இந்த கஞ்சியை அடிக்கடி காலையில் 1 கப் குடிங்க.. உடல் எடை மடமடன்னு வேகமா குறையும்..

Siruthaniya Murungai Keerai Kanji Recipe In Tamil: காலையில் இட்லி, தோசை சாப்பிட்டு அலுத்துவிட்டதா? நீங்கள் உடல் எடையைக் குறைக்க முயற்சித்துக் கொண்டிருக்கிறீர்களா? அப்படியானால் மிகவும் சிம்பிளாக 4 விதமான சிறுதானியங்களைக் கொண்டு அருமையான சுவையில் கஞ்சி செய்யுங்கள். இந்த கஞ்சி ஏராளமான சத்துக்களைக் கொண்டது. முக்கியமாக இது உடல் எடையைக் குறைக்க நினைப்போருக்கு ஏற்ற அருமையான கஞ்சி. இந்த கஞ்சியை அடிக்கடி செய்து உட்கொண்டு வந்தால், உடல் எடையில் நல்ல மாற்றத்தைக் காணலாம்.

உங்களுக்கு இந்த சிறுதானிய முருங்கைக்கீரை கஞ்சியை எப்படி செய்வதென்று தெரிந்து கொள்ள வேண்டுமா? கீழே சிறுதானிய முருங்கைக்கீரை கஞ்சி ரெசிபியின் எளிய செய்முறை கொடுக்கப்பட்ள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

அரைத்து பொடி செய்வதற்கு...

* மிளகு - 1 டீஸ்பூன்
* சீரகம் - 1 1/2 டீஸ்பூன்
* வரமிளகாய் - 2
* சோம்பு - 1/4 டீஸ்பூன்

கஞ்சி செய்வதற்கு...

* குதிரைவாலி - 1/4 கப்
* சாமை - 1/4 கப்
* திணை - 1/4 கப்
* வரகரிசி - 1/4 கப்
* பாசிப்பருப்பு - 1/4 கப்
* தண்ணீர் - 4 கப்
* சின்ன வெங்காயம் - 15 (தட்டியது)
* பூண்டு - 12 பல் (தட்டியது)
* தக்காளி - 1 (நறுக்கியது)
* மஞ்சள் தூள் - 1/2 டீஸ்பூன்
* அரைத்த மசாலா பொடி
* உப்பு - சுவைக்கேற்ப
* சுடுநீர் - 3 கப்
* முருங்கைக்கீரை - 2 கைப்பிடி

செய்முறை:

* முதலில் மிக்சர் ஜாரில் மிளகு, சீரகம், வரமிளகாய், சோம்பு ஆகியவற்றை சேர்த்து நன்கு மென்மையாக அரைத்து பொடி செய்து கொள்ள வேண்டும்.
* பின்னர் ஒரு பாத்திரத்தில் குதிரைவாலி, சாமை, திணை, வரகரிசி ஆகியவற்றை எடுத்துக் கொண்டு நீரில் 3-4 முறை நன்கு கழுவிக் கொண்டு, நீரை ஊற்றி, 15 நிமிடம் ஊற வைத்துக் கொள்ள வேண்டும்.
* பின்பு குக்கரை அடுப்பில் வைத்து, அதில் 4 கப் நீரை ஊற்றி நன்கு கொதிக்க ஆரம்பித்ததும், ஊற வைத்த சிறுதானியங்களை நீரை வடிகட்டிவிட்டு சேர்த்து, அத்துடன் பாசிப்பருப்பையும் கழுவி சேர்த்து கிளறி விட வேண்டும்.
* பிறகு அதில் தட்டி வைத்துள்ள சின்ன வெங்காயம், பூண்டு, நறுக்கிய தக்காளி, மஞ்சள் தூள், அரைத்து வைத்துள்ள பொடி, சுவைக்கேற்ப உப்பு சேர்த்து கலந்து, குக்கரை மூடி 3-4 விசில் விட்டு இறக்க வேண்டும்.
* விசில் போனதும் குக்கரைத் திறந்து அதில் 3 கப் சுடுநீரை ஊற்றி கலந்து, மீண்டும் அந்த குக்கரை அடுப்பில் வைத்து, நன்கு கொதிக்க ஆரம்பித்ததும், அதில் முருங்கைக்கீரையை சேர்த்து கிளறி 7-10 நிமிடம் நன்கு வேக வைத்து இறக்கினால், சிறுதானிய முருங்கைக்கீரை கஞ்சி தயார்.