2019ஆம் ஆண்டு ட்விட்டரை தெறிக்கவிட்ட ஹேஷ்டேக்குள்… பிகிலுக்கு எத்தனையாவது இடம் தெரியுமா?

#loksabhaelection2019

2019ஆம் ஆண்டு ட்விட்டர் தளத்தில் அதிகம் பயன்படுத்தப்பட்ட ஹேஷ்டேக்குகளின் பட்டியலில் #loksabhaelection2019 ஹேஷ்டேக் முதலிடத்தைப் பிடித்துள்ளது. நடப்பாண்டு ஏப்ரல் மாதம் நடைபெற்ற மக்களவை தேர்தலில் பாஜக பெரும்பான்மையான இடங்களை கைப்பற்றி இரண்டாவது முறையாக ஆட்சியமைத்தது. நரேந்திரமோடி இரண்டாவது முறையாக இந்தியாவின் பிரதமராகத் தேர்வு செய்யப்பட்டார்.

#chandrayaan2

உலகம் முழுவதும் பெரும் எதிர்பார்ப்பை ஏற்படுத்தியிருந்தது இஸ்ரோவின் சந்திரயான்-2. அதனால், #chandrayaan2 ஹேஷ்டேக் இரண்டாம் இடத்தைப் பிடித்துள்ளது. உலகிலேயே முதன்முறையாக நிலவின் தென்துருவ பகுதியை ஆராய, சந்திராயன்-2 விண்கலத்தை இந்திய விண்வெளி ஆராய்ச்சி நிறுவனமான இஸ்ரோ கடந்த ஜூலை 15ஆம் விண்ணில் ஏவியது. ஆனால், வெற்றிக்கு மிக அருகில் வந்த சந்திரயான்-2 விண்கல சோதனை முடிவில் தோல்வியை சந்தித்தது.

#cwc19

உலகக் கோப்பைக் கிரிக்கெட் போட்டிகள் இந்தியர்களால் கொண்டாடித் தீர்க்கப்பட்டது. அதனால், #cwc19 என்ற ஹேஷ்டேக் மூன்றாவது இடத்தைப் பிடித்துள்ளது. நான்கு ஆண்டுகளுக்கு ஒருமுறை நடக்கும் உலகக் கோப்பை கிரிக்கெட் போட்டி நடப்பாண்டு இங்கிலாந்தில் நடைபெற்றது. இதில், உலக கோப்பையை கைப்பற்றியது இங்கிலாந்து அணி.

#pulwama

நடப்பாண்டில் பிப்ரவரி 14ஆம் தேதி ஜம்மு காஷ்மீர் மாநிலத்தில் உள்ள புல்வாமா பகுதியில் ராணுவ வீரர்கள் சென்ற வாகனத்தின் மீது தீவிரவாதிகள் நடத்திய தற்கொலைப்படை தாக்குதலில் 44 இந்திய ராணுவ வீரர்கள் வீரமரணம் அடைந்தனர். இந்தச் சம்பவத்தைக் குறிக்கும், #pulwama என்ற ஹேஷ்டேக் நான்காவது இடத்தைப் பிடித்துள்ளது.

#article370

இந்திய அரசியலமைப்புச் சட்டத்தின் அடிப்படையில் ஜம்மு காஷ்மீருக்கு வழங்கப்பட்டு வந்த சிறப்பு அந்தஸ்தை ரத்து செய்து மத்திய அரசு. இதற்கு பல்வேறு தரப்பினர் எதிர்ப்பு தெரிவித்து வந்தனர். சிலர் ஆதரவு தெரிவித்தனர். அதன் தொடர்ச்சியாக #article370 என்ற ஹேஷ்டேக் அதிக அளவில் பயன்படுத்தப்பட்டது. அதனால், இந்த ஹேஷ்டேக் ஐந்தாவது இடத்தைப் பிடித்துள்ளது.

#bigil

தெறி, மெர்சல் என்று அடுத்தடுத்து வணீக ரீதியாக வெற்றி பெற்றது அட்லி-விஜய் கூட்டணி படங்கள். அதைதொடர்ந்து அட்லி இயக்கத்தில் விஜய் நடிப்பில் உருவாகி கடந்த அக்டோபர் மாதம் வெளியான அவரின் 63ஆவது திரைப்படம் பிகில். அந்தப் படத்தின் பெயரை விஜய் ரசிகர்கள் ட்விட்டரில் கொண்டாடித் தீர்த்தால், #bigil ஹேஷ்டேக் ஆறாவது இடத்தைப் பிடித்துள்ளது. இந்திய அளவில் இடம்பிடித்த ஒரே படம் பிகில்.

#diwali

காலம் செல்ல மக்களின் செயல்பாடுகள் தொழில்நுட்பத்திற்கு ஏற்ப மாறிவருகின்றன. பிறந்த நாள் வாழ்த்து, பண்டிகை நாட்களில் வாழ்த்து மடலை அனுப்பிவந்த மக்கள் தற்போது சமூக வலைதளங்களில் வாழ்த்துக்களை பரிமாறிக்கொள்கின்றனர். தீபாவளி பண்டிகையை ஒட்டி வாழ்த்துகளைப் பகிர்ந்த மக்களால் #diwali ஹேஷ்டேக் ட்ரெண்டாகி ஏழாவது இடத்தைப் பிடித்துள்ளது.

#avengersendgame

மார்வெல் ஸ்டூடியோஸ் சார்பில் அவெஞ்சர்ஸ் நான்காம் பாகமாக எண்ட்கேம் திரைப்படம் சர்வதேச அளவில் பெரும் வசூலை வாரிக்குவித்தது. இது அமெரிக்க நாட்டு சூப்பர் ஹீரோஸ் திரைப்படமாக இருந்தாலும், இந்தியாவில் இப்படத்திற்கு மிகுந்த எதிர்பார்ப்பு இருந்தது. இந்நிலையில், #avengersendgame என்ற ஹேஷ்டேக் இந்திய அளவில் எட்டாவது இடத்தைப் பிடித்துள்ளது.

#ayodhyaverdict

பல ஆண்டுகளாக நீடித்து வந்த அயோத்தி வழக்கில் கடந்த நவம்பர் 9ஆம் தேதி உச்ச நீதிமன்றம் தீர்ப்பு வழங்கியது. அயோத்தி வழக்கில் சர்ச்சைக்குரிய நிலத்தில் ராமர் கோவில் கட்டலாம், இஸ்லாமியர்களுக்கு மசூதி கட்ட 5 ஏக்கர் மாற்று இடம் தரலாம் என்று உச்ச நீதிமன்றம் தீர்ப்பு வழங்கி இருந்தது. இது வரலாற்று நிகழ்வாக அமைந்ததால், #ayodhyaverdict என்ற ஹேஷ்டேக் ஒன்பதாவது இடத்தைப் பிடித்துள்ளது.

#eidmubarak

கடந்த மே மாதம் கொண்டாடப்பட்ட ஈகைத் திருவிழா (ரம்ஜான் பண்டிகை) உலகெங்கிலும் விமர்சையாகக் கொண்டாடப்பட்டது. இதன்காரணமாக #eidmubarak என்ற ஹேஷ்டேக் பத்தாவது இடத்தைப் பிடித்துள்ளது.