கொங்குநாடு சின்ன வெங்காய சட்னி - எப்படி செய்றது-ன்னு பாத்து ஒருவாட்டி செஞ்சு பாருங்க..

Kongu Onion Chutney Recipe In Tamil: காலையில் பெரும்பாலான வீடுகளில் இட்லி, தோசை தான் காலை டிபனாக இருக்கும். உங்கள் வீட்டிலும் அப்படி தானா? அந்த இட்லி, தோசைக்கு பெரும்பாலும் சட்னியை தான் சைடு டிஷ்ஷாகவும் செய்வார்கள். நீங்களும் உங்கள் வீட்டில் தேங்காய் சட்னி, தக்காளி சட்னி, கார சட்னி, மல்லி சட்னி, புதினா சட்னி என்று ஒரே மாதிரியான சட்னியை தான் செய்வீர்களா?

சற்று வித்தியாசமாக செய்ய நினைக்கிறீர்களா? அப்படியானால் கொங்குநாடு வெங்காய சட்னியை செய்யுங்கள். இந்த சட்னி செய்வதற்கு சுலபமாக இருப்பதோடு, ருசியாகவும் இருக்கும். இந்த சட்னியை இட்லி, தோசையுடன் சாப்பிட்டால், கணக்கில்லாமல் சாப்பிடுவார்கள். அந்த அளவில் ருசி பிரமாதமாக இருக்கும்.

உங்களுக்கு இந்த கொங்குநாடு சின்ன வெங்காய சட்னியை எப்படி செய்வதென்று தெரிந்து கொள்ள வேண்டுமா? கீழே கொங்குநாடு சின்ன வெங்காய சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டீஸ்பூன்
* சின்ன வெங்காயம் - 1 1/2 கப்
* பூண்டு - 3 பல்
* வரமிளகாய் - 4
* புளி - சிறிய துண்டு
* பொட்டுக்கடலை - 1 டேபிள் ஸ்பூன்
* கொத்தமல்லி - சிறிது
* உப்பு - சுவைக்கேற்ப
* தண்ணீர் - 1/4 கப்
* பொடித்த வெல்லம் - 1/2 டீஸ்பூன்

தாளிப்பதற்கு...

* எண்ணெய் - 1 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1 டீஸ்பூன்
* கறிவேப்பிலை - 1 கொத்து

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சின்ன வெங்காயம் மற்றும் பூண்டு சேர்த்து, குறைவான தீயில் வைத்து, வெங்காயம் பொன்னிறமாகும் வரை வதக்க வேண்டும்.
* பின்பு அதில் வரமிளகாய், புளி, பொட்டுக்கடலை சேர்த்து நன்கு வதக்க வேண்டும்.
* பிறகு அதில் சிறிது கொத்தமல்லியை சேர்த்து, சுவைக்கேற்ப உப்பு தூவி நன்கு வதக்க வேண்டும்.
* அதன் பின் அதில் 1/4 கப் நீரை ஊற்றி, 1/2 டீஸ்பூன் பொடித்த வெல்லத்தை சேர்த்து சிறிது நேரம் வேக வைத்து இறக்கி குளிர வைக்க வேண்டும்.
* பின்னர் மிக்சர் ஜாரில் வதக்கி குளிர வைத்த பொருட்களை சேர்த்து நன்கு அரைத்துக் கொள்ள வேண்டும்.
* பின்பு அரைத்த சட்னியை ஒரு கிண்ணத்தில் எடுத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை சேர்த்து தாளித்து, சட்னியுடன் சேர்த்து கலந்தால், சுவையான கொங்கு சின்ன வெங்காய சட்னி தயார்.