பிரசவத்திற்கு பின் உடல் எடையை குறைப்பதற்கான சில டிப்ஸ்...

ஆரோக்கியமான டயட்

பிரசவத்திற்கு பின் உடல் எடையை குறைக்க நினைக்கும் போது, கடுமையான டயட்டை மேற்கொள்ளக்கூடாது. ஏனெனில் அப்போது குழந்தைக்கு தாய்ப்பால் கொடுப்பதால், உடல் எடையை அதிகரிக்காத மற்றும் உடலுக்கு மிகுந்த ஆரோக்கியத்தை தரும் வகையில் பழங்கள் மற்றும் காய்கறிகளை அதிகம் உண்ணும் உணவில் சேர்த்துக் கொள்ள வேண்டும். இதனால் உடல் எடையானது கட்டுப்பாட்டுடன் இருக்கும்.

தாய்ப்பால் கொடுப்பது

ஆய்வு ஒன்றில் தாய்ப்பால் கொடுத்தால், பிரசவத்திற்கு பின் உடல் எடை அதிகரிக்காமல் இருக்கும் என்று சொல்கிறது. ஏனெனில் பாலானது உற்பத்தியாகும் போது, உடலில் உள்ள அதிகப்படியான கலோரிகள் எரிக்கப்படுவதால், உடல் எடையானது குறையும்.

உடற்பயிற்சி

உடல் எடையை குறைக்க வேண்டுமென்று எந்நேரமும் உடற்பயிற்சியில் ஈடுபடலாம். ஆனால் அவ்வாறு உடற்பயிற்சியை மேற்கொள்ள ஆரம்பிக்கும் முன், மருத்துவரை ஆலோசிக்க வேண்டும். ஏனெனில் பிரசவத்தினால் உடலில் ஏற்பட்ட காயங்கள் குணமாவதற்கு சில நாட்கள் ஆகும். எனவே காயங்கள் குணமாவதற்கு முன்பே உடற்பயிற்சியின் ஈடுபட்டால், அது வேறு சில விளைவுகளை உடலில் ஏற்படுத்திவிடும். ஆகவே மருத்துவரை ஆலோசித்தப் பின்னரே உடற்பயிற்சியில் ஈடுபட வேண்டும்.

யோகா

பிரசவத்திற்கு பின்னர் உடலானது மீண்டும் பழைய நிலைக்கு வருவதற்கு சற்று தாமதமாகும். ஆகவே அப்போது பொறுமையுடன் இருந்து, சரியான டயட் மற்றும் உடற்பயிற்சிகளை மேற்கொள்வது நல்லது. மேலும் அத்துடன் மன அழுத்தத்தை குறைக்கும் வகையில், யோகாவில் ஈடுபடுவதும் மிகவும் சிறந்தது. இதனால் மனம் ரிலாக்ஸ் அடைவதுடன், உடல் எடையும் ஆரோக்கியமாக குறையும்.

போதுமான தூக்கம்

பிரசவத்திற்கு பின்னர் உடல் எடையைக் குறைப்பதில் போதுமான தூக்கமும் முக்கிய பங்கினை வகிக்கிறது. எப்படியெனில் சரியான அளவில் தூங்கத்தை மேற்கொள்வதால், உடலானது ரிலாக்ஸ் அடைந்து, ஹார்மோன்கள் சீராக இருக்கும். அதிலும் இந்த செயலை குழந்தை தூங்கும் போது சரியாக மேற்கொள்வது நல்லது.

தண்ணீர் குடிப்பது

தாய்ப்பால் கொடுக்கும் போது, பெண்கள் அதிகப்படியான தண்ணீரைக் குடிக்க வேண்டும். இதனால் உடல் வறட்சி அடையாமல் இருப்பதோடு, பாலின் உற்பத்தியும் அதிகமாக இருக்கும். மேலும் தண்ணீர் அதிகம் குடித்தால், வயிறு நிறைவதால், ஆரோக்கியமற்ற உணவுகளில் இருந்து விலகி இருக்கலாம்.