350 அந்தப்புர அழகிகள், 10 மனைவிகள், 88 குழந்தைகள் என ஆலமரமாய் ஆடம்பரமாக வாழ்ந்த இந்திய அரசர் யார் தெரியுமா?

இந்தியாவின் வரலாறு முழுவதும் பல்வேறு மன்னர்கள் தங்களின் வீரத்தால் வரலாற்றில் இடம் பிடித்திருந்தாலும் சில மன்னர்கள் தங்களின் வினோதமான செயல்களால் வரலாற்றில் இடம் பிடித்துள்ளனர். அதில் முக்கியான ஒருவர்தான் மகாராஜா பூபிந்தர் சிங். பாட்டியாலாவைச் சேர்ந்த மகாராஜா பூபிந்தர் சிங் வெறும் ஒரு மன்னர் மட்டுமல்ல, அவரது ஆடம்பரமான வாழ்க்கை முறை, உணவு மீதான விருப்பம் மற்றும் தனித்துவமான பாலியல் ஆசைகள் ஆகியவற்றால் பிரபலமான ஒரு சிறந்த ஆளுமை.

அவரது பழக்கவழக்கங்கள் கற்பனைக்கு எட்டாத அளவிற்கு ஆடம்பரமாக இருந்ததால், அவரைப் பார்க்க வந்த பிரிட்டிஷ் அதிகாரிகள் கூட ஆச்சரியப்பட்டனர். அவரைப் பற்றிய சில சம்பவங்கள் மிகவும் ஆச்சரியமானவை, நம்புவதற்கு கடினமாக இருந்தாலும், அவை அனைத்தும் உண்மைதான்.

உணவுப்பழக்கம்

மகாராஜா பூபிந்தர் சிங்-ன் உணவுப் பழக்கம் மிகவும் பிரபலமானது, குறிப்பாக பரோட்டாக்கள் மற்றும் கபாப்களை விரும்பினார், மேலும் ஒரு வேளைக்கு ஐந்து பேர் சாப்பிடும் அளவிற்கான உணவை அவர் சாப்பிடுவார் என்று கூறப்படுகிறது. ஒருமுறை, ஒரு பிரிட்டிஷ் அதிகாரியுடன் இரவு உணவின் போது, ​​அவரது தட்டில் சுமார் 15 வகையான பரோட்டாக்கள், கபாப்கள் மற்றும் அவரது பிரபலமான பாட்டியாலா விஸ்கி ஆகியவை நிறைந்திருந்ததாக கூறப்படுகிறது.

மகாராஜா பூபிந்தர் சிங்-ன் தோற்றம்

மகாராஜா பூபிந்தர் சிங் ஒரு உயரமான மனிதர், அவர் 6 அடி 4 அங்குல உயரமும் சுமார் 136 கிலோ எடையும் கொண்டிருந்தார். அவர் அக்டோபர் 12, 1891 இல் பிறந்தார், மேலும் அவர் குழந்தையாக இருந்த போது 'டிக்கா சாஹிப்' என்று அன்பாக அழைக்கப்பட்டார். துரதிர்ஷ்டவசமாக, அவர் தனது 9 வயதில் தனது தந்தையை இழந்தார், அதன்பின் விரைவில், அவர் பாட்டியாலாவின் ஆட்சியாளரானார். அவரது வாழ்க்கை ஆடம்பரம், கவர்ச்சி மற்றும் மறக்க முடியாத சம்பவங்களால் நிறைந்திருந்தது.

மகாராஜா பூபிந்தர் சிங்-ன் ஆர்வங்கள்

மகாராஜா பூபிந்தர் சிங் பல விஷயங்களில் ஆர்வங்களைக் கொண்டவராக இருந்தார், அவர் ஒரு விளையாட்டு வீரர், போர் வீரர், இசை மற்றும் கலையில் ஆர்வம் கொண்டவராக இருந்தார், மேலும் ஆடம்பரமும், இன்பமும் நிறைந்த வாழ்க்கையை வாழ்வதற்கும் பெயர் பெற்றவராக இருந்தார். அவரது ஆளுமை பல அம்சங்களைக் கொண்டிருந்தது, அவரைச் சந்தித்தவர்கள் பெரும்பாலும் அவரின் வாழ்க்கை முறையைப் பார்த்து ஆச்சரியப்பட்டனர்.

