தினமும் தேங்காய் எண்ணெய் கொண்டு ஆயில் புல்லிங் செய்வதால் என்னென்ன நன்மைகள் கிடைக்கும் தெரியுமா?

பற்குழியை சுத்தம் செய்கிறது

தேங்காய் எண்ணெயால் ஆயில் புல்லிங் செய்யும் போது, அது பற்குழியில் உள்ள நச்சுக்களை வெளியேற்றுகிறது. மேலும் இது உடலில் இருந்து பாக்டீரியாக்கள் மற்றும் பிற நுண்ணுயிரிகளை வெளியேற்றி, பாக்டீரியாக்களின் சுமையைக் குறைக்கிறது.

பல் சொத்தையைக் குறைக்கிறது

குழந்தைகள் முதல் பெரியவர்கள் வரை பல் சொத்தையால் பாதிக்கப்படுகின்றனர். சொத்தை பல் கடுமையான பல் வலி மற்றும் பல் இழப்பை ஏற்படுத்தும். பற்கள் சொத்தையாவதற்கு ஸ்ட்ரெப்டோகாக்கஸ் மியூட்டன்ஸ் என்ற பாக்டீரியா ஆகும். தேங்காய் எண்ணெயில் உள்ள லாரிக் அமிலம் இந்த பாக்டீரியாவை திறம்பட அகற்ற உதவுகிறது. இதன் விளைவாக பற்கள் சொத்தையாவது குறைகிறது.

வாய் துர்நாற்றத்தைத் தடுக்கும்

வாய் துர்நாற்றமானது சொத்தை பற்களில் உள்ள கெமிக்கல்கள் மற்றும் வாயுக்களால் ஏற்படுகிறது. தினமும் ஆயில் புல்லிங் செய்து வந்தால், அது சொத்தை பற்களில் உள்ள பாக்டீரியாக்களை அழித்து வெளியேற்றி, வாய் துர்நாற்றத்தைத் தடுக்கிறது.

ஈறு நோய்களை சரிசெய்கிறது

பற்களில் பாக்டீரியாக்கள் குவியும் போது, அது ஈறு நோய்களை உண்டாக்குகிறது. ஆனால் ஆயில் புல்லிங் தினமும் செய்யும் போது, அது பற்கள் மற்றும் ஈறுகளுக்குள் ஆழமாக சென்று, பாக்டீரியாக்கள் மற்றும் பிற நுண்ணுயிரிகளை அகற்ற உதவி புரிகிறது. இதன் விளைவாக ஈறு நோய்களின் அபாயம் குறைகிறது.

பற்களை வெண்மையாக்கும்

தேங்காய் எண்ணெய் கொண்டு தினமும் ஆயில் புல்லிங் செய்யும் போது, அது பற்களில் படிந்துள்ள கிருமிகள் மற்றும் மஞ்சள் படலத்தை நீக்கி, இயற்கையாக பற்களை வெண்மையாக்குகிறது. மேலும் இது பற்களை பளபளப்பாகவும் பராமரிக்க உதவுகிறது. எனவே உங்கள் பற்கள் மஞ்சள் நிறத்தில் அசிங்கமாக இருந்தால், ஆயில் புல்லிங்கை முயற்சி செய்யுங்கள்.

ஆயில் புல்லிங் செய்வது எப்படி?

* காலையில் எழுந்ததும் 1-2 டேபிள் ஸ்பூன் தேங்காய் எண்ணெயை வாயில் ஊற்றி, நன்கு 10 நிமிடம் கொப்பளிக்க வேண்டும்.

* பின் கொப்பளித்த எண்ணெயை துப்ப வேண்டும். அப்போது எண்ணெயானது வெள்ளை நிறத்தில் காணப்படும்.

* பின்பு குளிர்ந்த நீரால் ஒருமுறை வாயைக் கழுவ வேண்டும்.

* பிறகு ஃப்ளூரைடு உள்ள டூத் பேஸ்ட் கொண்டு பற்களைத் துலக்க வேண்டும்.