இட்லி, தோசைக்கு வெறும் 2 நிமிஷத்துல அடுப்பே இல்லாம சட்னி செய்யணுமா? இந்த புளி மிளகாய் சட்னியை செய்யுங்க..

Puli Milagai Chutney Recipe In Tamil: காலையில் இட்லி தோசைக்கு இன்னும் சட்னி செய்யவில்லையா? இன்னும் ஒரே யோசனையில் தான் உள்ளீர்களா? ஆனால் நேரமாகிவிட்டதா? அப்படியானால் வெறும் 3 பொருள் கொண்டு 2 நிமிடத்தில் அடுப்பே இல்லாமல் சட்னி செய்யலாம். அது தான் புளி மிளகாய் சட்னி.

இந்த சட்னி அக்காலத்தில் கிராமத்து பகுதியில் அதிகம் செய்து சாப்பிடுவார்களாம். இந்த சட்னியின் ஸ்பெஷலே பச்சையாக சாப்பிடுவது தானாம். அதுவும் இதில் சேர்க்கும் நல்லெண்ணெய் இந்த சட்னிக்கு கூடுதல் சுவையை தரும். உங்கள் வீட்டில் உள்ளோருக்கு வித்தியாசமான சட்னியை செய்து கொடுக்க நினைத்தால், இந்த புளி மிளகாய் சட்னியை செய்யலாம்.

உங்களுக்கு புளி மிளகாய் சட்னியை எப்படி செய்வதென்று தெரிந்து கொள்ள வேண்டுமா? கீழே புளி மிளகாய் சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வரமிளகாய் - 10
* உப்பு - சுவைக்கேற்ப
* புளி - சிறிய எலுமிச்சை அளவு
* சின்ன வெங்காயம் - 15
* தண்ணீர் - சிறிது
* நல்லெண்ணெய் - 3 டேபிள் ஸ்பூன்

செய்முறை:

* முதலில் மிக்சர் ஜாரில் 10 வரமிளகாயை எடுத்துக் கொள்ள வேண்டும்.
* பின் அதில் சட்னியின் சுவைக்கேற்ப உப்பு சேர்த்து நன்கு வரமிளகாயை மென்மையாக அரைத்துக் கொள்ள வேண்டும்.
* பின்பு அதில் 1 சிறிய எலுமிச்சை அளவு புளி, 15 சின்ன வெங்காயத்தை சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின் அரைத்த சட்னியை ஒரு கிண்ணத்தில் எடுத்துக் கொள்ள வேண்டும்.
* அடுத்து அதில் 3 டேபிள் ஸ்பூன் நல்லெண்ணெய் ஊற்றி பரிமாறினால், சுவையான புளி மிளகாய் சட்னி தயார்.
* உங்களுக்கு ஒருவேளை பச்சை வாசனை பிடிக்காவிட்டால், இந்த சட்னியை தாளிக்கலாம். அதற்கு ஒரு வாணலியை அடுப்பில் வைத்து, அதில் 3 டேபிள் ஸ்பூன் நல்லெண்ணெய் ஊற்றி சூடானதும், 1 டீஸ்பூன் கடுகு, 1 டீஸ்பூன் உளுத்தம் பருப்பு, 1 கொத்து கறிவேப்பிலை சேர்த்து தாளித்து, சட்னியுடன் சேர்த்து கலந்து கொள்ளலாம். ஆனால் இந்த சட்னியை தாளிக்காமல் சாப்பிட்டால் தான், சுவையாக இருக்கும்.