இந்திய ஆண்கள் மத்தியில் அதிகரித்து வரும் தொப்பை பிரச்சனை: சர்வே ரிப்போர்ட்!

ஆய்வு

நான்கில் ஒரு நடுத்தர இந்திய ஆணுக்கு "பீர்" தொப்பை இருக்கிறதாம். பெரும்பாலும் இந்திய ஆண்களின் உடல்நலம் பாதிப்பதற்கு இந்த பீர் தொப்பை தான் காரணமாக இருக்கிறதாம். சமீபத்தில் தேசிய அளவில் நடத்தப்பட்ட ஆய்வு ஒன்றில், இந்த தகவல் கண்டறியப்பட்டுள்ளது.

7000 பேர்

ராஜஸ்தான், உத்திரபிரதேசம், மேற்கு வங்காளம், அசாம், மகாராஷ்டிரா மற்றும் கர்நாடாகா போன்ற ஆறு இந்திய மாநிலத்தைச் சேர்ந்த 7000-க்கும் மேற்பட்ட ஆண்கள் இந்த ஆய்வில் பங்கெடுத்துள்ளனர்.

எடை, உயரம், உடல் சுற்றளவு

இந்த ஆய்வில் மிகமுக்கியமாக பங்கெடுத்துக் கொண்டவர்களின் உயரம், எடை, இடுப்பின் சுற்றளவு, இரத்த அழுத்தம் போன்றவை கணக்கெடுக்கப்பட்டது. இந்த ஆய்வின் மூலம் வயது வந்தோரின் ஆரோக்கியம் குறித்து கண்டறியப்பட்டது. இதில் 50 வயதை கடந்த ஆண்களும் கூட பங்கெடுத்துக் கொண்டனர்.

அதிகப்படியான கலோரிகள்

இந்த ஆய்வின் மூலம் இந்தியாவில் மக்கள் அதிகப்படியான கலோரிகளை உட்கொள்கிறார்கள். இதனால் தான் இந்தியர்களின் உடல் பெரிதாக உருவாவதற்கு காரணம் என கண்டறியப்பட்டுள்ளது.

பொருளாதார வளர்ச்சியோடு சேர்ந்து உடல் பருமனும்...

நமது நாடு வளர்ந்துவரும் நாடுகளில் முன்னிலையில் இருக்கிறது. பொருளாதார அளவில் மட்டுமின்றி, உடல் பருமனிலும் நாம் உலக நாடுகளோடு போட்டிபோட்டுக் கொண்டிருக்கிறோம் என்பதை நாம் கவனிக்க தவறிவிட்டோம்.

ஏழ்மை

இந்தியா வளரும் நாடென்ற போதிலும் கூட, இதன் ஏழ்மை சதவீதம் குறையவே இல்லை. ஒருபக்கம் வசதியும், உடல் பருமனும் கூடிக்கொண்டே போகையில், மறுபக்கம் ஏழ்மையும் வளர்கிறது.

ஊட்டச்சத்து குறைபாடு

நமது நாட்டில் தான் ஊட்டச்சத்து குறைபாடு காரணமாக ஏற்படும் உடல்நல குறைபாடும், அதிக உடல்பருமன் கொண்டமையால் ஏற்படம் உடல்நல குறைபாடும் சம அளவில் இருக்கிறது. உடல் பருமன் காரணத்தால், இதய நலன், நீரிழிவு, இரத்த அழுத்தம் போன்ற பாதிப்புகள் உண்டாகும் வாய்ப்புகள் அதிகம். எனவே, இனிமேலாவது உங்கள் உடல் பருமன் மீது அக்கறை எடுத்து, குறைக்க முயற்சி செய்யுங்கள்.