கிரகப்ரவேசத்தின் போதும், புதிய வீட்டிற்கு குடிபோகும் போதும் முதலில் ஏன் பால் காய்ச்சுகிறார்கள் தெரியுமா?

சொந்த வீடு கட்டி அதில் வாழ வேண்டுமென்பதுதான் பெரும்பாலான மக்களின் விருப்பமாக இருக்கும். புதிதாக வீடு கட்டி கிரகப் பிரவேசம் செய்யும் போதோ அல்லது புதிதாக ஒரு வீட்டிற்கு குடியேறும் போதோ ​​புதிய வீட்டில் பாலைக் காய்ச்சி, அது பாத்திரத்திலிருந்து வழிந்து ஓடும் படி செய்யும் வழக்கம் பெரும்பாலான கலாச்சரங்க்ளில் இருப்பதை நீங்கள் கவனித்திருக்கிறீர்களா?

பல நூற்றாண்டுகளாகப் பின்பற்றப்பட்டு வரும் இந்தச் சடங்கின் பின்னணியில் உள்ள அர்த்தம் பலருக்குத் தெரிந்திருக்க வாய்ப்பில்லை. பல்வேறு கலாச்சார நம்பிக்கைகளின்படி, பால் கொதித்து வழிந்து ஓடுவது அந்த வீட்டிற்குச் செல்வம், ஆரோக்கியம் மற்றும் மகிழ்ச்சியைக் கொண்டுவரும் என்று கருதப்படுகிறது. இந்த சடங்கு வட இந்தியாவில் 'தூத் உபால்னா' என்றும், தென்னிந்தியாவில் 'பால் காய்ச்சுதல்' என்றும் அழைக்கப்படுகிறது. கிரகப் பிரவேசத்தின் போது ஏன் பால் காய்ச்சப்படுகிறது மற்றும் ஏன் அது வழிந்து ஓடுமாறு செய்யப்படுகிறது, அதற்குப்பின்னால் உள்ள ஆன்மீகக் காரணங்கள் என்னவென்பதை பதிவில் தெரிந்து கொள்ளலாம்.

பால் வழிதல் என்பது செழுமையைக் குறிக்கிறது

கிரகப் பிரவேசத்தின் போது பால் காய்ச்சும்போது, ​​அது வேண்டுமென்றே வழிந்து பாத்திரத்தை விட்டு வெளியேற விடப்படுகிறது. இந்து மதத்தில், பால் என்பது ஊட்டச்சத்து, அக்கறை மற்றும் வாழ்வின் தொடர்ச்சியை உணர்த்துகிறது. பால் வழிந்து வெளியேறுவது என்பது ஆடம்பரத்தையோ அல்லது மிகையான தேவையற்ற செலவையோ குறிப்பதல்ல. மாறாக, இது 'அக்ஷயம்' எனும் நிலையை, அதாவது ஒருபோதும் குறையாத, முடிவில்லாத செழுமையைக் குறிக்கிறது. இதன் மூலம், அந்த இல்லத்தில் உணவுக்கு ஒருபோதும் பற்றாக்குறை ஏற்படாது என்று நம்பப்படுகிறது. மேலும், அந்த இல்லத்தில் உணவு அல்லது பொருளாதார நிலைத்தன்மை ஆகியவற்றிற்கு ஒருபோதும் தட்டுப்பாடு ஏற்படாது என்பதை இது உணர்த்துகிறது.

