி மட்டுமல்ல, பொரியலுக்கும் பொருத்தமான காயாக இருக்கும். பொதுவாக வாழைக்காயை வேகவைத்து பொரியல் செய்வார்கள், ஆனால் வாழைக்காயுடன் மிளகு சேர்த்து பொரியல் செய்யும்போது அது அந்த பொரியலுக்கு தனித்துவமான சுவையைக் கொடுக்கும். இந்த வாழைக்காய் மிளகு வறுவல் சாம்பார் சாதத்துக்கு மட்டுமின்றி அனைத்து உணவுகளுக்கும் சூப்பரான சைடிஷாக இருக்கும் இந்த வாழைக்காய் மிளகு வறுவலை எப்படி செய்யலாம் என்று இந்த பதிவில் தெரிந்து கொள்ளலாம்.

தேவையானப் பொருட்கள்:

- 1 பெரிய வாழைக்காய்
- 1 ஸ்பூன் மிளகுத்தூள்
- கால் ஸ்பூன் மஞ்சள்
- கால் கப் துருவிய தேங்காய்
- 2 ஸ்பூன் எண்ணெய்
- அரை ஸ்பூன் கடுகு
- 1 ஸ்பூன் உளுந்தம் பருப்பு
- அரை ஸ்பூன் சீரகம்
- 2 பச்சை மிளகாய்
- நறுக்கிய பெரிய வெங்காயம் - 1
- உப்பு தேவையான அளவு

செய்முறை:

- வாழைக்காயின் மேல் பகுதி மற்றும் கீழ் பகுதியை வெட்டி விடவும்,

- தோலை கவனமாக நறுக்கி எறிந்து விட்டு, சிறிய க்யூப்களாக வெட்டவும்.

- வீட்டில் அரிசி கழுவிய நீர் இருந்தால் அதில் வாழைக்காயை ஊற வைக்கவும், இல்லாவிட்டால் சாதாரண தண்ணீரே போதுமானது.

- தண்ணீரை கொதிக்க வைத்து அதில் உப்பு, மஞ்சள் மற்றும் க்யூப் செய்யப்பட்ட வாழைக்காயை சேர்த்து வேக வைக்கவும்.

- வாழைக்காய் நன்கு வெந்த பிறகு வரை தண்ணீரிலிருந்து வடிகட்டவும்.

- ஒரு கடாயில் எண்ணெய் ஊற்றி சூடாக்கவும். கடுகு, உளுத்தம்பருப்பு மற்றும் சீரகம் சேர்த்து தாளித்து நன்கு கலக்கவும்.

- பின்னர் நறுக்கிய பச்சை மிளகாயை சேர்த்து தாளிக்கவும்.

- பின்னர் நறுக்கிய வெங்காயத்தை சேர்த்து பொன்னிறமாகும் வரை வதக்கவும்.

- வெங்காயம் நன்கு வதங்கியதும் அதில் வேக வைத்த வாழைக்காய் சேர்த்து நன்கு கிளறவும்.

- வாழைக்காய் முக்கால்வாசி வெந்ததும் அதில் மிளகுத்தூள் சேர்த்து நன்கு கிளறவும்.

- இறுதியாக வாழைக்காயை இறக்கும் போது துருவிய தேங்காயை சேர்த்து அடுப்பை அணைக்கவும்.]

- சூப்பரான வாழைக்காய் மிளகு வறுவல் ரெடி!

- மிளகை நன்றாகப் பொடி செய்யாமல், நசுக்கிப் பயன்படுத்தவும். மிளகுதான் இந்த பொரியலின் முக்கியமான பொருள் என்பதால், அப்போதைக்கு நசுக்கிப் பயன்படுத்தவும்.

- ஒருவேளை உங்களுக்கு தேங்காய் பிடிக்கவில்லை என்றால், நீங்கள் அதைத் தவிர்க்கலாம். ஆனால் கடைசி கட்டத்தில் 2 டீஸ்பூன் கூடுதலாக தேங்காய் எண்ணெயைப் பயன்படுத்துங்கள்.