அன்றாடம் பயன்படுத்தும் பொருட்களில் இருந்து வெளிவரும் பாலின் நாற்றத்தை நீக்க சில வழிகள்!!!

உடனே அலசவும்

பாட்டில், கார்பெட், துணி போன்றவற்றில் பாலின் துர்நாற்றம் வீசாமல் இருக்க வேண்டுமானால், அதனை காய வைக்காமல், ஈரமாக இருக்கும் போதே கழுவ வேண்டும். அதிலும் சோப்பு நீரில் சிறிது நேரம் ஊற வைத்து, பின் தேய்த்து கழுவ வேண்டும். அதுவே துணியில் என்றால், சுத்தமான நீரில் அலசிவிட்டு, பின் சோப்பு பயன்படுத்தி துவைக்க வேண்டும்.

சுத்தப்படுத்தும் நீர்மம்

கடைகளில் விற்கப்படும் நறுமணமிக்க நீர்மங்களைக் கொண்டு துணி மற்றும் தரைவிரிப்புக்களில் உள்ள பால் நாற்றத்தைப் போக்கலாம். இல்லாவிட்டால் சோப்பு நீர் வேண்டுமானாலும் பயன்படுத்தலாம். அதிலும் சோப்பு நீர் பயன்படுத்துவதாக இருந்தால், அதனை சோப்பு நீரில் 20 நிமிடம் ஊற வைத்து, பின் சுத்தமான நீரில் அலச வேண்டும்.

எலுமிச்சை

எலுமிச்சையில் உள்ள நறுமணம் அனைத்து விதமான துர்நாற்றத்தையும் போக்கிவிடும். அதற்கு எலுமிச்சை துண்டைக் கொண்டு, பாத்திரங்கள் மற்றும் பாட்டிலை தேய்த்து கழுவ வேண்டும். இல்லாவிட்டால், எலுமிச்சை சாற்றினை நீரில் கலந்து, அதில் பாத்திரங்களையோ அல்லது பாட்டிலையோ ஊற வைத்து, பின் சோப்பு பயன்படுத்தி கழுவ வேண்டும். இதனால் பாலின் துர்நாற்றம் போய்விடுவதோடு, கறைகள் முற்றிலும் நீங்கிவிடும்.

வினிகர்

பால் கூட கறைகளை ஏற்படுத்தும். எனவே அப்போது வினிகரைப் பயன்படுத்தினால், பாலினால் ஏற்பட்ட கறைகள் நீங்குவதோடு, பாலின் துர்நாற்றமும் போய்விடும்.

சுடுநீர்

பாலை காய்ச்சிய பின்னர், அதில் சுடுநீரை ஊற்றி ஊற வைத்து, பின் சோப்பபு பயன்படுத்தி கழுவினாலும் துர்நாற்றம் நீங்கும். ஒருவேளை அப்படி போகாவிட்டால், அப்போது எலுமிச்சை துண்டு கொண்டு தேய்த்து கழுவுங்கள்.