இந்தியா-லண்டன் வரை 11 நாடுகள் வழியாக சென்ற உலகின் நீண்ட பயணத்தின் டிக்கெட் கட்டணம் எவ்வளவு தெரியுமா?

தற்போதைய காலகட்டத்தில் நாடு விட்டு நாடு செல்வது என்பது அவ்வளவு கடினமான காரியமல்ல. கொஞ்சம் நேரமும், பணமும் செலவழித்தால் போதும் எந்த நாட்டுக்கு வேண்டுமென்றாலும் விமானத்தில் எளிதில் சென்று விடலாம். ஆனால் கடந்த நூற்றாண்டில் நாடு விட்டு நாடு செல்லும் பயணம் இவ்வளவு சுலபமாக இல்லை. நாட்கள் முதல் வாரங்கள் வரை கப்பலில் பயணிக்க வேண்டியிருந்தது.

இந்தியாவை ஆங்கிலேயர்கள் ஆண்ட போது இந்திய போக்குவரத்தில் பல மாற்றங்களை மேற்கொண்டனர். அதில் சில மாற்றங்கள் இந்திய சுதந்திரத்திற்கு பிறகும் தொடர்ந்தது. இந்தியாவிலிருந்து லண்டனுக்கு பேருந்தில் செல்லும் வசதி கடந்த காலத்தில் இந்தியாவில் இருந்தது என்று சொன்னால் உங்களால் நம்ப முடியுமா?

பல நாடுகளைக் கடந்து செல்லும் ஒரு நீண்ட பேருந்துப் பயணத்தை நீங்கள் எப்போதாவது கற்பனை செய்து பார்த்திருக்கிறீர்களா? இது நம்புவதற்கு கடினமாக இருந்தாலும், கிட்டதட்ட 70 ஆண்டுகளுக்கு முன்பு இது உண்மையில் இந்தியாவில் நடைமுறையில் இருந்தது. பேருந்து மூலம் கடக்கக்கூடிய உலகின் மிக நீண்ட பாதையை சுமார் 110 நாட்களில் நிறைவு செய்வதற்கென்றே வடிவமைக்கப்பட்ட ஒரு வரலாற்றுச் சிறப்புமிக்க பேருந்தில் இப்பயணம் மேற்கொள்ளப்பட்டது.

உலகின் மிகவும் நீண்ட பயணம்

சமூக வலைதளத்தில் லண்டனில் உள்ள விக்டோரியா கோச் நிலையத்தில், லண்டனிலிருந்து கொல்கத்தா வரையிலான உலகின் மிக நீண்ட பேருந்து வழித்தடத்தின் முதல் பயணத்தில் ஏறுவதற்காக மக்கள் வரிசையில் நிற்கும் புகைப்படம் வைரலானது. அந்த புகைப்படம் 1957-ஆம் ஆண்டு ஏப்ரல் 15-ஆம் தேதியைச் சேர்ந்ததாகும். அந்தப் பேருந்தின் மீது 'London-Calcutta-London' என வழித்தடமும் குறிக்கப்பட்டிருந்தது.

கல்கத்தாவிலிருந்து மக்கள் பேருந்து மூலம் லண்டனுக்கும், அங்கிருந்து மீண்டும் கல்கத்தாவிற்கும் பயணித்த, அந்த அசாதாரண பயணம் அரை நூற்றாண்டுகளுக்கு முன்னர் நிகழ்ந்தது. 1950-களில் பயணிகள் சேவைக்காக 21 ஆண்டுகள் பயன்படுத்தப்பட்ட, 'ஆல்பர்ட்' (Albert) எனும் வரலாற்றுச் சிறப்புமிக்க அந்தப் பேருந்து குறித்து தெரிந்து கொள்ள அனைவரும் ஆர்வம் காட்டுகின்றனர். இந்தியா வழியாக அமைந்த இந்தப் பயணம் கிட்டதட்ட 50 நாட்களில் நிறைவடைந்தது; இதற்கான ஒரு வழிப் பயணச்சீட்டின் விலை 85 பவுண்டுகளாக இருந்தது. திரும்பும் பயணத்திற்கான கட்டணம் 65 பவுண்டுகளாக நிர்ணயிக்கப்பட்டிருந்தது. இன்றைய மதிப்பில் கணக்கிட்டால், ஒரு வழிப் பயணத்திற்கான அதே கட்டணம் சுமார் 7,963 ரூபாயாகவும், திரும்பும் பயணத்திற்கான கட்டணம் சுமார் 6,089 ரூபாயாகவும் இருக்கும்.

