நேப்கின்களுக்கு இல்லாதது ஸ்டிக்கர் பொட்டுக்கும், வளையலுக்கும் எதற்கு ஜெயிட்லி சார்!

ஸ்டிக்கர் பொட்டும், வளையல்களும்!

புதிய ஜி.எஸ்.டி திட்டப்படி அந்த வரி பட்டியலில் ஸ்டிக்கர் பொட்டுக்கும், வளையல்களுக்கும் வரி இல்லை என அறிவிக்கப்படிருந்தது.

நேப்கின்!

ஆனால், மாதாமாதம் பெண்களின் அத்தியாவசிய பொருளாக இருக்கும் நேப்கின்களுக்கு இன்னும் அதே 12% வரி நீடிப்பதாகவும் தகவல் குறிப்பிடப்பட்டிருந்தது.

இது தான் இந்திய அரசின் சிந்தனையா?

ஒருவேளை இந்திய பெண்கள் ஸ்டிக்கர் பொட்டு, குங்கமம், மற்றும் வளையல் வாங்குவதன் மூலம், அதற்கு பிடிக்கப்படும் வரி பணத்தை தான் தங்கள் வீட்டு வருமானத்தில் இருந்து சேமித்து வைத்து இல்லறத்தை மேம்படுத்துவார்கள் என இந்திய அரசு எண்ணுகிறதா என்ன?

முக்கிய தகவல்!

இன்றளவும் இந்தியாவில் மாதவிடாய் சுழற்சி காலத்தில் வாழ்ந்து கொண்டிருக்கும் பெண்களில் 88% பெண்கள் நேப்கின் வாங்க முடியாது, வாங்க அணுக முடியாத சூழலில் வாழ்ந்துக் கொண்டிருக்கிறார்கள்.

அவதிகள்!

நேப்கின் பற்றிய விழிப்புணர்வு இல்லாத, நேப்கின் பற்றி அறியாத எத்தனையோ, கிராமப்புற, நகர்களின் வெளிப்புறங்களில் வாழ்ந்து வரும் பெண்கள், பிளாஸ்டிக், பேப்பர், பழைய துணை போன்றவற்றை மாதவிடாய் காலத்தில் தொடர்ந்து பயன்படுத்தி வருகின்றனர்.

பாதிப்பு!

இதனால், அவர்களுக்கே தெரியாமல் கர்ப்பப்பை வாய் புற்றுநோய், இனப்பெருக்க மண்டல தொற்று மற்றும் பல பிரச்சனைகளை சந்தித்து வருகின்றனர். இதற்கு அரசு நேப்கின்களுக்கு வரிவிலக்கு அளித்திருக்கலாமே.

சென்ற ஒரு மாதமாக...

#LahuKaLagaan என்ற பெயரில் தன்னார்வத் தொண்டு நிறுவனம் ஒன்று நேரடியாக நிதி அமைச்சர் அருண் ஜெயிட்லியிடம் நேப்கின்களுக்கு வரிவிலக்கு அளிக்குமாறு கடந்த ஒரு மாத காலமாக பிரச்சாரம் செய்து வந்தனர். இதற்காக சில பிரபலங்கள், காங்கிரஸ் எம்.பி சுஷ்மிதா தேவ் போன்றவர் நேரடியாகவே அவரை சந்தித்தும் பேசினர்.

இது அவசியமா?

பிரெட்க்கு கூட வரிவிலக்கு அளித்துள்ள நமது இந்திய அரசு, பெண்களின் வலிமிகுந்த நாட்களில் உதவியாக இருக்கும் நேப்கின்களுக்கு வரிவிலக்கு அளிக்காதது ஏன்?