வீட்ல அரை கப் கோதுமை ரவை இருக்கா... அப்ப இந்த மாதிரி பணியாரம் செஞ்சு பாருங்க... டேஸ்ட் தாறுமாறா இருக்கும்...!

Godhumai Rava Paniyaram Recipe in Tamil: எப்போதும் காலையில இட்லி, தோசை, சப்பாத்தி, பூரி என்று சாப்பிட்டு போராடித்து விட்டதா? இதைவிட்டால் சில சமயம் பொங்கல் செய்வோம். காலை உணவு என்றாலே இவை மட்டும்தான் என்ற நிலை வந்துவிட்டது. சற்று வித்தியாசமாக அதே சமயம் சத்தான ஒரு காலை உணவைசெய்ய ஆசைப்படுகிறீர்களா? உங்கள் வீட்டில் அரை கப் கோதுமை ரவையும், உளுந்தம் பருப்பும் இருந்தால் போதும்.

அப்படியானால் அந்த இரண்டையும் கொண்டு ஒரு அட்டகாசமான சுவையைக் கொண்ட பணியாரத்தை செய்யுங்கள். இந்த ரவை பணியாரம் குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடிய வகையில் இருக்கும், அதேசமயம் மிகவும் ஆரோக்கியமானதாக இருக்கும். முக்கியமாக இதை மாலை நேர ஸ்னாக்ஸாகவும் சாப்பிடலாம். கோதுமை ரவையில் பணியாரம் செய்வது சுவையானதாக மட்டுமின்றி ஆரோக்கியமானதாகவும் இருக்கும். இந்த பதிவில் சுவையான ரவை பணியாரத்தை எப்படி செய்யலாம் என்று தெரிந்து கொள்ளலாம்.

தேவையானப் பொருட்கள்:

- கோதுமை ரவை - 1/2 கப்
- உளுந்து - 2 டேபிள்ஸ்பூன்
- வெந்தயம் - 1 ஸ்பூன்
- உப்பு - தேவையான அளவு
- பெரிய வெங்காயம் - 1
- பச்சை மிளகாய் - 2
- கடுகு - 1/4 ஸ்பூன்
- கடலைப்பருப்பு - 1 ஸ்பூன்
- கறிவேப்பிலை - சிறிதளவு
- கொத்தமல்லி - சிறிதளவு
- எண்ணெய் - 3 ஸ்பூன்

செய்முறை:

- வெங்காயம், பச்சை மிளகாய், கொத்தமல்லியை பொடியாக நறுக்கிக் கொள்ளவும்.

- கோதுமை ரவை, உளுந்து, வெந்தயத்தை 3 மணி நேரம் ஊற வைத்து நன்கு அரைத்து கொள்ளவும்.

- உப்பு சேர்த்து கலக்கி 2 மணி நேரம் புளிக்க விடவும்.

- ஒரு கடாயில் எண்ணெய் சேர்த்து கடுகு, உளுத்தம்பருப்பு, கடலைப்பருப்பு, கொத்தமல்லி, கறிவேப்பிலை சேர்த்து வதக்கவும்.

- பிறகு நறுக்கிய பெரிய வெங்காயம், பச்சை மிளகாய் சேர்த்து வதக்கவும்.

- வெங்காயம் வதங்கியவுடன் இந்த கலவையை மாவில் சேர்த்து நன்கு கலக்கி விடவும்.

- பணியாரக் கல்லை அடுப்பில் வைத்து ஒவ்வொரு குழியிலும் சிறிது எண்ணெய் சேர்த்து மாவை சேர்க்கவும்.

- மிதமான தீயில் வைத்து வேக விடவும். ஒருபுறம் வெந்ததும் திருப்பி விடவும். இரண்டுபுறமும் வெந்தவுடன் சூடாக தேங்காய் சட்னி அல்லது கார சட்னியுடன் பரிமாறவும்.

- சூப்பரான கோதுமை ரவை குழிப்பணியாரம் ரெடி!