சப்பாத்திக்கு அட்டகாசமாக இருக்கும் முள்ளங்கி கூட்டு

உங்கள் வீட்டில் சப்பாத்தி செய்யப் போகிறீர்களா? அதற்கு சைடு டிஷ்ஷாக மசாலா செய்து அலுத்துவிட்டதா? ஒரு வித்தியாசமான, அதே சமயம் சுவையான ஒரு சைடு டிஷ் செய்ய நினைக்கிறீர்களா? உங்கள் வீட்டில் முள்ளங்கி உள்ளதா? அப்படியானால் அதைக் கொண்டு கூட்டு செய்யுங்கள். இந்த முள்ளங்கி கூட்டு சப்பாத்திக்கு மட்டுமின்றி, புளிக்குழம்பிற்கு சைடு டிஷ்ஷாகவும் அற்புதமாக இருக்கும். முள்ளங்கி கூட்டு என்றதும் பலர் அதன் வாசனையை நினைத்து முகம் சுளிக்கலாம். ஆனால் இந்த கூட்டில் முள்ளங்கியை நன்கு வதக்கி செய்வதால், வாசனை அதிகம் வராது.

உங்களுக்கு முள்ளங்கி கூட்டு எப்படி செய்வதென்று தெரிந்து கொள்ள வேண்டுமா? கீழே முள்ளங்கி கூட்டு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* முள்ளங்கி - 1 (பொடியாக நறுக்கியது)

* உப்பு - சுவைக்கேற்ப

* மஞ்சள் தூள் - 1 டீஸ்பூன்

* தண்ணீர் - தேவையான அளவு

* பாசிப் பருப்பு - 1/2 கப்

* எண்ணெய் - 1 டீஸ்பூன்

அரைப்பதற்கு...

* துருவிய தேங்காய் - 1 கப்

* சீரகம் - 1 டீஸ்பூன்

* வரமிளகாய் - 2

* அரிசி மாவு - 1 டேபிள் ஸ்பூன்

தாளிப்பதற்கு...

* தேங்காய் எண்ணெய் - 1 டேபிள் ஸ்பூன்

* கடுகு - 1 டீஸ்பூன்

* உளுத்தம் பருப்பு - 1 டீஸ்பூன்

* கறிவேப்பிலை - சிறிது

* வரமிளகாய் - 1

* பெருங்காயத் தூள் - 1 சிட்டிகை

செய்முறை:

* முதலில் பாசிப்பருப்பை நன்கு நீரில் கழுவி, ஒரு பாத்திரத்தில் போட்டு, நீரை ஊற்றி வேக வைத்து தனியாக வைத்துக் கொள்ள வேண்டும்.

* பின்பு மிக்சர் ஜாரில் அரைப்பதற்கு கொடுத்துள்ள பொருட்களை சேர்த்து நன்கு அரைத்துக் கொள்ள வேண்டும்.

* பிறகு ஒரு வாணலியை அடுப்பில் வைத்து, அதில் 1 டீஸ்பூன் எண்ணெய் ஊற்றி சூடானதும், முள்ளங்கியை சேர்த்து 5 நிமிடம் வதக்க வேண்டும்.

* பின் அதில் சிறிது உப்பு, மஞ்சள் தூள் சேர்த்து கிளறி, சிறிது நீரை ஊற்றி, முள்ளங்கியை நன்கு வேக வைக்க வேண்டும்.

* முள்ளங்கி நன்கு வெந்ததும், அதில் வேக வைத்துள்ள பாசிப் பருப்பை சேர்த்து கிளறி, அரைத்த தேங்காய் விழுதையும் சேர்த்து கிளறி, 5 நிமிடம் குறைவான தீயில் வைத்து நன்கு கொதிக்க வைத்து இறக்க வேண்டும்.

* இறுதியாக ஒரு சிறு வாணலியை அடுப்பில் வைத்து, அதில் எண்ணெய் ஊற்றி சூடானதும், தாளிப்பதற்கு கொடுத்துள்ள பொருட்களை சேர்த்து தாளித்து, முள்ளங்கி கூட்டுடன் சேர்த்து கிளறினால், சுவையான முள்ளங்கி கூட்டு தயார்.

Image Courtesy: yummytummyaarthi