இராவணனுக்கு 10 தலைகள் கிடைத்ததற்கு பின்னால் உள்ள கதை என்ன தெரியுமா? அந்த 10 தலைகளின் அர்த்தம் என்ன தெரியுமா?

இந்திய இதிகாசங்களில் அசுர வேந்தன் இராவணனுக்கென்று தனியிடம் உண்டு. இலங்கையின் மன்னரான இராவணன் 'தசானனன்' மற்றும் 'தசகண்டன்' போன்ற பெயர்களால் அழைக்கப்படுகிறார். 'தசானனன்' என்றால், 'பத்து தலைகளைக் கொண்டவன்' என்று பொருள். தசரா பண்டிகையின் போது, ​​பத்து தலைகளைக் கொண்ட இராவணனின் பிரம்மாண்டமான உருவ பொம்மைகள் இந்தியாவின் பல்வேறு பகுதிகளில் எரிக்கப்படுகின்றன. ஆனால், இராவணனுக்கு எப்படி பத்து தலைகள் வந்தன?

உண்மையில், ராவணன் பிறக்கும்போதே பத்து தலைகளுடன் பிறக்கவில்லை. புராண நூல்களின்படி, அவர் கடும் தவம் புரிந்ததன் மூலமே இந்த பத்து தலைகளைப் பெற்றார். இந்த பத்து தலைகளும் வெறும் உடலுறுப்பு மட்டுமல்ல அவற்றில் பல ஆழமான அர்த்தங்கள் மறைந்துள்ளன. இந்த பதிவில் இராவணனின் பத்து தலைகளுக்குப் பின்னால் உள்ள ரகசியத்தைத் தெரிந்து கொள்ளலாம்.

இராவணனுக்கு பத்து தலைகள் கிடைத்தது எப்படி?

வால்மீகி இராமாயணம், ராமசரிதமானஸ் மற்றும் ஸ்ரீமத் பாகவத புராணம் போன்ற புராணங்கள் இராவணனின் பத்து தலைகள் பற்றிய கதையை விவரிக்கின்றன. வால்மீகி இராமாயணத்தின் உத்தர காண்டத்தில் குறிப்பிட்டுள்ளபடி, இராவணன் பிரம்மதேவரை மகிழ்விப்பதற்காக கோகர்ண தீர்த்தத்தில் 10,000 ஆண்டுகள் கடுமையான தவம் புரிந்தார். 1,000 ஆண்டுகள் தொடர்ந்து பிரார்த்தனை செய்தும் பிரம்மதேவர் தோன்றவில்லை. எனவே, இராவணன் தனது தலையைத் தானே வெட்டி, அதை அக்கினிக் குண்டத்தில் அர்ப்பணித்தார். புராணக் கதைகளின்படி, பிரம்மதேவர் இராவணனின் தலையை உடனடியாக மீண்டும் பொருத்தினார். இராவணன் தனது கடுமையான தவத்தைத் தொடர்ந்து 9,000 ஆண்டுகள் மேற்கொண்டார். ஒவ்வொரு 1,000 ஆண்டு பிரார்த்தனைக்குப் பிறகும், இராவணன் தனது தலையை வெட்டி புனித அக்கினியில் அர்ப்பணித்தார்.

அமிர்த வரம்

பத்தாயிரம் ஆண்டுகள் கழித்து, இராவணன் தனது கடைசித் தலையை வெட்டிக்கொள்ளத் துணிந்தபோது, ​​பிரம்மதேவர் இராவணனுக்கு முன்னால் தோன்றினார். இராவணனின் தீவிரமான அர்ப்பணிப்பைக் கண்டு பெரிதும் ஈர்க்கப்பட்ட பிரம்மதேவர், அவருக்கு பத்துத் தலைகளையும், இராவணனின் தொப்புளில் அமிர்தம் இருக்கும்படியான ஒரு சிறப்பு வரத்தையும் வழங்கினார். இந்த பத்துத் தலைகளைப் பெற்றதன் காரணமாகவே, இராவணன் 'தசானனன்' என்ற புகழ்பெற்ற பெயரைப் பெற்றார். பிற்காலத்தில், இலங்கையில் நடந்த பெரும் போரின்போது, ​​இராவணனின் தொப்புளில் மறைந்திருக்கும் இந்த அமிர்தத்தைப் பற்றி விபீஷணன் ஸ்ரீராமரிடம் கூறினார். இராவணனை வீழ்த்த வேண்டுமானால், அவருடைய தொப்புளைக் குறிவைத்து அம்பு எய்ய வேண்டும் என்று விபீஷணன் விளக்கினார். ராமபிரான் தனது அம்பை இராவணனின் தொப்புளில் எய்தி, இராவணனை வதைத்ததாக இராமாயணம் விவரிக்கிறது.

துளசிதாசர் எழுதிய 'ராமசரிதமானஸ்' காவியத்தின் 'உத்தர காண்ட'த்திலும், ராவணனின் இந்த கடுமையான தவமும், அவர் தனது தலைகளைத் தீயில் அர்ப்பணித்த நிகழ்வும் குறிப்பிடப்பட்டுள்ளன. 'ஸ்ரீமத் பாகவத புராண'த்தின் ஏழாவது ஸ்கந்தத்தில் உள்ள பத்தாவது அத்தியாயத்திலும் இதே சம்பவம் பதிவு செய்யப்பட்டுள்ளது.

இராவணனின் பத்து தலைகள் எதைக் குறிக்கின்றன?

புராணக் கதைகள் இராவணனை ஒரு கம்பீரமான மற்றும் சிக்கலான ஆளுமையாகச் சித்தரிக்கின்றன; அவரிடம் பிராமணர்களுக்குரிய பண்புகளும் அரக்கர்களுக்குரிய குணங்களும் ஒன்றாக இருந்தன. அவரது தந்தை ஒரு பிராமணர், தாய் அரக்க குலத்தைச் சேர்ந்தவர். இராவணன் ஒரு சிறந்த அறிஞராகவும், பண்டிதராகவும், சிவபெருமானின் தீவிர பக்தராகவும் விளங்கினார். அதே சமயம், அவரிடம் அரக்கர்களுக்குரிய தீய குணங்களும் ஆழமாக வேரூன்றியிருந்தன. இராவணனின் பத்து தலைகள், அவரிடம் இருந்த பத்து குறைபாடுகளையும் தீய குணங்களையும் குறிப்பதாக அறிஞர்கள் கருதுகின்றனர். அந்தப் பத்து எதிர்மறைப் பண்புகள் என்னவெனில்: காமம், கோபம், பற்று, பேராசை, செருக்கு, பொறாமை, மனச்சலனம், தவறான அறிவு, அகங்கார மனம் மற்றும் ஆணவம் ஆகியனவாகும்.

தசரா பண்டிகையில் ஏன் இராவணன் உருவம் எரிக்கப்படுகிறது?

தசரா பண்டிகை என்பது வெறும் இராவணனின் உருவ பொம்மைகளை எரிப்பது மட்டுமில்லை. இந்தப் பண்டிகை, நம்மிடம் உள்ள தீய குணங்களைக் கைவிட்டு, உண்மை, கடமை மற்றும் நற்பண்புகள் நிறைந்த பாதையில் நடக்க வேண்டும் என்ற வலுவான செய்தியை நமக்கு வழங்குகிறது. விஜயதசமியின் போது காமம், கோபம், பற்று, பேராசை, ஆணவம் போன்ற அனைத்து எதிர்மறைப் பண்புகளையும் நம்மிடமிருந்து நீக்க வேண்டுமென்பதை இது உணர்த்துகிறது.