தாய்ப்பால் கொடுக்கும் பெண்கள் காபி குடிப்பது குழந்தைகளின் மீது பாதிப்பை ஏற்படுத்துமா?

கர்ப்பகாலத்தில் காபி

கர்ப்ப காலத்தில் காபி குடிப்பதை குறைக்கவோ அல்லது முற்றிலுமாக நிறுத்தி விடவோ பெண்கள் அறிவுறுத்தப்படுவார்கள். ஏனெனில் காபியில் இருக்கும் காஃபைன் தொப்புள்கொடியை கடந்து கருவில் இருக்கும் குழந்தை மீது பாதிப்பை ஏற்படுத்தும் என்பதால்தான். அதனால் பெண்களுக்கு கர்ப்பகாலத்தில் காபி பெரும்பாலும் தவிர்க்கப்படுகிறது.

பாலூட்டும் காலம்

கர்ப்பகாலம் முடிந்து குழந்தை பெற்றவுடன் பெண்கள் மீண்டும் காபி குடிக்க தொடங்கி விடுவார்கள். அதற்கு காரணம் அவர்கள் இந்த காலகட்டத்தில் அடிக்கடி அதிக சோர்வுக்கு உள்ளாவதுதான்.

காஃபைன்

காஃபைன் என்பது காபி, டீ மற்றும் அனைத்து கோகோ தாவரங்களிலும் காணப்படும் ஒரு பொருளாகும். இது மூளை மற்றும் நரம்பு மண்டலத்தை தூண்டுவதன் மூலம் உங்களை சுறுசுறுப்பாகவும், அதிக ஆற்றலுடனும் இருக்கும்படி செய்கிறது. இது பல ஆரோக்கிய நன்மைகளை வழங்கக்கூடியது ஆனால் அதிகளவு காஃபைன் பல பக்க விளைவுகளை ஏற்படுத்தும்.

பாலூட்டும்போது காபி குடிக்கலாமா?

காஃபினுடைய பக்கவிளைவுகளால் பாலூட்டும் போது காபி குடிக்கலாமா? வேண்டாமா? என்று பெண்கள் பயப்பட தேவையில்லை. ஏனெனில் பாலூட்டும் காலத்தில் காபி குடிப்பது அம்மாக்களுக்கும், குழந்தைகளுக்கும் பாதுகாப்பானதுதான். மிதமான அளவில் நீங்கள் குடிக்கும் காபியில் இருக்கும் காஃபைன் தாய்ப்பால் வழியாக குழந்தைக்கு செல்லும்போது அது அவர்கள் மீது எந்த பாதிப்பையும் ஏற்படுத்தாது.

எவ்வளவு குடிக்கலாம்?

மகப்பேறு மருத்துவர்களின் கருத்துப்படி பாலூட்டும் தாய்மார்கள் ஒரு நாளைக்கு 300 மிகி அளவிற்கு காஃபைன் எடுத்துக்கொள்ளலாம். அதாவது ஒரு நாளைக்கு இரண்டு கப் காபி எடுத்துக்கொள்ளலாம். ஒருவேளை உங்களுக்கு மேலும் குடிக்க வேண்டுமென்று ஆசை இருந்தால் காஃபைன் குறைவாக இருக்கும் வேறு பானங்களை குடிப்பது நல்லது.

விளைவுகள்

டீ, காபி மட்டுமின்றி சோடா, சாக்லேட் போன்ற பொருட்களிலும் காஃபைன் உள்ளது. எனவே நீங்கள் எடுத்துக்கொள்ளும் காஃபைன் அளவில் எச்சரிக்கையாக இருக்க வேண்டியது அவசியமாகும். பொதுவாக காஃபைன் குழந்தைகளுக்கு எந்த பாதிப்பையும் ஏற்படுத்தாது. ஆனால் குழந்தைகள் சோர்வாக காணப்பட்டாலோ அல்லது பால் குடிக்க மறுத்தாலோ நீங்கள் காஃபைன் சேர்த்து கொள்வதை தவிர்க்க வேண்டும்.