உலகின் முதல் பொறியியல் கல்லூரி எது? இந்தியாவில் தொடங்கப்பட்ட முதல் பொறியியல் கல்லூரி எது தெரியுமா?

இன்று உலகம் அடைந்துள்ள வளர்ச்சியில் பொறியியலின் பங்கு என்பது மிகவும் முக்கியமானது. இன்று உலகில் கோடிக்கணக்கான இளைஞர்கள் படிக்கும் படிப்பாக இன்ஜினியரிங் உள்ளது. இந்தியாவில் மட்டும் ஆயிரக்கணக்கான பொறியியல் கல்லூரிகள் உள்ளன. உலகின் முன்னணிப் பொறியியல் நிறுவனங்களைப் பற்றிப் பேசும்போது, ​​இந்தியத் தொழில்நுட்பக் கழகங்கள்(IIT), அண்ணாப் பல்கலைக்கழகம் மற்றும் ஸ்டான்போர்ட் பல்கலைக்கழகம் போன்றவைதான் நம் நினைவிற்கு வரும்.

ஆனால் பொறியியல் கல்லூரிகளின் தொடக்கம் என்பது நாம் நினைத்து பார்ப்பதை விட பல நூற்றாண்டுகளுக்கு முன்பிருந்தே தொடங்குகிறது. உண்மைதான் பொறியியல் கல்லூரிகளின் தொடக்கம் 18 ஆம் நூற்றாண்டிலிருந்தே தொடங்குகிறது.

பொறியியலின் தொடக்கம்

கடந்த காலத்தில் ஹாப்சுபர்க் பேரரசின் ஒரு பகுதியாகத் திகழ்ந்த பிராக் நகரில், முறையான பொறியியல் கல்விக்கான அடித்தளம் 1707-ஆம் ஆண்டில் அமைக்கப்பட்டது. தற்போது 'செக் தொழில்நுட்பப் பல்கலைக்கழகம்' (CTU) என்று அழைக்கப்படும் கல்வி நிறுவனம், 1707-ஆம் ஆண்டு ஜனவரி 18-அன்று பேரரசர் முதலாம் ஜோசப் அவர்களால் உருவாக்கப்பட்டது. இது தொடக்கத்தில் 'எஸ்டேட்ஸ் பொறியியல் பள்ளி' என்று அழைக்கப்பட்டது, மேலும், இது உலகின் முதல் பொறியியல் பல்கலைக்கழகமாக அங்கீகரிக்கப்பட்டுள்ளது.

கோட்டை மற்றும் அரண் அமைப்பு நிபுணரான கிறிஸ்டியன் ஜோசப் வில்லன்பெர்க் என்பவரிடமிருந்து இந்த யோசனை உருவானது. 1705-ஆம் ஆண்டில், பொறியியல் நுட்பங்கள், குறிப்பாக இராணுவ அரண் அமைப்புகள் மற்றும் பொதுக் கட்டுமானப் பணிகள் குறித்து சிறிய குழு மாணவர்களுக்கு பயிற்சி அளிக்க அனுமதி கோரி பேரரசரிடம் விண்ணப்பித்தார்.

18 ஆம் நூற்றாண்டில் ஐரோப்பாவில் அடிக்கடி போர்கள் நிகழ்ந்து வந்ததால், பாதுகாப்பு சார்ந்த கட்டுமானக் கலை மற்றும் தொழில்நுட்ப அறிவுக்கான தேவை அதிகமாக இருந்தது. எனவே பேரரசர் இத்திட்டத்திற்கு ஒப்புதல் அளித்தார். அதனைத் தொடர்ந்து, செயல்முறை சார்ந்த தொழில்நுட்பப் பயிற்சியை அளிப்பதை நோக்கமாகக் கொண்டு இந்த முதல் பொறியியல் கல்லூரி தனது செயல்பாட்டைத் தொடங்கியது.

18 ஆம் நூற்றாண்டில் என்ன பயிற்றுவிக்கப்பட்டது?

தற்போது உள்ள நூற்றுக்கணக்கான பொறியியல் துறைகளை போல அல்லாமல் ஆரம்பகாலப் பொறியியல் பாடங்கள் குறைவாகவும் ஆனால் நடைமுறை சார்ந்தவையாகவும் இருந்தன. அடித்தளக் கட்டுமானம் மற்றும் சிவில் இன்ஜினியரிங் ஆகியவை முதன்மைப் பாடங்களாக இருந்தன. சாலைகள், பாலங்கள் மற்றும் பாதுகாப்பு அரண்களைக் கட்டுவதற்கு அவசியமான திறன்களான நில அளவை, வரைபட உருவாக்கம், வடிகால் அமைப்புகள் மற்றும் கட்டுமானத் திட்டமிடல் ஆகியவற்றை மாணவர்கள் இந்த கல்லூரியில் கற்றனர். காலப்போக்கில், அந்த நிறுவனம் விரிவடைந்தது. 18 மற்றும் 19 ஆம் நூற்றாண்டுகளில், இயந்திரப் பொறியியல், தொழில்நுட்ப வேதியியல், மற்றும் நீர் மற்றும் சாலைக் கட்டுமானம் போன்ற துறைகள் தோன்றின.

இந்தியாவின் பழமையான பொறியியல் நிறுவனம்

இந்தியாவில், நீர்ப்பாசனம் மற்றும் உள்கட்டமைப்புத் திட்டங்களுக்கான சிவில் பொறியாளர்களைப் பயிற்றுவிப்பதற்காக 1847-இல் ரூர்க்கியில் பொறியியல் கல்லூரி நிறுவப்பட்டதன் மூலம் முறையான பொறியியல் கல்வி தொடங்கியது. பின்னர் இது 1854-ல் 'தாமசன் சிவில் இன்ஜினியரிங் கல்லூரி' (Thomason College of Civil Engineering) எனப் பெயரிடப்பட்டது. சுதந்திரத்திற்குப் பிறகு, இது பல்கலைக்கழக அந்தஸ்தைப் பெற்றது. மேலும் 2001-ல் 'இந்தியத் தொழில்நுட்பக் கழகம் ரூர்க்கி' (IIT Roorkee) என மறுபெயரிடப்பட்டது.