தமிழ்நாட்டில் அதிகரிக்கும் வைரஸ் காய்ச்சல்: அதன் அறிகுறிகள் என்ன மற்றும் அதை தடுப்பது எப்படி?

அறிகுறிகள்

* அதிகப்படியான காய்ச்சல் (101 டிகிரிக்கு மேல் இருப்பது)

* தொண்டை வலி

* வறட்டு இருமல்

* வாந்தி/குமட்டல்

* உடல் சோர்வு

* உடல் வலி

* தலைவலி போன்றவை H3N2 வைரஸ் தொற்றின் அறிகுறிகளாகும்.

அபாய அறிகுறிகள்

H3N2 வைரஸ் தொற்று தீவிரமாக இருந்தால், மேலே கொடுக்கப்பட்டுள்ள அறிகுறிகளுடன், பின்வரும் அறிகுறிகளும் இருக்கும். அவை

* மூச்சுத் திணறல்

* மூச்சு விடுவதில் சிரமம்

* எதையும் சாப்பிட முடியாமல் இருப்பது

* நெஞ்சு வலி

* வலிப்பு

இந்த அறிகுறிகள் தென்பட்டால், சற்றும் தாமதிக்காமல் உடனே மருத்துவரை அணுகி சிகிச்சை எடுக்க வேண்டும். ஏனெனில் இவை அனைத்தும் தொற்றின் தீவிரத்தன்மையைக் குறிக்கின்றன.

முன்னெச்சரிக்கை நடவடிக்கைகள்

செய்ய வேண்டியவைகள்:

மேலே கொடுக்கப்பட்டுள்ள அறிகுறிகள் உங்களிடம் தென்பட்டால், பின்வரும் விஷயங்களை நினைவில் கொண்டு பின்பற்ற வேண்டும்.

* கைகளை அடிக்கடி சோப்பு போட்டு கழுவி, சுத்தமாக வைத்துக் கொள்ள வேண்டும்.

* வெளியே செல்லும் போது ஃபேஸ் மாஸ்க் அணிந்து கொள்ள வேண்டும். முடிந்தவரை கூட்டமான பகுதிகளுக்கு செல்வதைத் தவிர்க்க வேண்டும்.

* தேவையில்லாமல் வாய் மற்றும் மூக்கு பகுதியைத் தொடக்கூடாது.

* இருமல் மற்றும் தும்மலின் போது வாய் மற்றும் மூக்குப் பகுதியை மூடிக் கொள்ளவும்.

* நிறைய நீரைக் குடித்து உடலை நீரேற்றத்துடன் வைத்துக் கொள்ளவும்.

* காய்ச்சல், இருமல் மற்றும் உடல் வலி இருந்தால், பாராசிட்டமாலை எடுக்கலாம்.

செய்யக்கூடாதவை:

* கைக்குலுக்கலைத் தவிர்க்க வேண்டும்.

* பொது இடங்களில் எச்சில் துப்பாதீர்கள்.

* சுய மருத்துவத்தை தவிர்க்க வேண்டும்.

* முக்கியமாக ஆன்டி-பயாடிக் மருந்துகளை எடுக்கக்கூடாது.

யாருக்கெல்லாம் இந்த வைரஸ் தொற்று ஏற்படுவதற்கான அபாயம் உள்ளது?

ஐசிஎம்ஆர்-ன் கூற்றுப்படி, இந்த H3N2 வைரஸ் தொற்றானது வயதானவர்கள், குழந்தைகள், நோயெதிர்ப்பு சக்தியைக் குறைவாக கொண்டவர்கள் மற்றும் இணை நோய்களைக் கொண்டவர்களுக்கு ஏற்படுவதற்கான வாய்ப்பு அதிகம் உள்ளது. எனவே இவர்கள் மிகவும் கவனமாக இருக்க அறிவுறுத்தப்படுகிறது.

தொற்றில் இருந்து மீள்வது எப்படி?

* காய்ச்சலைக் குறைக்கும் பாராசிட்டமால் மருந்துகளை எடுக்க வேண்டும்.

* காய்ச்சல் அதிகமாக இருந்தால், வலிப்பு வராமல் இருக்க, குளிர்ந்த நீரில் நனைத்த துணியைக் கொண்டு ஒத்தி எடுக்க வேண்டும்.

* நீர்ச்சத்துள்ள ஆகாரங்களை உட்கொள்ள வேண்டும்.

* முக்கியமாக நன்கு ஓய்வு எடுக்க வேண்டும்.

இந்த H3N2 வைரஸ் தொற்று கடுமையாக இருந்தால் வைரஸ் கொல்லி மருந்துகளை மருத்துவர்கள் கொடுப்பார்கள். அதுவே இந்த தொற்றில் இருந்து விடுவிக்கும். இது வைரஸ் தொற்று என்பதால் பாக்டீரியாக்களை கொல்லும் ஆன்டி-பயாடிக் எடுப்பதால் எவ்வித பலனும் கிடைக்காது. முக்கியமாக இந்த வைரஸ் தொற்று உயிருக்கு ஆபத்தை ஏற்படுத்தாது என்பதால் பயப்பட தேவையில்லை. இருப்பினும் கவனமாக இருக்க வேண்டும்.