சப்பாத்திக்கு ப்ராக்கோலியை இந்த மாதிரி பக்கோடா செஞ்சு.. மசாலா செய்யுங்க.. அருமையா இருக்கும்...

Broccoli Pakoda Masala Recipe In Tamil: இன்று இரவு என்ன சமையல் செய்வது என்று யோசிக்கிறீர்களா? சப்பாத்தி செய்வதாக இருந்தால், என்ன சைடு டிஷ் செய்வது என்று யோசனை செய்கிறீர்களா? உங்கள் வீட்டில் ப்ராக்கோலி உள்ளதா?

அப்படியானால் அந்த ப்ராக்கோலியைக் கொண்டு பக்கோடா செய்து, மசாலா செய்யுங்கள். இந்த ப்ராக்கோலி பக்கோடா மசாலா சப்பாத்தியுடன் மட்டுமின்றி, சாதத்துடன் சாப்பிடவும் நன்றாக இருக்கும். மேலும் இது செய்வதற்கு சிம்பிளாகவும் இருக்கும். குழந்தைகள் விரும்பி சாப்பிடுவார்கள்.

உங்களுக்கு ப்ராக்கோலி பக்கோடா மசாலா எப்படி செய்வதென்று தெரிந்து கொள்ள வேண்டுமா? கீழே ப்ராக்கோலி பக்கோடா மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

பக்கோடாவிற்கு...

* ப்ராக்கோலி - 1 கப் (பொடியாக நறுக்கியது)
* வெங்காயம் - 1 கப் (பொடியாக நறுக்கியது)
* அரிசி மாவு - 1 டேபிள் ஸ்பூன்
* கடலை மாவு - 3 டேபிள் ஸ்பூன்
* பேக்கிங் சோடா - 1/2 டீஸ்பூன்
* எலுமிச்சை சாறு - 1/2 டீஸ்பூன்
* மஞ்சள் தூள் - 1/4 டீஸ்பூன்
* மிளகாய் தூள் - 1/2 டீஸ்பூன்
* கரம் மசாலா - 1/4 டீஸ்பூன்
* தண்ணீர் - 3 டேபிள் ஸ்பூன்
* உப்பு - சுவைக்கேற்ப

மசாலாவிற்கு...

* தயிர் - 1 கப்
* தண்ணீர் - 3/4 கப்
* கடலை மாவு - 1 டேபிள் ஸ்பூன்
* கடுகு - 1 டீஸ்பூன்
* சீரகம் - 1 டீஸ்பூன்
* பெருங்காயத் தூள் - 1 சிட்டிகை
* எண்ணெய் - 2 டேபிள் ஸ்பூன்
* மஞ்சள் தூள் - 1/4 டீஸ்பூன்
* மிளகாய் தூள் - 1 டீஸ்பூன்
* மல்லித் தூள் - 1 டீஸ்பூன்
* உப்பு - சுவைக்கேற்ப

செய்முறை:

* முதலில் ஒரு பாத்திரத்தில் பக்கோடாவிற்கு கொடுத்துள்ள ப்ராக்கோலி, வெங்காயம், அரிசி மாவு, கடலை மாவு, பேக்கிங் சோடா, எலுமிச்சை சாறு, மஞ்சள் தூள், மிளகாய் தூள், கரம் மசாலா, உப்பு மற்றும் சிறிது நீரை ஊற்றி சற்று கெட்டியாக பிசைந்து கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், பிசைந்து வைத்துள்ள பக்கோடா கலவையை சிறிது சிறிதாக எடுத்து எண்ணெயில் போட்டு பொன்னிறமாக பொரித்து எடுக்க வேண்டும். இதேப் போல் அனைத்து மாவையும் பக்கோடாக்களாக போட்டு எடுத்துக் கொள்ள வேண்டும்.
* பின்பு ஒரு அகலமான வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, சீரகம், பெருங்காயத் தூள் சேர்த்து தாளிக்க வேண்டும்.
* பின் தீயைக் குறைத்து அதில் கடலை மாவை சேர்த்து தொடர்ந்து கிளறி விட வேண்டும்.
* நன்கு பொன்னிறமானதும், அதில் அடித்து வைத்துள்ள தயிர், மஞ்சள் தூள், மிளகாய் தூள், மல்லித் தூள் சேர்த்து குறைவான தீயில் வைத்து 4-5 நிமிடம் கிளறி விட வேண்டும். அதன் பின் தேவையான அளவு நீரை ஊற்ற வேண்டும்.
* அடுத்து சுவைக்கேற்ப உப்பு சேர்த்து கிளறி, பக்கோடாவை சேர்த்து பிரட்டி, 2-3 நிமிடம் குறைவான தீயில் வைத்து கொதிக்க வைத்து இறக்கினால், சுவையான ப்ராக்கோலி பக்கோடா மசாலா தயார்.

Image Courtesy: archanaskitchen