potato pakora recipe : ஆலு பக்கோடா

மாலை வேளையில் காபி, டீ குடிக்கும் போது ஏதாவது சூடாகவும், காரமாகவும் ஸ்நாக்ஸ் சாப்பிட ஆசையாக உள்ளதா? எப்போதும் பஜ்ஜி, போண்டா செய்து போர் அடித்துவிட்டதா? அப்படியானால் உங்கள் வீட்டில் உருளைக்கிழங்கு உள்ளதா? அதைக் கொண்டு அட்டகாசமான ருசியைக் கொண்ட ஆலு பக்கோடா செய்யுங்கள். இதுவரை நீங்கள் வெங்காய பக்கோடா செய்திருப்பீர்கள். ஆனால் இந்த ஆலு பக்கோடா காபி, டீ குடிக்கும் போது சாப்பிட அற்புதமாக இருக்கும். மேலும் இது பெரியவர்கள் முதல் குழந்தைகள் வரை அனைவருமே விரும்பி சாப்பிடக்கூடிய வகையில் இருக்கும்.

உங்களுக்கு ஆலு பக்கோடா எப்படி செய்வதென்று தெரிந்து கொள்ள வேண்டுமா? கீழே ஆலு பக்கோடா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கடலை மாவு - 1 கப்

* சோள மாவு - 1 டேபிள் ஸ்பூன்

* வெங்காயம் - 2 (மெல்லிசாக நறுக்கியது)

* உருளைக்கிழங்கு - 1 (தோலுரித்து துண்டுகளாக்கப்பட்டது)

* மிளகாய் தூள் - 1 டீஸ்பூன்

* மல்லித் தூள் - 2 டீஸ்பூன்

* சீரகத் தூள் - 1 டீஸ்பூன்

* மஞ்சள் தூள் - 1 டீஸ்பூன்

* சாட் மசாலா - 1 டேபிள் ஸ்பூன்

* உப்பு - சுவைக்கேற்ப

* பேக்கிங் சோடா - 1/4 டீஸ்பூன்

* தண்ணீர் - 1/4 கப் முதல் 1/2 கப் வரை

செய்முறை:

* ஒரு பௌலில் எண்ணெயைத் தவிர அனைத்து பொருட்களையும் எடுத்துக் கொண்டு, கொஞ்சம் கொஞ்சமாக நீரை ஊற்றி சற்று கெட்டியாக பிசைந்து கொள்ள வேண்டும்.

* பின்னர் அதை 15 நிமிடம் ஊற வைக்க வேண்டும்.

* பின்பு ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.

* பிறகு ஒரு ஸ்பூனில் மாவை எடுத்து எண்ணெயில் போட்டு பொன்னிறமாக பொரித்து எடுத்தால், சுவையான ஆலு பக்கோடா தயார்.

Image Courtesy: yummytummyaarthi