இறால் ரொம்ப பிடிக்குமா? அப்ப அத இப்படி சாப்பிடுங்க.. உடம்பும் சீக்கிரம் குறையும்...

இறால் எப்படி எடையைக் குறைக்க உதவுகிறது?

இறால்கள் புரோட்டீன், வைட்டமின் டி, வைட்டமின் பி3 மற்றும் ஜிங்க் போன்றவை அதிகம் கொண்டதோடு, கார்போஹைட்ரேட் இல்லாததால், எடையைக் குறைக்க முயற்சிப்போருக்கு சிறந்த உணவு. மேலும் இதில் ஜிங்க் அதிகம் உள்ளதால், இது உடலில் லிப்டின் அளவை அதிகரிக்கும். லிப்டின் என்பது ஒரு ஹார்மோன். இது உடலில் கொழுப்புத் தேக்கம், பசியுணர்வு மற்றும் உடலின் ஆற்றல் போன்றவற்றை சீராக பராமரிப்பதில் முக்கிய பங்காற்றுகிறது. உடலில் போதுமான அளவு லிப்டின் இல்லாவிட்டால் தான், உணவுகளின் மீது ஆசை அதிகரிக்கும் மற்றும் அளவுக்கு அதிகமாக சாப்பிடுவோம். அதோடு இதில் அதிகளவிலான அயோடின், உடலின் மெட்டபாலிச விகிதத்தைக் கட்டுப்படுத்த உதவுகிறது. உடலில் அயோடின் குறைபாடு இருந்தால் தான், தைராய்டு சுரப்பியின் செயல்பாடு பாதிக்கப்பட்டு, உடல் பருமனுக்கு வழிவகுக்கும்.

இறாலில் உள்ள சத்துக்கள்

இறாலில் வைட்டமின்கள் மற்றும் கனிமச்சத்துக்களான கால்சியம், பாபர, பொட்டாசியம், வைட்டமின் ஏ, வைட்டமின் ஈ போன்றவை உள்ளன. அதோடு இதில் வைட்டமின் பி12, வைட்டமின் பி6 மற்றும் நியாசின் போன்றவையும் குறிப்பிட்ட அளவில் நிறைந்துள்ளன. கூடுதலாக இரும்புச்சத்து அதிகம் நிறைந்துள்ளதால், இது இரத்த சிவப்பணுக்களின் உற்பத்தியை ஊக்குவிக்க உதவுகிறது.

புரோட்டீன் நிறைந்த இறால்

இறாலில் சிக்கன் அல்லது மாட்டிறைச்சிக்கு இணையான அளவு புரோட்டீன் நிறைந்துள்ளது. ஆனால் இறாலில் கலோரிகள் குறைவு. 2 அவுன்ஸ் இறாலில் சுமார் 12 கிராம் புரோட்டீன் உள்ளது. புரோட்டீன் அதிகம் உள்ள உணவுகள் எடை இழப்பு மற்றும் எடை மேலாண்மைக்கு உதவுகிறது. மேலும் புரோட்டீன் உங்கள் உடலில் ஆற்றல் அளவை அதிகரிக்கிறது மற்றும் செரிமானமாவதற்கு அதிக நேரம் எடுக்கும். இதனால் அதிக கலோரிகளை எரிக்கிறது மற்றும் நீண்ட நேரம் முழுமையாக உணர வைக்கும்.

இறாலில் கொழுப்பு குறைவு

இறால்கள் புரோட்டீனின் சிறந்த மூலமாக இருப்பதால், இறால்களில் கொழுப்பு குறைவாக உள்ளது. அதில் 2-அவுன்ஸ் இறாலில் 0.5 கிராம் கொழுப்பு மட்டுமே உள்ளது. இறால்களில் அன்சாச்சுரேட்டட் கொழுப்புக்கள் வளமான அளவில் நிறைந்துள்ளதால், இது ஒட்டுமொத்த ஆரோக்கியத்தையும் மேம்படுத்துகிறது. அதிலும் நீங்கள் எடையைக் குறைக்க முயற்சிப்பவராயின், இறால்கள் கொழுப்பு குறைவான சிறந்த உணவாகும்.

கலோரி குறைவு

இறால்களில் கலோரிகள் மிகவும் குறைவாகவே உள்ளது. 100 கிராம் இறால்களில் 115 கலோரிகள் மட்டுமே உள்ளது. எனவே இறால் கலோரி குறைவான காய்கறிகளுடன் சேர்த்து சாப்பிட அற்புதமாக இருக்கும்.

ஒமேகா-3 கொழுப்பு அமிலங்கள் அதிகம்

இறால்களில் ஒமேகா-3 கொழுப்பு அமிலங்கள் மிகவும் வளமான அளவில் நிறைந்துள்ளன. இந்த கொழுப்பு அமிலங்களை தொடர்ச்சியாக ஒருவர் உணவில் சேர்த்து வந்தால், உடலினுள் உள்ள வீக்கம் குறையும் மற்றும் உடல் கொழுப்பும் குறையும்.

இறாலை எப்படி சமைத்து சாப்பிடுவது நல்லது?

இறால்கள் கொழுப்பு குறைவான உணவாக இருப்பதால், இதில் உள்ள சத்துக்களை பாதுகாக்கவும், அவற்றை முழுமையாக பெறுவதற்கும், ஆவியில் வேக வைத்தோ அல்லது க்ரில் செய்தோ சாப்பிடுவது நல்லது. மேலும் இறால்கள் விரைவில் வேகக்கூடியது என்பதால், க்ரில் செய்வதன் மூலம், இறாலில் உள்ள முழு சத்துக்களையும் பெறலாம்.