மாங்காய் வாங்குனா இந்த மாதிரி பொரிச்ச குழம்பு செஞ்சு பாருங்க - அட்டகாசமா இருக்கும்

Manga poricha kulambu recipe in Tamil: மதியம் சிம்பிளா அதிகம் மெனக்கெடாம சமையலை முடிக்க நினைக்கிறீங்களா? உங்கள் வீட்டில் மாங்காயும், முருங்கைக்காயும் உள்ளதா? அப்படியானால் அந்த காய்களை வைத்து சூப்பரான பொரிச்ச குழம்பு செய்யுங்கள். இந்த பக்குவத்தில் மாங்காய் பொரிச்ச குழம்பு செய்யும் போது, அது சூடான சாதத்துடன் மட்டுமின்றி, தோசை மற்றும் சப்பாத்தியுடன் சேர்த்து சாப்பிடவும் அருமையாக இருக்கும்.

மேலும் இந்த மாங்காய் பொரிச்ச குழம்பு செய்வதற்கு ஈஸியாக இருப்பதால், பேச்சுலர்களும் இதை எளிதாக செய்யலாம். முக்கியமாக இந்த குழம்பு நீங்கள் வழக்கமாக செய்வதை விட சற்று வித்தியாசமான சுவையில் இருப்பதால், மாங்காய் பிடிக்காதவர்களும் விரும்பி சாப்பிடுவார்கள். மாங்காயை பச்சையாகவோ அல்லது சாம்பராகவோ சாப்பிட்டே போரடித்தவர்கள் இந்த குழம்பை முயற்சி செய்து பார்க்கலாம்.

உங்களுக்கு சூப்பரான மாங்காய் பொரிச்ச குழம்பு எப்படி செய்வதென்று தெரிந்து கொள்ள வேண்டுமா? கீழே மாங்காய் பொரிச்ச குழம்பு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- பச்சை மாங்காய் - 1
- முருங்கைக்காய் - 2
- பாசிப்பருப்பு - 3 ஸ்பூன்
- சாம்பார் பொடி - 2 ஸ்பூன்
- உப்பு - தேவையான அளவு
- தண்ணீர் - தேவையான அளவு

அரைக்க:

- துருவிய தேங்காய் - 4 ஸ்பூன்
- தண்ணீர் - தேவையான அளவு

தாளிக்க:

- கடுகு - 1/4 ஸ்பூன்
- உளுத்தம்பருப்பு - 1/4 ஸ்பூன்
- சீரகம் - 1/4 ஸ்பூன்
- சின்ன வெங்காயம் - 10 (பொடியாக நறுக்கியது)
- கறிவேப்பிலை - ஒரு கொத்து (நறுக்கியது)
- எண்ணெய் - 1 ஸ்பூன்

செய்முறை:

- பாசிப்பருப்புடன் ஒரு சிட்டிகை மஞ்சள் தூள் மற்றும் ஒரு துளி எண்ணெய் சேர்த்து, பிரஷர் குக்கரில் வேகவைக்கவும். அதை மசித்துத் தனியாக எடுத்து வைக்கவும்.

- இப்போது ஒரு பாத்திரத்தில் நறுக்கிய முருங்கைக்காய் துண்டுகளை எடுத்துக்கொள்ளவும். தேவையான அளவு தண்ணீர் சேர்த்து, மூடி வைத்து வேகவிடவும். முருங்கைக்காய் பாதி வெந்த நிலையில், நறுக்கிய மாங்காய் துண்டுகளை போட்டு மேலும் சிறிது தண்ணீர் சேர்த்து வேகவைக்கவும்.

- கலவை கொதிக்கத் தொடங்கியதும், சாம்பார் பொடி, உப்பு மற்றும் வேகவைத்த பாசிப்பருப்பு ஆகியவற்றைச் சேர்க்கவும். மாங்காயும் முருங்கைக்காயும் முழுமையாக வேகும் வரை மூடி வைத்து சமைக்கவும்.

- இப்போது ஒரு மிக்சி ஜாரில் துருவிய தேங்காயுடன் சிறிது நீர் சேர்த்து, மென்மையான விழுதாக அரைத்துக் கொள்ளவும்.

- இந்த விழுதை குழம்புடன் சேர்த்து, சிறிது நேரம் கொதிக்க விடவும். இந்த குழம்பு மிகவும் கெட்டியாக இருக்கக்கூடாது, எனவே தேவையான அளவு தண்ணீர் சேர்த்து நன்கு கொதிக்க வைத்து அடுப்பை அணைக்கவும்.

- பின்னர் ஒரு கடாயில் எண்ணெயை ஊற்றி அதில் கடுகு, சீரகம் மற்றும்கறிவேப்பிலை சேர்த்து தாளிக்கவும்.

- கடுகு பொரிந்ததும் அதில் உளுத்தம் பருப்பு மற்றும் நறுக்கிய சின்ன வெங்காயம் சேர்த்து தாளிக்கவும். வெங்காயம் பொன்னிறமாக மாறியதும் இந்த தாளிப்பை குழம்பின் மீது ஊற்றி கொட்டி நன்றாக கிளறினால் சுவையான மாங்காய் பொரிச்ச குழம்பு ரெடி!