1 கப் சுண்டல் இருந்தா செட்டிநாடு ஸ்டைலில் இந்த மாதிரி சுக்கா செய்யுங்க - தோசை, சப்பாத்திக்கு சூப்பரா இருக்கும்

Sundal Sukka Recipe in Tamil: சுக்கா என்றாலே அனைவருக்கும் முதலில் நினைவிற்கு வருவது மட்டன் சுக்கா அல்லது சிக்கன் சுக்காதான். அதேசமயம் சில காய்கறிகளை வைத்து சைவ சுக்காவும் செய்யலாம். ஆனால் சுண்டலை வைத்து சுக்கா சமைத்து இருக்கிறீர்களா? பொதுவாக சுக்கா செய்தாலே அது சாதம், சப்பாத்தி, தோசை என அனைத்திற்கும் பக்காவான சைடிஷாக இருக்கும். இந்த சுண்டல் சுக்காவும் அதற்கு விதிவிலக்கல்ல.

இந்த சுண்டல் சுக்கா சுவையானது மட்டுமல்ல மிகவும் ஆரோக்கியமானதும் கூட. இந்த ஸ்டைலில் சுண்டலை செய்து கொடுத்தால் குழந்தைகள் கூட விரும்பி சாப்பிடுவார்கள். உங்களுக்கு செட்டிநாடு சுண்டல் சுக்காவை எப்படி செய்வதென்று தெரிந்து கொள்ள வேண்டுமா? கீழே சுண்டல் சுக்கா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

குக்கரில் வேக வைக்க:

- 1 கப் கொண்டைக்கடலை
- தேவையான அளவு தண்ணீர்
- அரை ஸ்பூன் மஞ்சள் தூள்
- தேவையான அளவு உப்பு
- 1 டீஸ்பூன் கரம் மசாலா

வறுத்து அரைக்க:

- 1 டீஸ்பூன் சோம்பு
- 5 கிராம்பு
- 1 ஸ்பூன் மல்லி விதை
- 1/2 டீஸ்பூன் மிளகு
- 1/2 டீஸ்பூன் சீரகம்
- 1 இன்ச் பட்டை
- 3 ஸ்பூன் தேங்காய்

தாளிக்க:

- 1 ஸ்பூன் கடலை எண்ணெய்
- 1/2 டீஸ்பூன் சோம்பு
- கறிவேப்பிலை
- 1 1/2 கப் வெங்காயம்
- 1 மேசைக்கரண்டி இஞ்சி பூண்டு விழுது
- அரை கப் தண்ணீர்
- 1 மேசைக்கரண்டி கெட்டித் தயிர்
- தேவையான அளவு உப்பு
- 1/2 ஸ்பூன் காஷ்மீரி மிளகாய் தூள்
- எலுமிச்சை சாறு - ஸ்பூன்

செய்முறை:

- முதலில் சுண்டலை நன்றாகக் கழுவி இரவு முழுவதும் ஊறவைக்கவும்.

- சமைப்பதற்கு முன் நன்றாக கழுவி தண்ணீர், மஞ்சள் தூள், உப்பு மற்றும் கரம் மசாலா சேர்த்து, குக்கரில் 6 விசில் வரும் வரை வேகவைக்கவும்.

- ஒரு கடாயை சூடாக்கி அதில் வறுத்து அரைக்க வேண்டிய பொருட்களை ஒவ்வொன்றாக சேர்த்து எண்ணெய் சேர்க்காமல் வறுக்கவும்.

- மசாலா பொருட்கள் வாசனை வந்ததும் அடுப்பை அணைத்து துருவிய தேங்காய் சேர்த்து கிளறி ஆற வைக்கவும்.

- இந்த கலவை ஆறியதும் கொரகொரப்பான பொடியாக அரைத்துக் கொள்ளவும்.

- ஒரு அடி கனமான, அகலமான வாணலியில் எண்ணெயை ஊற்றிச் சூடாக்கவும்.
️
- எண்ணெய் காய்ந்ததும் சோம்பு சேர்த்து அதை பொரிய விடவும்.

- ️அதனுடன் கறிவேப்பிலை, இஞ்சி-பூண்டு விழுது மற்றும் வெங்காயம் சேர்த்து, வெங்காயம் பொன்னிறமாக மாறும் வரை வதக்கவும்.

- வெங்காயம் வதங்கியதும் வேகவைத்த கொண்டைக்கடலை, நன்கு கலக்கிய தயிர், உப்பு மற்றும் காஷ்மீரி மிளகாய் தூள் ஆகியவற்றைச் சேர்த்து ஒரு நிமிடம் வதக்கவும்.

- பின்னர் அரைத்து வைத்த பொடியை சேர்த்து நன்கு கிளறவும்.

- பிறகு தண்ணீர் ஊற்றி, மூடி வைத்து, தண்ணீர் முழுவதுமாக வற்றும் வரை சமைக்கவும்.

-️ இறுதியாக எலுமிச்சை சாறு சேர்த்து, பரிமாறும் வரை மூடியே வைத்திருக்கவும்.

- அவ்வளவுதான் சூப்பரான சுண்டல் சுக்கா ரெடி!