8 டன் தங்கம் கொடுத்து வாங்கப்பட்ட உலகிலேயே மிகவும் காஸ்ட்லியான நிலம் இதுதான்... இது இந்தியாலதான் இருக்காம்...!

உலகின் மிக விலையுயர்ந்த நிலம் என்று வரும் போது, ஹாங்காங்கின் Central Business District இந்த சாதனையைப் படைத்துள்ளது. பிப்ரவரி 2021 இல், அங்குள்ள 1.25 ஏக்கர் நிலத்தின் மதிப்பு 935 மில்லியன் அமெரிக்க டாலர்கள் (சுமார் ரூ. 81,550 கோடி) என மதிப்பிடப்பட்டது.

அதேபோல இந்தியாவில், மிகவும் விலையுயர்ந்த நிலம் மும்பையில் உள்ளது, குறிப்பாக மலபார் ஹில் பகுதியில். ஏனெனில் அங்கு ஒரு சதுர அடிக்கு கோடிக்கணக்கில் விலை நிர்ணயம் செய்யப்பட்டுள்ளது. ஒரு பிரதான கடற்கரை இடமாக இருப்பதால், இது நாட்டின் மிகவும் விலையுயர்ந்த இடமாக இருக்கிறது.

இருப்பினும், இவை அனைத்தையும் தாண்டி, மிக உயர்ந்த வரலாற்று முக்கியத்துவம் மற்றும் அதிக மதிப்பைக் கொண்ட நிலம் பஞ்சாபின் சிர்ஹிந்த்-ஃபதேகர் சாஹிப்பில் உள்ளது. இந்த புனித இடத்தில்தான் குரு கோபிந்த் சிங்கின் இரண்டு இளைய மகன்களான சாஹிப்சாதா ஜோராவர் சிங் (6 வயது) மற்றும் சாஹிப்சாதா ஃபதே சிங் (9 வயது), அவர்களின் பாட்டி மாதா குஜ்ரி ஜி ஆகியோரின் உடல்கள் தகனம் செய்யப்பட்டன.

தங்கத்தால் வாங்கப்பட்ட இடம்

குரு கோபிந்த் சிங் ஜியின் இளைய மகன்களான சாஹிப்சாதா ஜோராவர் சிங் மற்றும் சாஹிப்சாதா ஃபதே சிங் ஆகியோரின் தகனத்திற்கு நிலம் வழங்க நவாப் வசீர் கான் மறுத்தபோது, ​​அவர்களின் பாட்டி மாதா குஜ்ரி ஜியுடன் சேர்ந்து, திவான் தோடர் மால் பேச்சுவார்த்தை நடத்த முன்வந்தார். முகலாயர்கள் அதற்கு ஒப்புக்கொண்டனர், ஆனால் ஒரு வினோதமான நிபந்தனை விதித்தனர், அது நிலத்தை தங்க நாணயங்களால் மூட வேண்டும் என்று அவர்கள் கோரினர்.

அவர்களுக்கு ஒரு கண்ணியமான பிரியாவிடை அளிக்கத் தீர்மானித்த தோடர் மால், தேவையான தங்க நாணயங்களை சேகரிக்க தனது உடைமைகளை விற்றார். பின்னர் அவர் நிலத்தை வாங்குவதற்காக ஆயிரக்கணக்கான தங்க நாணயங்களை தரையில் அடுக்கி வைத்தார். தனது மனைவியின் ஆதரவுடன், அவர் ஃபதேகர் சாஹிப்பில் தகனத்தை நடத்தினார். இவ்வளவு சிறிய நிலம் இவ்வளவு பெரிய விலைக்கு வரலாற்றில் எங்கும் வாங்கப்படவில்லை, அதனால்தான் இது உலகின் மிக மதிப்புமிக்க நிலங்களில் ஒன்றாக உள்ளது.

முகலாயர்களால் கைப்பற்றப்பட்ட நிலம்

இந்த தியாகத்தின் கதை 1705 ஆம் ஆண்டு குரு கோபிந்த் சிங் ஜி மற்றும் அவரது குடும்பத்தினர் ஆனந்த்பூர் சாஹிப்பை விட்டு வெளியேறி சிர்சா நதியைக் கடக்கும்போது பிரிந்தபோது தொடங்கியது. அவரது மூத்த மகன்கள் அவருடன் தங்கினர், இளைய மகன்களான சாஹிப்சாதா ஜோராவர் சிங் மற்றும் சாஹிப்சாதா ஃபதே சிங் அவர்களின் பாட்டி மாதா குஜ்ரி ஜியுடன் தங்கினர். துரதிர்ஷ்டவசமாக, அவர்கள் சஹேதி கிராமத்திற்கு அருகில் முகலாயர்களால் சிறை பிடிக்கப்பட்டு ஃபதேகர் சாஹிப்பிற்கு கொண்டு செல்லப்பட்டனர், அங்கு அவர்கள் ஒரு துயரமான முடிவை எதிர்கொண்டனர்.

மதம் மாற மறுப்பு

முகலாய ஆட்சியாளர்கள் சாஹிப்சாதா ஜோராவர் சிங், சாஹிப்சாதா ஃபதே சிங் மற்றும் மாதா குஜ்ரி ஜி ஆகியோரை இஸ்லாத்திற்கு மாற்ற கட்டாயப்படுத்த முயன்றனர். இருப்பினும், குரு கோபிந்த் சிங் ஜியின் இளம் மகன்கள் அதை மறுத்துவிட்டனர். இதற்கு தண்டனை கொடுக்கும் விதமாக, முகலாயர்கள் அவர்களை மூன்று பகல் மற்றும் இரண்டு இரவுகள் உறைபனி கோபுரத்தில் சிறையில் அடைத்தனர்.

