அடிக்கடி இந்த இடத்துல வலிக்குதா? அப்ப உடம்புல கொலஸ்ட்ரால் அதிகமா இருக்க வாய்ப்பிருக்கு.. உஷார்..

கொலஸ்ட்ரால் எப்படி இடுப்பு தசைகளை பாதிக்கிறது?

பொதுவாக உடலில் கொலஸ்ட்ரால் அதிகரிக்கும் போது, அது இரத்த நாளங்களில் ப்ளேக்குகளை உருவாக்கும். இந்த ப்ளேக்குகள் இரத்த ஓட்டத்தில் தடையை ஏற்படுத்தும். இப்படி இரத்த ஓட்டத்தில் தடை ஏற்படும் போது, உடலில் உள்ள பல தசைகளுக்கு போதுமான ஆக்ஸிஜன் கிடைக்காமல், அப்பகுதியில் வலியைத் தூண்டிவிடும். இந்நேரத்தில் அதிகளவு வேலையை செய்யும் போது, கடுமையான வலியை சந்திக்க நேரிடுகிறது.

அப்படி உடலில் கொலஸ்ட்ரால் அதிகரிப்பால் பாதிக்கப்படக்கூடிய தசைகளில் ஒன்று தான் இடுப்பு தசைகள். உயர் கொலஸ்ட்ரால் பிரச்சனையால் பாதிக்கப்பட்ட பலர் கடுமையான இடுப்பு வலியை ஆரம்ப காலத்தில் சந்தித்ததாக கூறியுள்ளனர்.

இடுப்பு தசைகளுக்கும், கொலஸ்ட்ராலுக்கும் உள்ள தொடர்பு

பெரும்பாலானோர் இடுப்புப் பகுதியில் வலியை அனுபவித்தால், அது பெரும்பாலும் சிறுநீரக பிரச்சனை அல்லது எலும்பு பிரச்சனையாக இருக்கக்கூடும் என்று நினைத்து, அதை சாதாரணமாக விட்டுவிடுகிறார்கள். இதற்கு காரணம் நிறைய பேருக்கு கொலஸ்ட்ராலுக்கும், இடுப்பு தசைகளுக்கும் இருக்கும் தொடர்பு பற்றி தெரியாமல் இருப்பது தான்.

ஆனால் இரத்த நாளங்களில் ப்ளேக்குகள் உருவாகும் போது, அது இதயத்திற்கு செல்லும் இரத்தத்தில் தடையை ஏற்படுத்தி பெருந்தமனி தடிப்பு நோயை ஏற்படுத்துவதோடு மட்டுமின்றி, இடுப்பு, கால்கள் மற்றும் பாதங்களையும் பாதிப்பதாக சுகாதார அறிக்கைகள் கூறுகின்றன.

உயர் கொலஸ்ட்ரால் இருந்தால் எப்போதெல்லாம் இடுப்பு வலி ஏற்படும்?

நீங்கள் லேசான மற்றும் சிறிய வேலைகளை செய்தாலும் இடுப்பு பகுதியில் கடுமையான வலியை சந்தித்தால், உடனே மருத்துவரை சந்திக்க வேண்டும். அதாவது நீங்கள் நடக்கும் போது கடுமையான இடுப்பு வலியை அனுபவிக்கலாம். இது தவிர இந்த வலியானது மெதுவாக பிட்டம், தொடை மற்றும் கணுக்கால் வரையும் பரவலாம். ஆனால் வலியின் தீவிரம் மற்றும் வலியை அனுபவிக்கும் பகுதி போன்றவை ஒவ்வொருவருக்கும் உள்ள கொலஸ்ட்ராலின் அளவுகளுக்கு ஏற்பட மாறுபடும். பெரும்பாலும் இந்த வலியானது ஓய்வு எடுத்தால் போய்விடும். ஆனால் மீண்டும் நடக்கும் போது வலியை சந்திக்கக்கூடும்.

உயர் கொலஸ்ட்ராலுடன் தொடர்புடைய பிற அறிகுறிகள்

உடலில் கொலஸ்ட்ரால் வரம்புக்கு மீறி அதிகமாக இருந்தால், இடுப்பு பகுதிக்கு கீழே பிற அறிகுறிகளையும் சந்திக்கக்கூடும். அவை:

* கால்களில் முடி உதிர்தல்

* கால்கள் அடிக்கடி மரத்துப் போதல்

* கால்விரல் நகங்கள் உடைதல்

* கால்களில் ஏற்படும் காயங்கள் ஆறாமல் இருத்தல்

* கால்கள் வெளிர் நிறத்தில் மாறுதல்

* சருமம் பளபளப்பாக காணப்படுதல்

* ஆண்களுக்கு விறைப்புத்தன்மை பிரச்சனை

* கால் தசைகள் சுருங்குதல் போன்றவை ஆகும்.

உயர் கொலஸ்ட்ராலை எப்படி குறைப்பது?

ஆரோக்கியமாக இருக்க வேண்டுமானால், முதலில் ஒருவர் நாம் என்ன சாப்பிடுகிறோம் என்பதை நன்கு அறிந்து உண்ண வேண்டும். உடலில் கொலஸ்ட்ரால் அளவு அதிகமாவதற்கு முக்கிய காரணம் பதப்படுத்தப்பட்ட உணவுகள், எண்ணெயில் பொரித்த உணவுகள் மற்றும் செயற்கை பொருட்கள் நிரம்பிய உணவுகள் தான். இது தவிர கேக், பிஸ்கட், சாசேஜ், கொழுப்புள்ள இறைச்சி, க்ரீம், சீஸ், வெண்ணெய் போன்றவற்றையும் தவிர்க்க வேண்டும். அதற்கு பதிலாக காய்கறிகள், பழங்கள், தானியங்கள் போன்றவற்றை உணவில் அதிகம் சேர்க்க வேண்டும்.