இந்நேரம் ‘ஜெயலலிதா’ இருந்திருந்தால்.... தமிழகத்துல இதெல்லாம் நடந்திருக்குமா?

நீட் தேர்வு :

ஜெயலலிதா மருத்துவமனையில் அனுமதிக்கப்படுவதற்கு முன்பு நீட் தேர்விற்கு எதிர்ப்பு தெரிவித்து முதன்மை அமைச்சருக்கு கடிதம் எழுதினார்.

தமிழகத்தில் நீட் தேர்வு கூடாது என்று உச்சநீதிமன்றத்திலும் வழக்கு தொடுக்கப்பட்டது. இதன் பின்னர் ஜெயலலிதா மருத்துவமனையில் அனுமதிக்கப்பட்டிருந்த நேரத்தில் நவம்பர் 23 ஆம் தேதி தமிழகத்தில் நீட் தேர்வு செயல்படுத்தப்படும் என்று அரசாணை வெளியிடப்பட்டது.

சென்னை துறைமுகம் :

சென்னை துறைமுகம் முதல் மதுரவாயல் விரைவுச் சாலைக்கு ஜெயலலிதா அரசு கடுமையான எதிர்ப்பு தெரிவித்தது. இத்திட்டம் 2012 ஆம் ஆண்டிலேயே கிடப்பில் போடப்பட்டிருந்தது.

இதனை நிறைவேற்ற மத்திய அரசுக்கும் மாநில அரசுக்கும் உயர்நீதிமன்றத்தில் வழக்கும் நடைப்பெற்றது. ஆனால் ஜெயலலிதா இறந்த இரண்டே நாட்களில் சென்னை துறைமுகம்-மதுரவாயல் விரைவுச்சாலை திட்டம் நிறைவேற்றப்படும் என்று அன்று தமிழக முதல்வராக இருந்த ஓ. பன்னீர் செல்வம் அறிவித்தார்.

உணவு பாதுகாப்புச் சட்டம் :

கூட்டாட்சி அமைப்பில் மக்கள் நலத் திட்டங்களை வடிவமைத்து செயல்படுத்தும் அதிகாரத்தை மாநில அரசுகளிடம் அளிப்பதே சிறந்த வழி , தேசிய உணவுப் பாதுகாப்பு சட்ட முன்வடிவு என்பது மாநில அரசுகளின் உரிமைகளைப் பறிக்கும் செயலாகும்.

மத்திய அரசின் உணவுப் பாதுகாப்பு மசோதா குழப்பமும், தவறுகளும் நிறைந்ததாகவும் உள்ளது - இந்த மசோதாவில் குறிப்பிடப்பட்டுள்ள,

இலக்கு பொது விநியோகத் திட்டத்தை செயல்படுத்தினால் தமிழக அரசுக்கு 1,800 கோடி ரூபாய் கூடுதல் செலவு ஏற்படும் என்று வலுவாக இத்திட்டத்தை எதிர்த்தார் ஜெயலலிதா.

ஆனால் அவர் மருத்துவமனையில் அனுமதிக்கப்பட்டிருந்த 2016 நவம்பர் 1 ஆம் தேதி அன்று உணவு பாதுகாப்புச் சட்டம் தமிழகத்தில் அமல்படுத்தப்பட்டது.

உதாய் திட்டம் :

மின்பகிர்மானத்தை இந்திய அளவில் சமச்சீராக அளிக்க மத்திய அரசு அறிவித்த திட்டம் தான் உதாய் மின் திட்டம். இதனை ஜெயலலிதா இருந்த போது எதிர்த்து இத்திட்டத்தில் தமிழகம் இணையாமல் இருந்தது.

ஆனால் அவர் மருத்துவமனையில் அனுமதிக்கப்பட்டிருந்த நேரத்தில் 2016 அக்டோபர் ஒன்றாம் தேதி உதாய் திட்டத்தில் தமிழகம் இணைவதாக அறிவிக்கப்பட்டது.

ஜி.எஸ்.டி :

ஜி.எஸ்.டி., வரி விதிப்பு மசோதாவாக இருந்த போதே முன்னாள் முதல்வர் ஜெயலலிதா கடுமையாக எதிர்த்தார்.ஆனால் அவர் இறந்த பிறகு லோக்சபா துணை சபாநாயகராக இருக்கும் தம்பிதுறை ஜி.எஸ்.டி வரியை தமிழக அரசு ஏற்றுக் கொள்ளும் என்று அறிவித்தார்.