கடுமையானத் தண்டனைகளைத் தாங்கிய பிறகும், அவர்கள் மதம் மாற மறுத்ததால், அவர்களை தூக்கிலிட உத்தரவிட்டனர். இரண்டு சாஹிப்சாதாக்களும் ஒரு சுவருக்குள் உயிருடன் சமாதி கட்டப்பட்டனர். அவர்களின் தியாகத்தைக் கேள்விப்பட்டதும், மாதா குஜ்ரி ஜியும் காலமானார். அதன் பிறகும் நவாப் வஜீர் கான் அவர்களின் உடல்களை விடுவிக்கவோ அல்லது அவர்களின் இறுதி சடங்குகளுக்கு நிலம் வழங்கவோ மறுத்துவிட்டார். அப்போதுதான் திவான் தோடர் மால் இந்த சிக்கலை தீர்க்க முன்வந்தார்.

புனித பூமி மற்றும் குருதுவாரா

தோடர் மாலின் அசைக்க முடியாத உறுதியை பார்த்து வியந்த வஜீர் கான் பேராசை கொண்டு இன்னும் கடுமையான கோரிக்கையை விதித்தார், அதாவது தங்க நாணயங்களை தட்டையாக வைக்காமல் நிமிர்ந்து வைக்க வேண்டும் என்று அவர் வலியுறுத்தினார். தோடர் மால் அதற்கும் ஒப்புக் கொண்டு தேவையான 78,000 தங்க நாணயங்களை ஏற்பாடு செய்தார், அவை எடையின் அடிப்படையில் சுமார் 7-8 டன்களாக இருந்திருக்கும். இப்போது அதன் மதிப்பு சில இலட்சம் கோடிகளாக இருக்கும்.

இந்த நிலம் மிகவும் விலை உயர்ந்தது மட்டுமல்ல, சீக்கியர்களுக்கு மிகவும் புனிதமானதாகவும் மாறியது. இன்று, இரண்டு சாஹிப்சாதாக்கள் மற்றும் மாதா குஜ்ரி ஜி தகனம் செய்யப்பட்ட இடம் குருதுவாரா ஸ்ரீ ஜோதி சரூப் சாஹிப்பின் தாயகமாகும். திவான் தோடர் மாலின் தியாகத்தை முன்னிட்டு, குருதுவாரா அடித்தளத்தில் உள்ள ஒரு மண்டபம் அவரது பக்தி மற்றும் தன்னலமற்ற தன்மைக்கு அஞ்சலி செலுத்தும் விதமாக திவான் தோடர் மால் ஜெயின் ஹால் என்று பெயரிடப்பட்டுள்ளது.

குரு கோபிந்த் சிங்கிடம் தோடர் மால் வைத்த கோரிக்கை

குரு கோபிந்த் சிங் ஜி திவான் தோடர் மாலின் தியாகத்தைப் பற்றி அறிந்ததும், அவர் தனது ஆழ்ந்த நன்றியைத் தெரிவித்து, அவரின் ஒரு விருப்பத்தை நிறைவேற்ற முன்வந்தார். இருப்பினும், தோடர் மாலின் வேண்டுகோள் ஆச்சரியமாக இருந்தது, அதாவது அவரது பரம்பரையில் எந்த மகனும் பிறக்கக்கூடாது என்றும், அவரது குடும்பப் பரம்பரை அவருடனேயே முடிவடைய வேண்டுமென்றும் அவர் வரம் கேட்டார்.

குரு கோபிந்த் சிங் ஜி அதற்கான காரணத்தைக் கேட்டபோது, ​​தோடர் மால், "நான் வாங்கிய புனித நிலத்தின் மீது எனது எதிர்கால சந்ததியினர் ஒருபோதும் உரிமை கோருவதை நான் விரும்பவில்லை. அந்த நிலம் குருவின் சாஹிப்சாதாக்களுக்கு மட்டுமே உரியது, மேலும் அவர்களின் தியாகத்திற்கு என்றென்றும் ஒரு சான்றாக இருக்க வேண்டும்" என்றார். அதனால்தான் அவரது தியாகம் இன்றும் அனைவராலும் நினைவுகூரப்படுகிறது.

(பொறுப்புத் துறப்பு: மேலே கொடுக்கப்பட்டுள்ள தகவல் இணையத்தில் கிடைக்கும் அனுமானங்கள் மற்றும் தகவல்களின் அடிப்படையில் கொடுக்கப்பட்டுள்ளன மற்றும் நம்பகத்தன்மைக்கு உத்தரவாதம் இல்லை. தமிழ் போல்ட்ஸ்கை கட்டுரை தொடர்பான தகவலை உறுதிப்படுத்தவில்லை. மேலும் எங்கள் ஒரே நோக்கம் தகவலை வழங்குவது மட்டுமே. அதை வெறும் தகவலாக மட்டும் எடுத்துக் கொள்ள வேண்டும். எந்தவொரு தகவலையும் அனுமானத்தையும் பயிற்சி செய்வதற்கு அல்லது செயல்படுத்துவதற்கு முன், தயவுசெய்து சம்பந்தப்பட்ட நிபுணரை அணுகவும்.)