அக்னி பகவான் மற்றும் அன்னபூரணியை கௌரவித்தல்

வாஸ்து சாஸ்திரத்தின்படி, சமையலறை வீட்டின் இதயமாகக் கருதப்படுகிறது. இது அக்னி பகவானால் ஆளப்படும் இடமாகும். அடுப்பைப் பற்றவைத்து முதன்முதலில் பால் காய்ச்சும்போது, ​​அது அக்னி தேவனின் ஆசிகளைப் பெற்றுத் தருவதோடு, சுற்றுப்புறத்தைச் சுத்திகரித்து, நமது பிரார்த்தனைகளை இறைவனிடம் கொண்டு சேர்க்கிறது. அதை தொடர்ந்து, பாலைக் காய்ச்சுவது, உணவின் தெய்வமான அன்னை அன்னபூரணியின் ஆசீர்வாதத்தைப் பெற்றுத் தருகிறது. அன்னபூரணி தேவிக்கு பால் மிகவும் விருப்பமான ஒன்று என்று நம்பப்படுகிறது. புதிய இல்லத்தில் பக்தியுடன் பாலைக் காய்ச்சுவது, அந்த சமையலறையை ஆன்மீக நல்லிணக்கத்திற்கு ஊற்றாக விளங்கச் செய்கிறது.

பால் பொங்கி வழியும் திசை

வாஸ்து சாஸ்திரத்தின் படி பால் பொங்கும் திசை மிகவும் முக்கியமானதாகக் கருதப்படுகிறது. அவை வெவ்வேறு அர்த்தங்களைக் கொண்டுள்ளது.

- பால் கிழக்குத் திசையில் பொங்கி வழிந்தால், அது விரைவான வளர்ச்சி, தெளிவு, தொழில்முறை வெற்றி மற்றும் அறிவுத்திறனைக் குறிக்கிறது.

- வடக்குத் திசையில் பால் பொங்கி வழிந்தால், அது நிதி மற்றும் தொழில் வளர்ச்சியைக் குறிக்கிறது.

- மேற்குத் திசையில் சிந்தினால், அது நிலைத்தன்மை, மன அமைதி மற்றும் இணக்கமான உறவுகளைக் குறிக்கிறது.

- அதேசமயம் தெற்குத் திசையில் பால் வழிவது அசுபமாகக் கருதப்படுகிறது. இத்திசையில் பால் சிந்தினால், வீட்டின் அமைதி மற்றும் செல்வத்தை அதிகரிக்க வழிபாடு செய்ய வேண்டும்.

இணக்கமான சூழலை உருவாக்குகிறது

பால் பொங்கி வழிந்தால், அது வீணாவதில்லை. மாறாக, மீதமுள்ள பாலைக் கொண்டு, அரிசி, ஏலக்காய் மற்றும் வெல்லம் அல்லது சர்க்கரை சேர்த்து இனிப்பு தயாரிக்கப்படுகிறது. இந்த இனிப்பை முதலில் குலதெய்வங்கள் மற்றும் வாஸ்து புருஷருக்குப் படைத்து, பின்னர் குடும்ப உறுப்பினர்கள், நண்பர்கள் மற்றும் பூஜையைச் செய்த புரோகிதர்களுக்குப் பிரசாதமாக வழங்குகிறார்கள். இவ்வாறு சமைக்கப்பட்ட முதல் உணவைப் பகிர்ந்து கொள்வது, தங்கப்போகும் புதிய இடத்தில் உறவுகளுக்கு இடையிலும் பேச்சிலும் இணக்கத்தையும் இனிமையையும் வளர்க்க உதவுகிறது.

அறிவியல் காரணம்

பாலை காய்ச்சும்போது பயன்படுத்தப்படும் வெப்பம், பாத்திரங்களையும் சமையல் மேற்பரப்புகளையும் கிருமி நீக்கம் செய்கிறது. நெருப்பும், வெப்பமும் மனதிற்கு இதமான, வரவேற்பு உணர்வைத் தரும் சூழலை உருவாக்குகின்றன. இது குடும்பத்தினருடன் ஒரு உணர்வுப்பூர்வமான பிணைப்பை ஏற்படுத்த உதவுகிறது.

மொத்தத்தில் புதிய சமையலறையில் பால் பொங்கி வழியும் வரை காய்ச்சுவது என்பது செழுமையைக் குறிக்கிறது. இது, அந்த இல்லத்தில் உணவும் பாலும் எப்போதும் தாராளமாகக் கிடைக்க வேண்டும் என்ற விருப்பத்தை பிரதிபலிக்கிறது.