பழங்கள் ப்ரெஷாக இருந்தாலும் அதற்குள் புழுக்கள் இருக்க காரணம் என்ன? அவை எப்படி பழத்திற்குள் செல்கிறது தெரியுமா?

ஆப்பிள், கொய்யாக்காய், சீத்தாப்பழம், மாம்பழம் என நமக்கு பிடித்த பெரும்பாலான பழங்களில் சில சமயங்களில் புழுக்கள் இருக்கும். பழங்களை விரும்பி சாப்பிடுபவர்களுக்கு இது மிகவும் மோசமான அனுபவமாக இருக்கும். ஆனால் நாம் பார்த்து பார்த்து ப்ரெஷாக, எந்த பாதிப்பும் இல்லாததாக பார்த்து வாங்கும் பழங்களை நறுக்கி பார்க்கும் போது அவற்றுக்குள் புழுக்கள் எப்படி வந்தது என்று எப்போதாவது சிந்தித்து உள்ளீர்களா?

How Does Worms Get Inside Fresh Fruits

பழத்தின் வெளிப்புறம் எந்தக் குறையுமின்றி மிகவும் ப்ரெஷாக இருக்கும்போது, ​​அதற்குள் எப்படிப் புழுக்கள் வருகின்றன என்பது பலருக்குப் புரியாத புதிராகவே இருக்கிறது. தோலில் எந்த வெட்டோ அல்லது துளையோ இல்லாத ஒரு பழத்திற்குள் புழுக்கள் எப்படி உருவாக முடியும்? இதற்கான சுவாரஸ்யமான காரணங்கள் என்னென்ன என்று இந்த பதிவில் தெரிந்து கொள்ளலாம்.

பூச்சிகளின் தாக்குதல்

உண்மையில் பழம் மரத்தில் பழுத்த பிறகு பூச்சிகள் அதற்குள் நுழைவதில்லை. இந்தப் பிரச்சனை தொடங்குவது பழம் மிகச்சிறிய மொட்டாகவோ அல்லது பிஞ்சாகவோ இருக்கும்போதே ஏற்படுவதாகும். 'பழ ஈக்கள்' என்று அழைக்கப்படும் ஒரு வகை பூச்சிகள், பழம் மிகவும் சிறியதாக இருக்கும்போதே அதன் மீது வந்து அமர்கின்றன. அவை தங்கள் உடலில் உள்ள ஊசி போன்ற உறுப்பைப் பயன்படுத்தி, பழத்தின் தோலைத் துளைத்து, உள்ளே முட்டைகளை இடுகின்றன. அந்த நிலையில், அந்தச் சிறிய துளை நம் வெறும் கண்களுக்குத் துளியும் தெரிவதில்லை.

பழத்தின் இந்த துளையை தோல் சரிசெய்கிறது

மனிதர்களின் தோலில் ஏற்படும் சிறிய காயங்கள் சில நாட்களில் எந்த தழும்பும் இல்லாமல் ஆறிவிடுவது போலவே, ஈக்கள் பழத்தில் ஏற்படுத்தும் துளைகளிலும் இதே நிகழ்வு நடைபெறுகிறது. பழம் பெரிதாக வளரும்போது, ​​அதன் திசுக்களும் வளர்ந்து, பூச்சியால் உருவாக்கப்பட்ட அந்த நுண் துளையை முழுமையாக மூடிவிடுகின்றன. இந்த இயற்கையான குணப்படுத்தும் செயல்முறையினால், பழம் நன்கு பழுத்த பிறகு அதன் வெளிப்புறத்தில் எந்தவொரு துளையையோ அல்லது பூச்சி நுழைந்ததற்கான அடையாளத்தையோ நம்மால் பார்க்க முடியாது.

புழுக்கள் பழத்தின் உட்பகுதியை சாப்பிட்டு ஆரோக்கியமாக வளர்கின்றன

பூச்சிகளின் முட்டைகள் பழத்திற்குள் பாதுகாப்பாக இருக்கின்றன. சில நாட்களுக்குப் பிறகு அவை பொரிந்து சிறிய புழுக்களாக மாறுகின்றன. வெளிப்புறச் சூழலிலிருந்து பாதுகாப்பாக இருக்கும் இந்தப் புழுக்கள், பழத்தின் சத்தான மற்றும் இனிப்பான உட்பகுதியை சாப்பிட்டு ஆரோக்கியமாக வளர்கின்றன. நாம் கத்தியால் பழத்தை வெட்டும் வரை, அவை உள்ளேயே மறைந்திருக்கின்றன.

தண்டுப் பகுதி வழியாக உள்ளே நுழைவது

சில சமயங்களில், பழத்தின் மீதுள்ள இயற்கையான நுண் துளைகள் வழியாகவோ அல்லது பழம் மரத்துடன் இணைந்திருக்கும் தண்டுக்கு அருகிலுள்ள மிகச்சிறிய விரிசல்கள் வழியாகவோ பூச்சிகள் உள்ளே நுழைந்து முட்டையிடுகின்றன. பின்னர் அவை முட்டையிட்டு வளர்ந்து அதே சுழற்சியை செய்கின்றன. இதன்மூலம், ஒரு பழம் வெளிப்புறத்தில் எவ்வளவு பளபளப்பாகவும், எந்தக் குறையுமின்றித் துல்லியமாகவும் தெரிந்தாலும், அதன் ஆரம்ப வளர்ச்சி நிலையில் பூச்சிகள் தாக்கியிருந்தால், உள்ளே புழுக்கள் இருப்பது மிகவும் இயல்பான ஒன்றுதான் என்பது தெளிவாகிறது. முடிந்தவரை இந்த சிக்கலைத் தவிர்க்க, பழங்களை வாங்கும்போது மிகவும் மென்மையாக மாறிய பழங்களைத் தவிர்த்து, உறுதியான பழங்களைத் தேர்ந்தெடுக்க வேண்டும். மேலும், பழத்தை சாப்பிடுவதற்கு முன்பு அதை வெட்டிப் பார்ப்பது எப்போதும் பாதுகாப்பானது.

Story first published: Friday, November 20, 2026, 17:18 [IST]
Desktop Bottom Promotion