1 கப் ரவை வெச்சு.. ஈவ்னிங் டைம்-ல இப்படி போண்டா செய்யுங்க.. மொறுமொறுன்னு ருசியா இருக்கும்...

Rava Bonda Recipe In Tamil: மாலை வேளையில் ஸ்கூல் முடிந்து வீட்டிற்கு பசியுடன் வரும் குழந்தைகளுக்கு காபி, டீ குடிக்க கொடுக்கும் போது, அவர்களுக்கு நன்கு மொறுமொறுவென்றும் சூடாகவும் ஒரு ஸ்நாக்ஸ் செய்து கொடுக்க நினைக்கிறீர்களா?

உங்கள் வீட்டில் 1 கப் ரவை இருந்தால், உளுந்து வடைக்கு இணையான சுவையைக் கொண்ட ஒரு சூப்பரான ரவா போண்டாவை செய்யலாம். இந்த ரவா போண்டா செய்வதற்கு மிகவும் சுலபமாக இருப்பதோடு, குழந்தைகள் கேட்டு விரும்பி சாப்பிடக்கூடியவாறு இருக்கும்.

உங்களுக்கு ரவா போண்டாவை எப்படி செய்வதென்று தெரிந்து கொள்ள வேண்டுமா? கீழே ரவா போண்டா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* ரவை - 1 கப்
* அரிசி மாவு - 2 டேபிள் ஸ்பூன்
* உருளைக்கிழங்கு - 1 (வேக வைத்தது)
* தயிர் - 1/2 கப்
* தண்ணீர் - 1/4 கப்
* பச்சை மிளகாய் - 2 (பொடியாக நறுக்கியது)
* இஞ்சி - சிறிய துண்டு (பொடியாக நறுக்கியது)
* கறிவேப்பிலை - 1 கொத்து (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* வெங்காயம் - 1 (பொடியாக நறுக்கியது)
* உப்பு - சுவைக்கேற்ப
* பேக்கிங் சோடா - 1 சிட்டிகை
* எண்ணெய் - பொரிப்பதற்கு தேவையான அளவு

செய்முறை:

* முதலில் மிக்சர் ஜாரில் ரவையை சேர்த்து நன்கு மென்மையாக பொடித்துக் கொள்ள வேண்டும்.
* பின் அத்துடன் பச்சரிசி மாவு, வேக வைத்த உருளைக்கிழங்கு, தயிர், 1/4 கப் தண்ணீர் சேர்த்து நன்கு மென்மையாக அரைத்துக் கொள்ள வேண்டும்.
* பின்பு அரைத்ததை ஒரு பாத்திரத்தில் எடுத்துக் கொண்டு, அதை மூடி வைத்து 15 நிமிடம் ஊற வைக்க வேண்டும்.
* 15 நிமிடம் கழித்து, மூடியைத் திறந்து, அதில் நறுக்கிய பச்சை மிளகாய், இஞ்சி, கறிவேப்பிலை, கொத்தமல்லியை சேர்க்க வேண்டும்.
* அதன் பின் அதில் பொடியாக நறுக்கிய வெங்காயம், சுவைக்கேற்ப உப்பு மற்றும் பேக்கிங் சோடா சேர்த்து நன்கு கைகளால் பிசைந்து கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.
* பிறகு பிசைந்து வைத்துள்ள மாவை கையில் எடுத்து, கொஞ்சம் கொஞ்சமாக எண்ணெயில் கிள்ளிப் போட்டு, பொன்னிறமாக பொரித்து எடுத்தால், சுவையான ரவா போண்டா தயார்.

Image Courtesy: Apoorvaa's Nalabagam