பீர்க்கங்காயை இப்படி கூட்டு செய்யுங்க.. டேஸ்ட் சும்மா வேற லெவல்-ல இருக்கும்..

Peerkangai Kootu Recipe In Tamil: உங்கள் வீட்டில் உள்ளோர் காய்கறிகளை சாப்பிடமாட்டார்களா? அதுவும் பீர்க்கங்காய் என்றால் தொடவேமாட்டார்களா? இதுவரை நீங்கள் பீர்க்கங்காயை பொரியல், கடையல், குழம்பு என்று தான் செய்திருப்பீர்கள். ஆனால் அந்த பீர்க்கங்காயைக் கொண்டு கூட்டு செய்துள்ளீர்களா? அதுவும் கடலைப் பருப்பு சேர்த்து கூட்டு செய்யும் போது, சுவை பிரமாதமாக இருக்கும். முக்கியமாக இந்த கூட்டு ரெசிபியை சாதத்துடன் பிசைந்தும் சாப்பிடலாம், சப்பாத்திக்கு சைடு டிஷ்ஷாகவும் சாப்பிடலாம்.

உங்களுக்கு இந்த பீர்க்கங்காய் கூட்டு ரெசிபியை எப்படி செய்வதென்று தெரிந்து கொள்ள வேண்டுமா? கீழே பீர்க்கங்காய் கூட்டு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

வேக வைப்பதற்கு...

* பாசிப்பருப்பு - 1 டேபிள் ஸ்பூன்
* கடலைப் பருப்பு - 1/4 கப் (30 நிமிடம் நீரில் ஊற வைத்தது)
* வெங்காயம் - 1 (பொடியாக நறுக்கியது)
* சின்ன தக்காளி - 1 (நறுக்கியது)
* தண்ணீர் - 3/4 கப்
* மஞ்சள் தூள் - 1/4 டீஸ்பூன்

கூட்டு தாளிப்பதற்கு...

* எண்ணெய் - 2 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* சீரகம் - 1/4 டீஸ்பூன்
* வரமிளகாய் - 3
* கறிவேப்பிலை - 1 கொத்து
* சிறிய அளவு வெங்காயம் - 1 (பொடியாக நறுக்கியது)
* பூண்டு - 3 பல் (பொடியாக நறுக்கியது)
* பீர்க்கங்காய் - 250 கிராம் (ஓரளவு பெரியதாக நறுக்கியது)
* பெருங்காயத் தூள் - 1/2 டீஸ்பூன்
* உப்பு - சுவைக்கேற்ப
* மஞ்சள் தூள் - 1/4 டீஸ்பூன்
* தண்ணீர் - 1/2 கப்
* கொத்தமல்லி - சிறிது

அரைப்பதற்கு...

* துருவிய தேங்காய் - 1/2 கப்
* சீரகம் - 1/2 டீஸ்பூன்
* பச்சை மிளகாய் - 1
* தண்ணீர் - சிறிது

செய்முறை:

* முதலில் குக்கரில் பாசிப்பருப்பு மற்றும் கடலைப் பருப்பை எடுத்து நீரில் 2 முறை கழுவ வேண்டும்.
* பின்னர் அதில் வெங்காயம், தக்காளி, மஞ்சள் தூள் சேர்த்து 3/4 கப் நீரை ஊற்றி குக்கரை மூடி அடுப்பில் வைத்து, 2-3 விசில் விட்டு இறக்க வேண்டும்.
* பின்பு மிக்சர் ஜாரில் துருவிய தேங்காய், சீரகம், பச்சை மிளகாய் மற்றும் சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* அதன் பின் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, சீரகம் சேர்த்து தாளிக்க வேண்டும்.
* பிறகு அதில் வரமிளகாய், கறிவேப்பிலை மற்றும் பொடியாக நறுக்கிய வெங்காயத்தை சேர்த்து வதக்க வேண்டும்.
* பின் அதில் பொடியாக நறுக்கிய பூண்டு பற்களை சேர்த்து நன்கு வதக்க வேண்டும்.
* அடுத்து அதில் நறுக்கிய பீர்க்கங்காய் மற்றும் பெருங்காயத் தூள், மஞ்சள் தூளை சேர்த்து நன்கு வதக்க வேண்டும்.
* பீர்க்கங்காயின் நிறம் மாறத் தொடங்கியதும், அதில் 1/2 கப் நீரை ஊற்றி கிளறி, மூடி வைத்து 5 நிமிடம் மிதமான தீயில் வைத்து வேக வைக்க வேண்டும்.
* பின்னர் அதில் வேக வைத்த பருப்பை நீருடன் அப்படியே சேர்த்து கிளறி மூடி வைத்து 5 நிமிடம் நன்கு வேக வைக்க வேண்டும்.
* அதன் பின் மூடியைத் திறந்து, அதில் அரைத்து வைத்துள்ள தேங்காய் விழுதை சேர்த்து கிளறி, உப்பு சுவை பார்த்து வேண்டுமானால் உப்பு சேர்த்து, திறந்தே வைத்து 4 நிமிடம் நீர் ஓரளவு சுண்டும் வரை கொதிக்க வைத்து கொத்தமல்லியைத் தூவி கிளறி இறக்கினால், சுவையான பீர்க்கங்காய் கூட்டு தயார்.