World Blood Donor Day 2022: யாரெல்லாம் இரத்த தானம் செய்யக்கூடாது தெரியுமா?

யாரெல்லாம் இரத்த தானம் செய்ய முடியாது?

ஒருவர் இரத்தத்தை தானம் செய்ய விரும்பும் அளவுக்கு, உலக சுகாதார அமைப்பு வகுத்துள்ள தேவைகளை அறிந்து கொள்வது அவசியம். தகுதியற்ற ஒருவரிடம் இருந்த எடுக்கப்படும் இரத்தத்தை, நோயாளி ஒருவருக்கு உட்செலுத்தும் போது, அது நோயாளியின் ஆரோக்கியத்தை மோசமாக்கும். எனவே யார் இரத்த தானம் செய்யலாம் அல்லது செய்யக்கூடாது என்பதை தெரிந்து வைத்திருக்க வேண்டியது அவசியம். இப்போது இரத்த தானம் செய்ய ஒருவர் தகுதியற்றவராக இருப்பதற்கான சில காரணங்கள் குறித்து காண்போம்.

சமீபத்தில் இரத்தம் தானம் செய்தவர்

இரத்தத்தை தானம் வழங்க நினைப்பவர் 2 மாதங்கள் அல்லது 56 நாட்களுக்கு ஒருமுறை மட்டுமே இரத்த தானம் செய்ய வேண்டும். தானமாக வழங்குபவர் நல்ல ஆரோக்கியத்துடனும், பாதுகாப்பாகவும் இருக்க வேண்டியதும் அவசியம் அல்லவா!

கர்ப்பிணி

கர்ப்பிணி பெண்கள் இரத்த தானம் செய்ய தகுதியற்றவர்கள். கர்ப்ப காலத்தில் பெண்கள் இரத்த சோகையால் பாதிக்கப்படும் வாய்ப்பு அதிகம் உள்ளது. இந்நிலையில் கர்ப்பிணிகள் இரத்த தானம் செய்தால், அது இரும்புச்சத்து குறைபாட்டின் அபாயத்தை மேலும் அதிகரிக்கலாம்.

புதிய துளையிட்டிருந்தால்...

நீங்கள் கடந்த 3 மாதங்களில் உடலில் எங்கேனும் துளையிட்டிருந்தால், அதாவது மூக்கு குத்துவது, தொப்புளில் வளையம், நாக்கில் வளையம் என்று செய்திருந்தால், அவர்களும் இரத்த தானம் செய்வதற்கு தகுதியற்றவராக இருக்கலாம்.

காய்ச்சல் அல்லது சளி

காய்ச்சல் அல்லது சளியால் பாதிக்கப்பட்டிருந்தால், அவர்களும் இரத்த தானம் செய்ய தகுதியற்றவராக இருக்கலாம். இருப்பினும், உடல் நிலை சரியான பின்னர், இத்தகையவர்கள் இரத்தம் தானம் செய்யலாம்.

புதிய டாட்டூ

உடலில் துளையிடுவது போன்றே, கடந்த 3 மாதங்களில் உடலில் புதிய டாட்டூக்களை குத்தியிருந்தால், அத்தகையவர்களும் இரத்த தானம் செய்ய தகுதியற்றவர்களாவர். எனவே இந்த விஷயத்தில் கவனமாக இருங்கள்.

எடை குறைவு

நீங்கள் மிகவும் எடை குறைவுடன் இருந்தால், அதாவது 50 கிலோவிற்கு குறைவான எடையில் இருந்தால், இரத்த தானம் செய்ய ஊக்குவிக்கப்படுவதில்லை. இம்மாதிரியான நிலையில் உள்ளவர்கள் இரத்த தானம் வழங்கினால், அது அவரின் ஆரோக்கியத்திற்கு தான் தீங்கு விளைவிக்கும்.

வயது

17 வயதிற்கு மேற்பட்டவர்கள் தான் இரத்த தானம் செய்ய தகுதியானவர்கள். இந்த வயதிற்கு பின் எந்த வயதுடையவர்களும் இரத்த தானம் செய்யலாம். ஆனால் நாள்பட்ட நோயால் பாதிக்கப்பட்டிருந்தால், இரத்த தானம் செய்யக்கூடாது.

உயர்/தாழ் இரத்த அழுத்த பிரச்சனை

ஒருவேளை உயர் இரத்த அழுத்தம் அல்லது தாழ் இரத்த அழுத்தம் கொண்டிருந்தால், அத்தகையவர்கள் இரத்த தானம் செய்ய தகுதியற்றவர்களாவர். குறிப்பாக தாழ் இரத்த அழுத்தம் கொண்டவர்கள் இரத்த தானம் செய்தால், அவர்களின் உடல்நிலை மோசமாகலாம்.

காசநோய்/டிபி

செயலில் உள்ள காசநோயால் பாதிக்ககப்பட்டிருந்தால், இரத்த தானம் செய்ய தகுதியற்றவராக இருக்கலாம். ஏனெனில் காசநோயாளிகளின் உடலில் இருந்து பெறப்படும் இரத்தம் மற்றொருவரின் உடலுக்குள் எளிதில் செல்ல வாய்ப்புள்ளது.

எய்ட்ஸ்

காசநோய் போன்றே எய்ட்ஸ் நோயாளிகளும் இரத்த தானம் செய்ய தகுதியற்றவர்களாவர். ஏனென்றால், இரத்த தானம் செய்பவரின் உடலில் உள்ள எய்ட்ஸ் கிருமிகள் இரத்தத்தைப் பெறுபவரின் உடலுக்குள் எளிதில் செல்லலாம்.

எனவே இரத்த தானம் செய்வதற்கு முன், நீங்கள் இரத்த தானம் செய்ய தகுதியுள்ளவரா என்பதை உறுதிபடுத்திக் கொண்டு பின் இரத்த தானம் செய்யுங்கள்.