ஒருடைம் இந்த பக்குவத்துல சுண்டக்காய் குழம்பு செய்யுங்க.. பிடிக்காதவங்களும் விரும்பி சாப்பிடுவாங்க..

Green Sundakkai Kuzhambu Recipe In Tamil: உங்கள் வீட்டில் யாரும் சுண்டக்காயை சாப்பிடமாட்டார்களா? அவர்களை சுண்டக்காய் சாப்பிட வைக்க வேண்டுமா? அப்படியானால் அவர்களுக்கு இந்த பக்குவத்துல சுண்டக்காய் குழம்பு செய்யுங்கள். இந்த சுண்டக்காய் குழம்பு சாதத்துடன் சேர்த்து சாப்பிட அவ்வளவு அருமையாக இருக்கும்.

சுண்டக்காயில் ஏராளமான மருத்துவ குணங்கள் உள்ளன. சுண்டக்காயை உணவில் அடிக்கடி சேர்த்து வந்தால், வயிற்றில் உள்ள புழுக்கள் அழிந்து வெளியேறிவிடும். மேலும் இது உடலில் இரத்தத்தை அதிகரிக்கும்.

உங்களுக்கு சுண்டக்காய் குழம்பை எப்படி செய்வதென்று தெரிந்து கொள்ள வேண்டுமா? கீழே சுண்டக்காய் குழம்பு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பச்சை சுண்டக்காய் - 100 கிராம்
* தேங்காய் - 1/4 கப்
* சோம்பு - 1 டீஸ்பூன்
* எண்ணெய் - 1 டேபிள் ஸ்பூன்
* கடுகு - 1 டீஸ்பூன்
* சீரகம் - 1/2 டீஸ்பூன்
* கறிவேப்பிலை - 1 கொத்து
* வெங்காயம் - 1 (பொடியாக நறுக்கியது)
* பூண்டு - 10 பல்
* குழம்பு மிளகாய் தூள் - 2 டேபிள் ஸ்பூன்
* மிளகாய் தூள் - 1 டேபிள் ஸ்பூன்
* மல்லித் தூள் - 1 டேபிள் ஸ்பூன்
* மஞ்சள் தூள் - 1/4 டீஸ்பூன்
* தக்காளி - 2 (பொடியாக நறுக்கியது)
* தண்ணீர் - தேவையான அளவு
* உப்பு - சுவைக்கேற்ப
* புளி - சிறிய எலுமிச்சை அளவு (நீரில் ஊற வைத்து சாறு எடுத்துக் கொள்ளவும்)
* பெருங்காயத் தூள் - 1/2 டீஸ்பூன்

செய்முறை:

* முதலில் சுண்டக்காயை லேசாக தட்டிக் கொள்ள வேண்டும்.
* பின் அதை நீரில் போட்டு 2 முறை பிசைந்துவிட்டு கழுவி, தனியே ஒரு தட்டில் எடுத்து வைத்துக் கொள்ள வேண்டும்.
* பிறகு புளியை நீரில் ஊற வைத்து சாறு எடுத்துக் கொள்ள வேண்டும். அதேப் போல் மிக்சர் ஜாரில் தேங்காய் மற்றும் சோம்பு சேர்த்து சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* அடுத்து ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், சுண்டக்காயை சேர்த்து நன்கு 4-5 நிமிடம் வதக்கி ஒரு தட்டில் எடுத்து வைத்துக் கொள்ள வேண்டும்.
* பின் அந்த வாணலியில் உள்ள எண்ணெயை வடிகட்டியால் வடிகட்டி எடுத்துக் கொண்டு, அதே எண்ணெயை மற்றொரு வாணலியில் ஊற்றி அடுப்பில் வைத்து, எண்ணெய் சூடானதும், கடுகு, சீரகம், கறிவேப்பிலை சேர்த்து தாளிக்க வேண்டும்.
* பின்பு அதில் வெங்காயம், பூண்டு சேர்த்து நிறம் மாறும் வரை வதக்க வேண்டும்.
* பிறகு அதில் குழம்பு மிளகாய் தூள், மிளகாய் தூள், மல்லித் தூள், மஞ்சள் தூள் சேர்த்து, மிதமான தீயில் வைத்து, 1 நிமிடம் கிளறி விட வேண்டும்.
* அடுத்து அதில் தக்காளியை சேர்த்து நன்கு மென்மையாகும் வரை வதக்க வேண்டும்.
* பின் அதில் சிறிது நீரை ஊற்றி கிளறி, சுவைக்கேற்ப உப்பு சேர்த்து, புளி நீரை ஊற்றி 5 நிமிடம் பச்சை வாசனை போக கொதிக்க வைக்க வேண்டும்.
* நன்கு கொதித்ததும், அதில் சுண்டக்காய் மற்றும் அரைத்த தேங்காயை சேர்த்து கிளறி, சுவைக்கேற்ப உப்பு சேர்த்து, எண்ணெய் மேலே மிதக்கும் வரை கொதிக்க வைத்து இறக்கினால், சுவையான பச்சை சுண்டக்காய் குழம்பு தயார்.

Image Courtesy: Today's Samayal