பேருந்தின் வழித்தடம்

இந்த பேருந்து பயணம் லண்டனிலிருந்து தொடங்கி, பெல்ஜியம், மேற்கு ஜெர்மனி, ஆஸ்திரியா, யூகோஸ்லாவியா, பல்கேரியா, துருக்கி, ஈரான், ஆப்கானிஸ்தான், மேற்கு பாகிஸ்தான் வழியாக இறுதியாக இந்தியா வந்தடைந்தது. பயணம், உணவு மற்றும் தங்குமிடம் உட்பட மொத்த பயணச் செலவு 145 பவுண்டுகள் (ரூ. 13,590) என்று இணையத்தில் பரவும் ஒரு பயணச்சீட்டில் குறிப்பிடப்பட்டுள்ளது. இருப்பினும், இந்தியாவில் செல்லும் வழித்தடமே மிகவும் சுவாரஸ்யமான பகுதி என்று கூறப்படுகிறது; அது தனது இறுதி இலக்கான கல்கத்தாவை அடைய, டெல்லி, ஆக்ரா, அலகாபாத், பனாரஸ் போன்ற நகரங்களைக் கடந்து சென்றது.

மிகவும் ஆடம்பரமான பயணம்

ஆல்பர்ட் பேருந்து பயணம் மிகவும் ஆடம்பரமானதாக இருந்தது. கீழ்த்தளத்தில் வாசிப்பு மற்றும் உணவு உண்ணும் ஓய்வறையும், மேல்தளத்தில் முன்புறக் கண்காணிப்பு ஓய்வறையும் இருந்தன. அனைத்து வசதிகளுடன் கூடிய முழுமையான சமையலறையும் இருந்தது. வானொலி மற்றும் பதிவு செய்யப்பட்ட இசையுடன் விருந்துகளுக்கான ஏற்பாடுகள் செய்யப்பட்டிருந்தன. மேலும் பயணிகளுக்கு அவர்கள் விரும்பிய உயர்தர உணவுகள் பரிமாறப்பட்டன.

ஆல்பர்ட் பேருந்தின் சாகசங்களும், முடிவும்

ஆல்பர்ட் பேருந்து இயற்கை எழில் கொஞ்சும் பாதைகள் நிறைந்த அதன் சாகச பயணத்தைத் தவிர , அது ஆக்ராவில் உள்ள தாஜ்மஹால், டெல்லியில் உள்ள மயில் சிம்மாசனம் மற்றும் ராஜ்பாத் ஆகிய இடங்களுக்கும் சென்றது. பின்னர், பனாரஸின் அற்புதமான சுற்றுலாத் தலங்கள், ஆப்கானியப் பழங்குடியினர், கம்யூனிஸ்ட் பல்கேரியா மற்றும் கைபர் கணவாய் ஆகிய இடங்களுக்கும் சென்றது. அதேபோல மற்ற லண்டன் பேருந்துகள், காஸ்பியன் கடலின் கடற்கரை மற்றும் துருக்கியில் உள்ள கோல்டன் ஹார்ன், அத்துடன் நீல டானூப் மற்றும் ரைன் பள்ளத்தாக்கு உள்ளிட்ட சில அழகான இடங்களுக்கும் சென்றது. இருப்பினும், நல்லவை அனைத்தும் ஒருநாள் முடிவுக்கு வருவது போல, இந்த சாகசப் பயணமும் முடிவுக்கு வந்தது. 1976 ஆம் ஆண்டு இந்தியா-லண்டன் பயணம் அதிகாரப்பூர்வமாக முடிவுக்கு வந்தது.