வரலாற்றாசிரியர்களான டொமினிக் லாபியர் மற்றும் லாரி காலின்ஸ் ஆகியோர் தங்கள் "Freedom at Midnight" என்ற புத்தகத்தில், மகாராஜா ஒரு நாளைக்கு 10 கிலோ உணவை உண்பார் என்று கூறியுள்ளனர். அவருக்கு, தேநீருடன் இரண்டு முழு கோழிகளை சாப்பிடுவது மிகவும் சாதாரணமானது. அதுமட்டுமின்றி உலகின் மிகச்சிறந்த 500 குதிரைகள் கொண்ட ஒரு பெரிய தொழுவத்தையும் அவர் சொந்தமாக கொண்டிருந்தார்.

ஆடம்பரமான வாழ்க்கை முறை

அவரது ஆடம்பரமான வாழ்க்கை முறை மிகவும் முக்கியமானது அவரது பாலியல் வாழ்க்கை. அவரது மனைவிகளையும் சேர்த்து அவரது அரண்மனையில் மொத்தம் 350 பெண்கஇருந்தார்கள், மேலும் அவர்கள் மூலம் 88 குழந்தைகளை பெற்றுக்கொண்டார், அவர்களில் 52 பேர் மட்டுமே பதின்ம வயது வரை உயிர்பிழைத்தனர். அவரது பாலியல் வலிமையை அதிகரிக்க, அவர் அரிய மூலிகைகள் மற்றும் மசாலாப் பொருட்களிலிருந்து தயாரிக்கப்பட்ட சிறப்பு மருந்துகளை எடுத்துக் கொண்டார். அவர் பத்து பெண்களை முறையாக திருமணம் செய்து கொண்டார், மேலும் அவரது விருப்பமான மனைவி ராஜ்மாதா விமலா கவுர், அவர் அடிக்கடி அவருடன் வெளிநாடுகளுக்குச் சென்று பொதுவெளியில் தோன்றினார்.

அந்தப்புர பெண்களின் மீதான கவனிப்பு

மகாராஜா பூபிந்தர் சிங் தனது அந்தப்புரத்தில் உள்ள பெண்கள் மீது அதிக கவனம் செலுத்தினார். அவர்கள் தனக்குப் பிடித்த விதத்தில் சரியாக இருப்பதை அவர் உறுதி செய்தார். இதற்காக, அவர் தனிப்பட்ட விதத்தில் வாசனை திரவியங்கள், சிகையலங்கார நிபுணர்கள், நகைக்கடைக்காரர்களை வேலைக்கு அமர்த்தினார், தேவைப்பட்டால் அவர்களின் தோற்றத்தை மாற்ற பிரான்ஸ் மற்றும் பிரிட்டனில் இருந்து பிளாஸ்டிக் அறுவை சிகிச்சை நிபுணர்களையும் வரவழைத்தார்.

கேளிக்கையான வாழ்க்கை

ஹென்றி பூல் & கோ வெளியிட்ட ஜேம்ஸ் ஷெர்வுட்டின் ஒரு கட்டுரையில், மகாராஜா பெரும்பாலும் அரண்மனையில் இருந்து தனக்குப் பிடித்த பெண்களை தனது நீச்சல் குளத்தைச் சுற்றி ஆடைகள் இல்லாமல் உட்கார வைப்பார் என்று குறிப்பிடப்பட்டிருந்தது. நீந்தும்போது, அவர்களை முத்தமிடவோ அல்லது அவர்கள் கையால் விஸ்கி ஊற்றவோ அவர்களை நிறுத்தி வைப்பார். அவரது படுக்கையறையின் கூரை மற்றும் சிற்பங்கள் கூட கவர்ச்சிகரமான பெண் சிலைகளால் அலங்கரிக்கப்பட்டிருந்தது, இது அவரது வாழ்க்கை முறை எவ்வளவு ஆடம்பரமாகவும், வெளிப்படையாகவும் இருந்தது என்பதைக் காட்டுகிறது.

கார் கலெக்ஷன்கள்

மகாராஜா பூபிந்தர் சிங்கிடம் சொந்தமாக ஒரு விமானம் இருந்தது, மேலும் அவர் 44 ரோல்ஸ் ராய்ஸ் கார்களை வைத்திருந்தார். கிரிக்கெட் மீது அவருக்கு தீவிர ஆர்வம் இருந்தது, மேலும் அவர் இந்திய கிரிக்கெட்டின் தந்தை என்று அழைக்கப்படுகிறார். 1911 ஆம் ஆண்டில், அவர் இந்திய கிரிக்கெட் அணியை இங்கிலாந்துக்கு அழைத்துச் சென்றார், மேலும் 1915 மற்றும் 1937 க்கு இடையில், அவர் கிரிக்கெட் போட்டிகளில் விளையாடினார்.