டாம் அண்ட் ஜெர்ரியிடம் இருந்து நாம் கற்றுக்கொள்ள வேண்டிய பாடங்கள்!!!

உருவம் ஒரு பிரச்சனை இல்லை

நமது உருவம் ஒரு பிரச்சனை இல்லை. இவ்வுலகில் சாதிக்க ஆறடி உயரம் தேவை என்று எந்த கல்வெட்டிலும், புத்தகத்திலும் பொறிக்கப்படவில்லை. ஜெர்ரியை போல உருவில் சிறியதாக இருந்தாலும் நாம் எந்த வகையிலான தடைகள் வந்தாலும் தகர்க்க முடியும். ஒவ்வொரு எபிசோடிலும் இதை தான் நமக்கு கற்றுத் தருகிறது ஜெர்ரி.

தன்னம்பிக்கை

டாம் அண்ட் ஜெர்ரியை பொறுத்த வரை உருவில் பெரியதாக இருந்தாலும் டாம் கொஞ்சம் பயமுடையது. ஜெர்ரிக்கு அந்த பயம் கிடையாது. தன்னம்பிக்கை அதிகமான ஜெர்ரி, டாம் தன்னை கொல்வதற்கு என்ன திட்டமிட்டாலும் அதை வென்று விடும் அல்லது டாமிற்கே அதை திசை திருப்பிவிடும். ஏன் இதில் வரும் புல்டாகை (Bulldog) கையாள்வதில் கூட மிக நேர்த்தியாக ஜெர்ரி நடந்துக் கொள்ளும். இவையெல்லாம் நாம் ஜெர்ரியிடம் இருந்து கற்றுக் கொள்ள வேண்டியவை.

விடா முயற்சி

எத்தனை முறை தோற்றாலும் விடா முயற்சியுடன் இருக்க வேண்டும் என்பதை நாம் டாமிடம் இருந்து கற்றுக் கொள்ள வேண்டும். எத்தனை முறைகள் தோற்றாலும், மீண்டும் மீண்டும் தானே ஒரு புதிய முயற்சியை கண்டறிந்து அதை பிரயோகிக்க தயாராகும் துணிச்சல் மிகவும் முக்கியமானது.

எதிரியை எதிர்த்து போராடும் குணம்

டாமும் ஜெர்ரியும் எதிரிகளாக இருந்தாலும், இவர்களை குறுக்கு வழியில் அழிக்க வரும் அந்த கருப்பு பூனையை பழிவாங்க இவர்கள் இருவரும் நண்பர்களாகி போராடும் குணம் நாம் அனைவரும் கற்றுக்கொள்ள வேண்டும். நமக்குள் இருக்கும் போட்டியின் காரணமாக மூன்றாவதாய் ஒரு ஆள் வந்து நமது உழைப்பை திருடுவதை தவிர்க்க வேண்டும்.

பகிர்தல் முக்கியம்

சண்டையிடும் குணம் இருந்தாலும் டாம் அண்ட் ஜெர்ரியிடம் உணவை பகிர்தல் குணமும் இருந்திருக்கிறது. நம்மிடம் உள்ளதை பகிர்ந்துக் கொள்ளும் போது நமக்குள் இருக்கும் பகைமை குறைகிறது. இதை உணர்ந்தால் உலகில் போர் வருவதற்கான காரணங்கள் இல்லாமலேயே போய்விடும்.

சண்டையும், காதலும்

சடையிட்டுக் கொள்பவர்களுக்கு மத்தியில் தான் அன்பும் இருக்கும் என கூறுவார்கள். அது போல தான் டாமும் ஜெர்ரியும் சண்டையிட்டுக் கொண்டாலும் இறுதியில் அவர்கள் மத்தியில் இருந்த அன்பின் மிகுதி மிகவும் ஆழமானது. இது போல தான் இல்வாழ்கையும்.