சாதாரண தொண்டைப் புண் Vs கொரோனா தொண்டைப் புண்: இவற்றின் வித்தியாசத்தை அறிவது எப்படி?

தொண்டைப் புண் எதனால் ஏற்படுகிறது?

ஒருவருக்கு தொண்டைப் புண் பல்வேறு மருத்துவ நிலைமைகளின் விளைவாக ஏற்படலாம். தொண்டை புண் ஏற்பட்டால் அது வலியுடன், வறண்டு அல்லது கரகரவென்று ஒருவித அரிப்பு உணர்வையும் ஏற்படுத்தும். இத்தகைய தொண்டைப் புண் தொற்றுகளால் தூண்டப்படலாம் அல்லது வறண்ட காற்று போன்ற சுற்றுச்சூழல் காரணிகளாலும் தூண்டப்படலாம்.

தொண்டைப் புண் வகைகள்

தொண்டைப் புண்ணை மூன்று பகுதிகளாகப் பிரிக்கலாம் மற்றும் அது பாதிக்கும் பகுதியைப் பொறுத்து வேறுபடுத்தலாம். அதில் வாயின் பின்னால் உள்ள பகுதி பாதிக்கப்படும் போது, அது ஃபரிங்கிடிஸ் (Pharyngitis) ஆகும். அதுவே, டான்சில்கள் சிவந்து, வீக்கமடைந்தால், அது டான்சில்லிடிஸ் ஆகும். மூன்றாவது வகை லாரிங்கிடிஸ் ஆகும். இது குரல்வளை எனப்படும் குரல் பெட்டியில் வீக்கம் ஏற்படும் நிலையாகும்.

தொண்டைப் புண் கோவிட்-19 இன் பொதுவான அறிகுறியா?

சி.டி.சி அறிக்கையின் படி, ஜலதோஷம் மற்றும் காய்ச்சல் போன்றவை கோவிட்-19 இன் பொதுவான அறிகுறியாக அறிவிக்கப்பட்டுள்ளது. இருப்பினும், கொரோனாவின் பொதுவான சில அறிகுறிகள் ஒருவரிடமிருந்து மற்றொருவருக்கு மாறுபடலாம். கொரோனா வைரஸ் ஒரு சுவாச நோய் என்றாலும, இந்த வைரஸ்கள் எளிதில் மூக்கு மற்றும் தொண்டையில் நுழைந்து புண் மற்றும் வலியை ஏற்படுத்துகின்றன.

சாதாரண தொண்டைப் புண்ணுக்கும், கோவிட் தொண்டைப் புண்ணுக்கும் உள்ள வித்தியாசம் என்ன?

கொரோனா வைரஸ் மூக்கு மற்றும் தொண்டையுடன் இணைந்திருக்கும் சவ்வுகளில் நுழையும் போது கொரோனா நோயாளிகளுக்கு தொண்டைப் பகுதியில் வீக்கத்தை உண்டாக்கி, தொண்டைப் புண்ணை ஏற்படுத்துகிறது. இப்படி பாதிக்கப்பட்ட நபர் வலி மற்றும் வேதனையை அனுபவிப்பதை 'ஃபரிங்கிடிஸ்' என்று அழைக்கக்கிறார்கள். அதேப்போல், பொதுவான ஜலதோஷம் மற்றும் பிற காய்ச்சல் போன்ற சூழ்நிலைகளிலும், இவ்வாறு தான் தொண்டைப் புண் தூண்டப்படுகிறது. இருப்பினும், கோவிட்-19 ஐத் தவிர வேறு நோய்களிலும் தொண்டைப் புண் ஏற்படுகிறது என்பதால், கொரோனா வைரஸால் பாதிக்கப்பட்ட நோயாளிகள் தொண்டைப் புண்ணுடன், கொரோனாவின் பிற அறிகுறிகளான காய்ச்சல், வறட்டு இருமல் மற்றும் சோர்வு போன்ற அறிகுறிகளையும் அனுபவிப்பார்கள்.

ஒருவேளை உங்களுக்கு தொண்டைப் பகுதியில் மட்டும் வலி இருந்து, பிற அறிகுறிகள் இல்லாவிட்டால், அது கொரோனாவாக இருக்க வாய்ப்பில்லை. இருப்பினும், இதை உறுதிப்படுத்திக் கொள்ள விரும்பினால், தங்களை ஒருமுறை சோதித்துக் கொள்ளலாம்.

பிற நோய்களும் தொண்டைப் புண்ணை உண்டாக்கும்

தொண்டைப் புண்ணானது கோவிட்-19 தவிர, பொதுவான சளி, பருவகால அழற்சி, காய்ச்சல் மற்றும் பிற சுவாச நோய்களால் பாதிக்கப்பட்டவர்களுக்கும் ஏற்படலாம். அதிலும் வறண்ட காற்று போன்ற சுற்றுச்சூழல் காரணிகளால் இது அதிகம் தூண்டப்படலாம். ஒருவேளை நீங்கள் கடுமையான தொண்டை வலியை அனுபவித்தால், அதற்கு மகரந்தத்தினால் ஏற்படும் ஒவ்வாமைக் கூட முக்கிய காரணமாக இருக்கலாம்.

சிகிச்சைகள்

கொரோனாவை எதிர்த்துப் போராடிக் கொண்டிருக்கும் வேளையில், தொண்டைப்புண்ணால் பாதிக்கப்படுபவர்கள், அதற்கு மருந்துகள் அல்லது கை வைத்தியங்களின் மூலம் சிகிச்சை மேற்கொள்ளலாம். முக்கியமாக போதுமான அளவு நீரைக் குடிப்பது விரைவில் குணமாக உதவும். தொண்டை வலியை அனுபவித்தால், வெதுவெதுப்பான உப்பு நீரால் வாயைக் கொப்பளிக்கலாம். அதோடு அடிக்கடி ஆவி பிடிப்பதன் மூலம், விரைவில் தொண்டைப் புண்ணில் இருந்து விடுபடலாம்.